Глыбоччына мусіць абраць двух дэпутатаў у Віцебскі аблсавет. Толькі ў адной акрузе выбарцы маюць альтэрнатыву: там спаборнічаюць сябра БСДП (НГ) Зьміцер Курцэвіч і работнік аблвыканкаму. Ня лепшая сытуацыя і па выбарах у раённы савет. На 38 месцаў тут зарэгістравана 40 кандыдатаў. Пра сельскія і пасялковыя саветы зусім няма гаворкі: тут на 150 месцаў прэтэндуе 151 кандыдат. Аналягічны стан і ў суседніх раёнах. У Докшыцкім, напрыклад, зусім няма альтэрнатыўных кандыдатаў.
| Ўладзімер Скрабатун, рэдактар газэты «Вольнае Глыбокае» |
У Глыбоцкі райсавет ад дзьвюх партыяў — БНФ і БСДП (НГ) — было вылучана толькі пяць чалавек. Траім зь іх у рэгістрацыі адмовілі. У райсавет ад БНФ абіраецца Ўладзімер Скрабатун, рэдактар газэты «Вольнае Глыбокае», аўтар «НН». Ягоны супернік — дырэктар глыбоцкай беларускай школы Віталь Гарановіч. «Я б і сам за яго галасаваў», — кажа У.Скрабатун. Ад Народнай Грамады ў райсавет ідзе Зьміцер Курцэвіч — той самы, які вылучаецца ў абласны савет.
Яраслава Берніковіча (БНФ) не пусьцілі ў кандыдаты, бо прапісаны па адным адрасе, а пражывае па іншым. Калі ж ён падаў скаргу, абласная камісія апраўдала яго, але ж знайшла зачэпку ў іншым — няправільна складзеная дамова з выдаўцом газэты, супрацоўнікам якой Берніковіч зьяўляецца.
Другому кандыдату, Зьмітру Лупачу (Народная Грамада), было адмоўлена на падставе таго, што ён нібыта хаваў свае прыбыткі. Чалавек прадаў малапрадукцыйную карову і адразу ж купіў іншую, заплаціўшы болей грошай. Але «прыбытку» ад продажу не задэкляраваў. Вось і прычапілася камісія. На заўвагу Лупача, што выручка і прыбытак — розныя рэчы, адна зь сяброў камісіі заявіла: «Вы маглі працаваць стратна, але ж вы атрымалі прыбытак»...
З аналягічнай прычыны не прайшла і Юлія Бука (Народная Грамада): яна прадала бычка, а грошай у дэклярацыю не запісала. Камісія не паглядзела нават на тое, што гэтая кабета выхоўвае траіх дзяцей, нічога ня просячы ў дзяржавы.
З.Л., Глыбокае
Цяпер чытаюць
Былы міністр культуры Руслан Чарнецкі знайшоў сабе падпрацоўку9
Каментары