Акудовіч пра Нобеля: Пасля 2022 года наш супольны шлях канчаткова разрываецца
Нобелеўская прэмія Бяляцкаму — гэта першая прэмія «беларускаму» беларусу, чалавеку, які з дзяцінства змагаўся за вольнасць Беларусі, прычым амаль што на ўсіх франтах. І таму гэты Нобель асабліва круты, піша ў канале «Беларускі Бабілон» гісторык і экскурсавод Цімафей Акудовіч. Але не толькі таму.
«Ідэя пра супольнае ўшанаванне трох арганізацый мне таксама падаецца ўдалай.
Таму што папярэдні наш Нобель таксама быў «трынародны», бо нададзены быў постсавецкай пісьменніцы Алексіевіч, звязанай і з Беларуссю, і з Украінай, і з Расіяй.
І тая прэмія таксама была прынцыпова антыімперская і нават антыпуцінская. Бо высвечвала, разбірала на часткі «чырвонага чалавечка».
Нобелеўскі камітэт спрацаваў вельмі элегантна: сённяшняя прэмія узнагародзіла тых, хто змагаўся з гэтым чырвоным чалавекам апошнія 30 год.
Ну і нікуды не дзенешся ад таго, што да 2022 года мы ў такіх глабальных падсумаваннях, як Нобель, ідзем адной абоймай. Бо кожны сваім шляхам спрабаваў вытравіць з сябе савецкае балота.
А вось з 2022 года гэты супольны шлях канчаткова разрываецца. Бо ва ўкраінцаў атрымалася, у беларусаў яшчэ не, а рускія, верагодна, залазяць у яго назад.
Так што ўсё добра падсумаваў Нобелеўскі камітэт», — падкрэслівае Цімафей Акудовіч.
Каментары
ну Алексіевіч няведама шчэ з якімі народамі звязана...
вось, напрыклад, напярэдадні 22 чэрвеня 2021 года атрымала статусны нямецкі крыж з рук прэзідэнта ФРГ "За заслуги перед Федеративной Республикой Германия"
угу. ад слова "элегантна" асабіста мяне пачало вараціць асабліва пасля чарговай элегантнай перамогі сёе-таго...