Пракоп’еў пра скандал вакол Стрыжака: Не трэба кожны выпадак дрэнных манер аналізаваць праз гендар. Гэта пашляціна, яно перашкаджае перамагчы Пуціна

Грамадскі дзеяч і былы рэстаратар Вадзім Пракоп'еў выказаўся наконт скандалу з дыкпікамі Андрэя Стрыжака ў новым выпуску праграмы «Сварка-шоу» на DW Беларусь.

Па словах Пракоп'ева, падобныя скандалы — гэта «цалкам нармальны ход падзей». Ён лічыць, што людзі не ідэальныя, і спасылаецца на цытату з серыяла «Mad Men»: «People do things» («Людзі робяць розныя рэчы»). На яго думку, трэба глядзець на сітуацыю «шырэй і глыбей», не хаваючы праблемы, як гэта робіцца ў аўтакратыях:

«Яны (людзі. — НН) недасканалыя, часам сасуды са зла і бруду. Трэба глядзець шырэй і глыбей, ні ў якім разе не ўжываць тунэльны зрок. І дакладна не берагчы «крыштальны сасуд», як у аўтакратыях — «не выносіць смецце з хаты, ні ў якім разе».

На погляд Пракоп'ева, дэмакратычнае грамадства, павінна адкрыта абмяркоўваць непрыемныя праявы жыцця, каб рабіць адпаведныя высновы і развіваць крытычнае мысленне:

«Я разумею, навошта гэта робяць у аўтакратыях, але ў дэмакратыях гэтага рабіць не трэба. Таму мы павінны глядзець на жыццё цалкам і шырока, ва ўсіх яго праявах, прыемных і неапетытных. І рабіць высновы адпаведныя, інакш крытычнага мыслення ў беларусаў не разаўецца, і будзе нам бяда, і «век волі не відаць».

Калі вядоўца ўдакладніла, ці не з'яўляюцца падобныя паводзіны мужчын у дачыненні да жанчын новым трэндам, характэрным для беларусаў, Пракоп'еў катэгарычна заявіў: «Не, я так не думаю». Ён падкрэсліў, што маральныя нормы для яго не з'яўляюцца чымсьці зменлівым і залежным ад часу:

«Мяне цалкам задаволіць позневіктарыянскі стандарт, калі вы мяне жадаеце спытаць. Мне зусім не патрэбны прагрэс сацыяльны для таго, каб судзіць дрэнныя манеры».

Разам з гэтым Пракоп'еў падкрэсліў: «Нам не трэба разглядаць гэтую сітуацыю з псіхалагічнага ці сацыяльнага пункту гледжання. Нам трэба разглядаць яе з жыццёвага і з палітычнага пункту гледжання», — і перайшоў да крытыкі сучасных трэндаў, якія, на яго думку, скажаюць рэальнасць і аслабляюць заходнюю цывілізацыю.

«Вы разумееце, мы жывём у жахлівыя часы, калі гендарныя даследаванні лічацца ўжо навукай. Мы жывём у часы, калі пачынае квітнець танны псіхааналіз. Калі кожная маладая маці, не паспеўшы выхаваць сына, ужо становіцца гештальт-тэрапеўтам.

І ў грамадства вялікая спакуса (і, на жаль, гэта ўсё падтрымліваецца прагрэсіўнымі медыя) разглядаць гэта з пункту гледжання шкалы «ахвяра-гвалтаўнік», з пункта гледжання роўнасці палоў або іх правоў.

Гэта досыць убогая і досыць крывая шкала і пункт гледжання, якая павінна адмерці. У Амерыцы (я ўяўляю, які погляд на Амерыку зараз мае еўрапейскі глядач) гэтая эпоха заканчваецца, і дзякуй богу, таму што гэтая эпоха можа проста падпілаваць сук, на якім знаходзіцца заходняя цывілізацыя».

На ўдакладняючае пытанне, у чым праблема з гендарнымі даследаваннямі, Пракоп'еў выказаў сваё стаўленне:

«Праблема ў тым, што заходняя цывілізацыя пайшла не ў той бок. Праблема ў тым, што ў наш час, падчас лічбавай рэвалюцыі і вось такога прагрэсу, які з'яўляецца следствам перамогі ў халоднай першай вайне (часам гэты час называюць «peace dividends time»), яно спарадзіла дастаткова цікавыя сацыяльныя феномены, якія не дазволяць заходняй цывілізацыі выйграць у восі зла. Гэта настолькі сур'ёзна.

І калі грамадства будзе канцэнтравацца на другарадных, трэцярадных праблемах і забудзецца карані, і забудзецца, чаму заходняя цывілізацыя, уласна, выстаяла і ўзышла за апошнія 500 гадоў, то нам усім не паздаровіцца».

У выніку Пракоп'еў параіў:

«Не трэба чых і кожны выпадак дрэнных манер ці сацыяльных памылак аналізаваць з пункту гледжання гендара. Гэта проста нейкая пашляціна. І гэта так распаўсюджана, і гэта вельмі згубна для таго, каб выйграваць у Пуціна вайну».

• 25
• 1
• 1
• 5
• 0
• 0
• 0
• 0