Сачыць за парадкам на сталічных пляжах эколагам цяпер дапамагае квадракоптар, або дрон, паведаміў карэспандэнту агенцтва «Мінск-Навіны» начальнік аддзела аператыўнага кантролю Мінскага гарадскога камітэта прыродных рэсурсаў і аховы навакольнага асяроддзя Дзмітрый Александровіч.
Прадстаўнік Мінгаркампрыроды ўдакладніў: рэйды па зонах адпачынку ля вады праводзяцца рэгулярна і парушэнняў з кожным годам становіцца ўсё менш. Тым не менш эколагі трымаюць абстаноўку на кантролі. Пастаянна правяраюць своечасовасць вывазу смецця з кантэйнерных пляцовак, адсутнасць машын у 30-метровай зоне ля вады, наяўнасць спраўных шлагбаумаў, якія перакрываюць шлях несанкцыянаванаму транспарту.
— Пры дапамозе дрона вельмі зручна трымаць пад кантролем абстаноўку на пляжах. Але гэта не адзіная і не асноўная функцыя новага абсталявання. У Мінску ёсць шэраг даволі шырокіх па плошчы тэрыторый, якія вельмі складана аб'ехаць на транспарце. А за сітуацыяй на гэтых ўчасткі эколагам таксама неабходна сачыць, каб своечасова выяўляць парушэнні. Гэта і былы ваенны палігон у Калодзішчах, і поймы гарадскіх рэк. Менавіта на такіх участках мы плануем у першую чаргу выкарыстоўваць робат, каб кантраляваць становішча. Магчыма, нам нават удасца выяўляць падобным чынам парушальнікаў, якія ладзяць несанкцыянаваныя звалкі. Бо такая праблема ў горадзе да гэтага часу існуе, — растлумачыў Д. Александровіч.
Паводле слоў спецыяліста, робат ужо прайшоў баявое хрышчэнне. З дапамогай гэтага абсталявання абследавалі былы вайсковы палігон у Калодзішчах, а таксама тэрыторыі пляжаў на вадасховішчах Дразды і Крыніца. Вынікамі эколагі цалкам задаволеныя.
— Акрамя таго, што квадракоптар паскарае працэс абследавання, ён яшчэ дапамагае эканоміць паліва, а таксама спрыяе змяншэнню выкідаў ад транспарту ў атмасферу, што для нас як для прыродаахоўнай арганізацыі таксама немалаважна, — адзначыў эколаг.
Цяпер чытаюць
Вось хто той хлопец, які паехаў на праполку бульбы і стаў героем сацсетак6
Каментары