У аўстралійскім заапарку горада Квінсленд нарадзілася рэдкая белая каала. Пра гэта паведамляе тэлеканал BBC. Нягледзячы на сваю белую афарбоўку, жывёла не з'яўляецца альбіносам.
Маленькая каала ўжо паспела стаць ўлюбёнкай наведвальнікаў і супрацоўнікаў заапарку, а таксама карыстальнікаў інтэрнэту. Як адзначаюць эксперты, жывёле было б даволі цяжка адаптавацца і выжыць у дзікай прыродзе з такой афарбоўкай, бо яна магла б стаць лёгкай мішэнню для драпежнікаў.
— У ветэрынарыі гэта звычайна апісваюць паняццем «серабрысты ген»: калі жывёлы нараджаюцца з белай або вельмі светлай поўсцю. Як і малочныя зубы ў дзяцей, гэтая поўсць выпадае па меры сталення і мяняецца на дарослую афарбоўку, — распавядае кіраўнік медыцынскага цэнтра для дзікіх жывёл Розі Бут.
Імя нованароджанай каале яшчэ не далі, аднак кіраўніцтва заапарку прапанавала карыстальнікам фэйсбука самім абраць імя для каалы. У якасці варыянтаў найбольш распаўсюджанымі з'яўляюцца Сняжынка, Брыльянт, Жамчужына і Джэндаладзі (у перакладзе з мовы карэннага аўстралійскага племені азначае «з белай поўсцю»).
Цяпер чытаюць
Сакратар Рады бяспекі заклікаў беларусаў устрымацца ад паездак у Расію8
Каментары