У Мінску з'явіліся эксперыментальныя прыпынкі з пакрыццём з бруку і бетону
У якасці эксперыменту ў Заводскім раёне Мінска з'явіліся прыпынкі грамадскага транспарту з пакрыццём з бруку і бетону, паведамляе агенцтва «Мінск-Навіны». Робіцца гэта з мэтай ліквідацыі каляін.
Пілотны праект па замене асфальтабетоннага пакрыцця на прыпынках рэалізуе «Рэмаўтадар Заводскага раёна». Адзначаецца, што эксперымент праводзіцца на прыпынках «Кальцавая дарога» (вуліца Герасіменкі) і «Аўтастанцыя «Аўтазаводская» (вуліца Машынабудаўнікоў).
У першым выпадку было выканана брукаванне кішэні прыпыначнага пункта з брукаванага каменя, у другім — з бетону. Адзначаецца, што зімовы і летні перыяды павінны паказаць ступень устойлівасці пакрыццяў.
У выпадку поспеху новыя тэхналогіі (ці нейкая адна з іх) могуць быць выкарыстаныя па ўсім горадзе.
Раней каляіны ліквідавалі з дапамогай асфальтабетону падвышанай дэфармацыйнай устойлівасці. Аднак, як паказала практыка, у моцную спёку, пры +30°C і вышэй, гэтая тэхналогія не спраўляецца.
Каментары