За галоўны прыз Берлінале на 75-м па ліку Берлінале 2025 года спаборнічалі 19 фільмаў. «Залатога мядзведзя» атрымаў фільм «Мары» рэжысёра з Нарвегіі Дага Ёхана Хаўгеруда. Гэты фільм — частка трылогіі (першыя дзве часткі называліся «Сэкс» і «Каханне»).
У фільме-пераможцы расказваецца пра 17-гадовую Яану, якая закахалася ў сваю настаўніцу французскай мовы. Каб выказаць свае пачуцці, яна пачынае весці дзённік. Калі яе запісы знаходзяць маці і бабуля, то іхні першапачатковы жах змяняецца захапленнем ад таго, як добра Яана піша.
Вялікі прыз журы «Срэбраны мядзведзь» уручылі фільму «Блакітная сцежка» (O último azul) бразільскага рэжысёра Габрыэля Маскара. Ягоная гераіня адмаўляецца жыць у калоніі для пажылых людзей і кіруецца ў падарожжа па Амазоніі.
Другога «Срэбнага мядзведзя» журы атрымала карціна «Паведамленне» (El mensaje) аргенцінскага рэжысёра і аператара венесуэльскага паходжання Івана Фунда. Гэта фільм пра дзяўчынку, якая валодае звышнатуральнымі здольнасцямі і здольная разумець мову жывёл.
Узнагароды таксама атрымалі:
- за «творчы ўнёсак» — «Ледзяная вежа» (рэжысёр Люсіль Хадзіхалілавіч з Францыі);
- за лепшы сцэнар — «Кантыненталь 25» (рэжысёр Раду Жудэ з Румыніі). Гераіня гэтага фільма, судовы прыстаў, перажывае з-за таго, што чалавек, якога яна высяляла з дому, скончыў жыццё самагубствам;
- за найлепшую ролю другога плана — Эндру Скот за ролю ў фільме «Блакітны месяц» (рэжысёр Роберт Лінклейтэр);
- за найлепшую галоўную ролю — аўстралійка Роўз Бірн за ролю ў фільме «Калі б у мяне былі ногі, я б цябе штурхнула» (рэжысёр Мэры Бранштэйн);
- за найлепшую рэжысуру — кітайскі рэжысёр Хо Мэн за сямейную сагу «Жыццё на зямлі»;
- за найлепшы дакументальны фільм — «Абдымаючы Ліат» Брэндана Крэмера. Гэта гісторыя ізраільцянкі, выкрадзенай баевікамі ХАМАС 7 кастрычніка 2023 года.
Прыз глядацкіх сімпатый у секцыі «Панарама» атрымаў фільм «Глухія» іспанскай рэжысёркі Евы Лібертад. Паводле яго сюжэту, глухая жанчына і яе партнёр без праблем са слыхам чакаюць нараджэння дачкі. Але ці будзе чуць яна?
Ганаровы «Залаты мядзведзь» за ўклад у кінамастацтва быў уручаны ў дзень адкрыцця фестывалю брытанскай актрысе Тыльдзе Суінтан.
Сёлета ў Берлінале ўдзельнічаў таксама фільм беларускага рэжысёра Юрыя Сямашкі «Лебядзіная песня Фёдара Озерава», і ён таксама атрымаў узнагароду ад чытацкага журы нямецкай газеты Tagesspiegel. Гэтая ўзнагарода прысуджаецца з 2007 года найлепшаму фільму ў секцыі Forum Берлінскага кінафестывалю.
Зяленскі назваў, якія рэтранслятары на мяжы і беларускія прадпрыемствы хвалююць Украіну36
Каментары