EUobserver: Еўрасаюз можа пашырыць санкцыі на бізнэсоўцаў, звязаных з Лукашэнкам

Інтэрнэт-выданьне EUobserver паведаміла са спасылкай на неназваную крыніцу ў кіраўніцтве Эўразьвязу, што ЭЗ можа пашырыць санкцыі супраць беларускага кіраўніцтва таксама і на бізнэсоўцаў, якія «ўзбагацілі беларускага лідэра», піша Радыё Свабода.

Як піша EUobserver, Аляксандар Лукашэнка мае сямейныя сувязі як мінімум зь дзьвюма кіпрскімі фірмамі: да дзьвюх тамтэйшых кампаніяў па працы зь нерухомасьцю — Eastleigh Trading і Dana Holdings — мае дачыненьне нявестка Лукашэнкі Лілія, жонка ягонага старэйшага сына Віктара. EUobserver зьвяртае на гэта ўвагу ў сувязі з тым, што 12 кастрычніка краіны Эўразьвязу, уключна з Кіпрам, прынялі рашэньне замарозіць фінансавыя актывы кіраўніка Беларусі, калі яны будуць знойдзеныя.

Лілію Лукашэнку прызначыў дырэктарам Eastleigh Trading Вячаслаў Дудкін, былы кіраўнік аддзелу па барацьбе з карупцыяй МУС Беларусі, які ўцёк з краіны і ў 2012 годзе даў інтэрвію журналісту Паўлу Шарамету для расейскага выданьня «Коммерсантъ».

Паводле Дудкіна, фірма «выкарыстоўвалася ў махлярскіх схемах». А ўладальнік Eastleigh Trading, беларускі алігарх Уладзімір Пефціеў быў унесены ў санкцыйны сьпіс Эўразьвязу ў 2011 годзе як «ключавы фінансавы спонсар рэжыму Лукашэнкі».

Eastleigh Trading працягвала працаваць і ў 2019 годзе. Заяўлены від дзейнасьці — «холдынгавая кампанія, пакупка, рэканструкцыя і прадстаўленьне нерухомасьці ў Беларусі». Паводле аўдыту, яе акцыі належалі «выключна нерэзыдэнтам Кіпру».

Лілія Лукашэнка цяпер кіруе мастацкай галерэяй у гандлёвым цэнтры групы Dana Holdings у Менску, якую ўзначальваюць два браты-сэрбы: Боян і Нэбайша Карычы. Яны працягваюць бялградзкую бізнэс-дынастыю Карычаў, зь якой Аляксандар Лукашэнка сябруе шмат гадоў. Лілія Лукашэнка таксама была названая ў фінансавай справаздачнасьці ў 2017 годзе ў ліку «старэйшых службовых асобаў» даччынай кампаніі Dana Holdings — Dana Astra.

Dana Holdings атрымлівала кантракты на будаўніцтва высотных элітных жыльлёвых комплексаў у Менску. Нэбайша Карыч у 2019 быў асноўным акцыянэрам кіпрскага аддзяленьня фірмы.

Прэсавы прадстаўнік Dana Holdings з піяр-фірмы EM, якая месьціцца ў Лёндане, заявіў у камэнтары для EUobserver, што фірма ня мае ніякіх незаконных прывілеяў ад Аляксандра Лукашэнкі. «Гэтае цьверджаньне катэгарычна непраўдзівае. Dana Holdings… здабыла дазволы на будаўніцтва праз адкрыты, канкурэнтны працэс, у поўнай адпаведнасьці зь беларускім заканадаўствам».

Прадстаўнік Dana Holdings таксама сказаў, што Лілія Лукашэнка была простым дызайнэрам і не вярнулася на працу ў Dana Astra пасьля таго, як тры гады таму сышла ў дэкрэтны адпачынак.

EUobserver адзначае, што Кіпр робіць больш інвэстыцый у Беларусь, чым любая іншая краіна Эўразьвязу. Прынамсі 19 грамадзян Беларусі, у тым ліку бізнэсоўцы і іх сем’і, купілі кіпрскія пашпарты з 2017 па 2019 год, піша выданьне са спасылкай на інфармацыю Al Jazeera.

• 0
• 0
• 0
• 0
• 0
• 0
• 0
• 0