Украінскія войскі прарвалі расійскую лінію абароны каля сяла Вярбовае — CNN
Генерал Аляксандр Тарнаўскі, камандуючы ўкраінскай групоўкай войскаў «Таўрыя», прадказвае яшчэ большы прарыў і тлумачыць сітуацыю на фронце.
Сяло Вярбовае знаходзіцца на ўсход ад Рабоціна — яго УСУ вызвалілі ў цяжкіх баях у канцы жніўня.
«На левым флангу [каля Вярбовага] у нас прарыў, і мы працягваем прасоўвацца далей», — сказаў Аляксандр Тарнаўскі CNN. Пры гэтым ён прызнаў, што яго войскі прасоўваюцца павольней, чым чакалася.
«Не так хутка, як чакалася, не так, як у фільмах пра Другую сусветную вайну», — сказаў ён. «Галоўнае — не страціць гэтай ініцыятывы [якая ў нас ёсць]».
Прызначаныя Расіяй чыноўнікі ў акупаваным Запарожжы прадставілі іншую карціну баявых дзеянняў. Аднак аналіз даступнага відэа з адкрытых крыніц дазваляе выказаць здагадку, што некаторыя ўкраінскія падраздзяленні перасеклі важную лінію расійскай абароны паблізу вёскі Вярбовае, піша CNN.
Аднак Тарнаўскі сказаў, што, на яго думку, вялікім прарывам у контрнаступленні было б, калі б Украіна змагла ўзяць Такмак (горад у Запарожскай вобласці), стратэгічны вузел для Расіі, які з'яўляецца яе першай буйной мэтай у барацьбе на поўдні.
Раней на гэтым тыдні CNN паведамляў, што ўкраінскія войскі ўсё яшчэ знаходзяцца прыкладна за 20 кіламетраў ад Такмака, з усіх сіл спрабуючы прарваць шматлікія пласты расійскай абароны.
Тарнаўскі кажа, што сур'ёзнейшымі праблемамі з'яўляюцца не «лінія Суравікіна» — абарончая лінія, пабудаваная на загад генерала Сяргея Суравікіна, былога галоўнакамандуючага Паветрана-касмічных сіл Расіі, — а «скрыжаванні, лініі дрэў і мінныя палі паміж лініямі дрэў».
Генерал прызнаў, што для таго, каб контрнаступленне было паспяховым, украінскім войскам неабходна, прынамсі, дасягнуць горада Такмак.
«Такмак — гэта мэта мінімум», — сказаў ён. «Агульная мэта — дабрацца да межаў нашай дзяржавы».
«Проста цяпер ані праціўнік, ані мы не выкарыстоўваем буйных фармаванняў, ротаў, батальёнаў або брыгадаў. Мы выкарыстоўваем штурмавыя атрады, групы па 10-15 чалавек», — тлумачыць ён сітуацыю.
Адной з прычын павольнага прасоўвання, са слоў генерала, быў той факт, што Расія змагла атрымаць некаторыя ўрокі з іншых украінскіх наступаў.
«Рускія вучацца даволі хутка, паколькі ў іх няма іншага выбару. Калі яны не навучацца, то хутчэй пацерпяць паразу», — патлумачыў ён. «Я б не сказаў, што яны прыстасоўваюцца да нашых дзеянняў, паколькі мы таксама мяняем нашу тактыку».
Ён сказаў, што Украіна таксама адаптавалася да выкарыстання заходняга абсталявання, а таксама заходняй тактыкі.
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч36
Каментары