Ангулярны хейліт (ці запаленне ў вуглах вуснаў) — даволі папулярная праблема. Яна асабліва часта сустракаецца ў дзяцей і пажылых людзей і ў выніку можа прывесці да з’яўлення балючых трэшчынак на вуснах. Тлумачым, як з гэтым змагацца.
Ангулярны хейліт утвараецца, калі сліна скопліваецца на краях рота. Яна парушае абарончыя бар’еры скуры і ў выніку скура высушваецца. Гэта можа спрыяць утварэнню трэшчынак і нават з’яўленню другаснай інфекцыі, часцей за ўсё грыбка, тлумачыць The Times.
Сустракаюцца і іншыя прычыны хейліту. Сярод іх можа быць экзэма, нашэнне маскі для твару і нават недахоп вітаміну В. Часцей за ўсё хвароба развіваецца ў халодны час году і пад уплывам цэнтральнага ацяплення, але ж можна заўважыць у сябе хейліт і летам.
Звычайна лячэнне ангулярнага хейліту залежыць ад прычыны сухасці скуры, але можа ўключаць выкарыстанне мясцовых антыбіётыкаў і супрацьгрыбковых лекаў, якія часам спалучаюць са стэроідамі. Сімптомы знікаюць прыкладна праз тыдзень пасля пачатку лячэння. Могуць дапамагчы увільгатняючыя мазі і крэмы для скуры, а таксама змякчаючыя бальзамы для вуснаў, асабліва ў халоднае надвор’е,
Каб знізіць рызыку хейліту, варта піць шмат вады і прытрымлівацца здаровай дыеты, багатай на жалеза, вітаміны групы В і бялкі. Пазбягайце палення, бо яно сушыць рот, і пераканайцеся, што вы не выкарыстоўваеце касметыку, у якой скончыўся тэрмін прыдатнасці. Карысна не аблізваць вусны, асабліва ў халоднае надвор’е, і пазбягаць раздражняльнікаў скуры: напрыклад, вадкасцяў для паласкання рота, у склад якіх уваходзіць спірт, ці зубных паст з выразнымі хімічнымі дадаткамі.
Каментары