У паліцыі заяўляюць, што сярод арыштаваных -- усе кіраўнікі групы, якая плянавала тэракты. Бомбы яны зьбіраліся сабраць проста на борце самалёту з бяскрыўдных на выгляд вадкіх кампанэнтаў.
Пра гэта паведаміла агенцтва «Ройтар» са спасылкай на крыніцы ў брытанскіх службах бясьпекі. Сёньня, 10 жніўня, былі арыштаваныя больш за 20 чалавек. У паліцыі кажуць, што сярод іх знаходзяцца ўсе кіраўнікі групы, якая плянавала тэракты. Бомбы яны зьбіраліся сабраць проста на борце самалёту з бяскрыўдных на выгляд вадкіх кампанэнтаў.
У многіх аэрапортах сьвету прымаюцца ўзмоцненыя захады бясьпекі, у Вялікабрытаніі пасажыраў не прапускаюць у самалёт зь любымі сумкамі. Іх трэба здаваць у багаж. Пажадана браць толькі пашпарт, білет, партманэт.
Забаронена праносіць з сабой зубную пасту, крэмы і ежу, а таксама ноўтбукі і мабільнікі. Многія рэйсы адкладзены альбо перанесены. У Вялікабрытаніі «тэрактавае папярэджаньне» закранула каля 400 тыс. чалавек.
Між іншым, лёнданскі аэрапорт «Хітроў» зьяўляецца трэцім у сьвеце аэрапортам па колькасьці перавезеных пасажыраў і грузаў (пасьля Атлянты і Чыкага). Штогод празь яго тэрміналы праходзяць 68 млн пасажыраў, а штодня тут прызямляецца каля 1250 самалётаў.
Паводле замежнае прэсы
Каментары