У Калінкавічах бацька назваў сына вельмі рэдкім імем. Нават мама была ў шоку і думала, што муж перадумае
Хлопчыка назвалі Бавар. Бацька пачуў гэтае імя падчас прагляду турніру па адзінаборстве. Імя здалося яму вельмі мілагучным і ён вырашыў так назваць сваё дзіця. Спатрэбіўся час, каб да незвычайнага імя прывыклі сваякі і жонка, піша Smartpress.by.
«Першапачаткова я была супраць і спадзявалася, што муж перадумае. Але калі немаўля нарадзілася, сумневаў ужо не было. За час цяжарнасці я прывыкла да імя. Яно і напраўду незвычайнае, прыгожае, а галоўнае, рэдкае», — распавяла мама Бавара Вераніка.
Сваякі былі здзіўлены выбарам бацькоў, а сябрам імя спадабалася адразу.
Бавар — імя французскага паходжання, азначае ўпартасць, сілу, і мужнасць.
Па даных Мінюста, у 2023 годзе нованароджаных у Беларусі называлі наступнымі рэдкімі імёнамі. Так, у Гомельскай вобласці з'явіліся Граф, Джон, Мір, Цімаці і Чарлі, а таксама Руф, Эра і Талія.
У Гродзенскай вобласці хлопчыкі атрымалі імёны Сяргей-Джуніёр, Каюс, Леанель, Эван, дзяўчынкі — Аніела, Фяўроння, Рэйніра.
У Віцебскай нарадзіліся Арыф, Златан, Зараслаў, Рувім, Аўрэлія, Дзея і Луна. У Магілёўскай вобласці — Авенір, Артас, Зейн, Ісая, Аніка, Альвард, Юна.
У Мінскай вобласці з'явіліся Вольф, Райманд, Якум, Аўгіння, Валенсія, Лунела. У Мінску — Акім Жан, Оскар, Сафіян, Муза, Цвятана, Мальвіна, Вірынея.
Орган загса не мае права адмовіць у прысваенні дзіцяці абранага бацькамі імя, калі яно не супярэчыць нормам грамадскай маралі і нацыянальным традыцыям.
Каментары