Расійскі пасол у Беларусі Барыс Грызлоў выступіў з чарговымі заявамі, якія фактычна адмаўляюць беларусам у самабытнасці. Ён проста заявіў, што не бачыць розніцы паміж расіянамі і беларусамі і заклікаў да далейшай інтэграцыі.
Масква і Мінск маюць аднолькавыя пазіцыі па ўсіх пытаннях двухбаковых і міжнародных адносін, кажа Грызлоў. Праз гэта, заявіў ён, «пра расіян і беларусаў нельга казаць паасобна, у адрыве адзін ад аднаго».
«У гэтым сэнсе мы і ёсць адзіны народ — аднолькава думаем, марым, спадзяёмся, жывём падобныя жыцці, вядзём падобны лад жыцця. Не лічу, што паміж нашымі народамі карэктна праводзіць водападзел і казаць пра адрозненні як такія.
Расія — гэта шматнацыянальная краіна, гэта дом, у тым ліку і для беларусаў, соцень іншых народаў. У сваю чаргу, у Беларусі пражывае даволі шмат расіян.
Таму як можна казаць, што мы чымсьці адрозніваемся? Тэзіс «Дзве краіны — адна Айчына» як мага лепш фармуе разуменне нашага адзінства, заснаванага на агульных гістарычных каранях, памяці, рэлігіі і працяглым сумесным пражыванні ў агульных межах», — кажа Грызлоў.
Паводле яго слоў тое, што Беларусь не стала Украінай, не азначае, што з Беларусі не спрабуюць Украіну зрабіць.
«У гібрыднай агрэсіі, развязанай заходнімі элітамі супраць Расіі, галоўным прынцыпам і мадэллю паводзін застаецца старажытнае «падзяляй і ўладар». Гэта небяспечная гульня, накіраваная таксама супраць саюза Расіі і Беларусі, закліканая сфармаваць у брацкага беларускага народа фальшывы вобраз варожага моцнага суседа, які марыць (не зусім зразумела — навошта) падпарадкаваць і захапіць», — гаворыць пасол.
Ворагі хочуць разбурыць саюз Расіі і Беларусі, кажа Грызлоў. «У гэтым кантэксце вельмі важна не дазволіць нашым нядобразычліўцам «замыліць» і сказіць сапраўдныя, дэталёва выкладзеныя ў навуковых працах факты нашай агульнай гісторыі, якія наглядна і дакладна паказваюць, што саюз Расіі і Беларусі абумоўлены зусім не часовымі палітычнымі меркаваннямі, не імгненнымі эканамічнымі інтарэсамі, а самой сутнасцю ўзаемаадносін нашых народаў і краін», — гаворыць ён.
Цяпер чытаюць
«Або мы цябе згвалцім, або ты паголіш бараду разам з галавой». Лахвіч расказаў, што з ім адбылося13
«Або мы цябе згвалцім, або ты паголіш бараду разам з галавой». Лахвіч расказаў, што з ім адбылося
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі77
Каментары