Pierachod na čysty śpirt

Irlandzkaja kampanija «Greenfield Project Management Limited» naładzić u Biełarusi mehavytvorčaść paliŭnaha etanołu z čarnobylskaha zbožža.

Dziela hetaha ŭtvorać sumiesnyja pradpryjemstvy ŭ Babrujsku i Mazyry.

Vytvorčaść paliŭnaha etanołu naładziać na bazie dvuch biełaruskich pradpryjemstvaŭ – Mazyrskaha kambinatu «Etanoł» i Babrujskaha hidroliznaha zavodu. Heta paviedamiła na admysłovaj pres‑kanferencyi staršynia rady dyrektaraŭ irlandzkaj kampanii «Greenfield Project Management Limited» En Maklejn. Ciapier adbyvajecca praces dziaržrehistracyi sumiesnych pradpryjemstvaŭ «Hrynfiłd Etanoł Babrujsk» i «Hrynfiłd Etanoł Mazyr». Dola biełaruskaha boku ŭ akcyjanernym kapitale składzie 20%, rešta budzie naležać irlandzkaj kampanii.

Abjom investycyjaŭ u vytvorčaść paliŭnaha etanołu składaje niekalki sotniaŭ miljonaŭ eŭra. Termin realizacyi prajektu ad pabudovy da pačatku vytvorčaści – 1,5—2 hady. Na terytoryjach pradpryjemstvaŭ pabudujuć novyja abjekty: u Mazyry zavod zojmie płošču ŭ 25 ha, u Babrujsku – 4,5 ha. Zaplanavany štohadovy prybytak ad realizacyi pradukcyi z abodvuch zavodaŭ składzie 350 młn eŭra. U Babrujsku čakajecca abjom vytvorčaści ŭ 10 młn dał, u Mazyry — 55 młn dał. Na pieršym etapie ŭsiu pradukcyju miarkujuć pradavać za miažu. Kantrakty na prodaž pradukcyi, što budzie vypuščanaja ciaham bližejšych dvuch hod, užo pradadzienaja.

Spačatku paliŭny etanoł buduć ekspartavać na Zachad, zatym adbudziecca istotnaja pieraaryjentacyja na rasiejski rynak. Heta tłumačycca ŭsio bolšaj kankurencyjaj z boku krainaŭ Uschodniaj Eŭropy, u jakich imkliva naładžvajecca analahičnaja vytvorčaść.

Namieśnik staršyni kancernu «Biełbijafarm» Uładzimier Mahiloviec, jaki pradstaŭlaŭ na pres‑kanferencyi biełaruski bok, patłumačyŭ, što na siońnia ŭ Biełarusi nie isnuje narmatyŭna‑pravavoj bazy vykarystańnia paliŭnaha etanołu. «Tamu pakul i planujem uvieś abjom vypuščanaj pradukcyi pradavać za miažu. Kali ž narmatyŭna‑pravavaja baza datyčna vykarystańnia ŭ Biełarusi paliŭnaha etanołu budzie raspracavanaja, nie vyklučajem i pieraraźmierkavańnia častki pradukcyi na ŭłasny rynak», – raspavioŭ U.Mahiloviec. Pavodle čynoŭnika, realizacyja takoha prajektu stała mahčymaja dziakujučy źmiakčeńniu investycyjnaj palityki Biełarusi. Namieśnik staršyni «Biełbijafarmu» zaznačyŭ, što ŭ budučyni ekspartny patencyjał pajektu dazvolić jamu vyjści ŭ lidery pa pryciahnieńni valuty ŭ biudžet. «Biezumoŭnaja karyść i ŭ planie impartazamiaščeńnia – vytvorčaść etanołu supravadžajecca atrymańniem karysnych pabočnych praduktaŭ: vuhlekisłaty, vadkaj brahi, što vykarystoŭvajecca dla vytvorčaści charčovych dadatkaŭ dla patrebaŭ žyviołahadoŭli, a taksama sulfatu amoniju – mineralnaha ŭhnajeńnia», – padkreśliŭ sp.Mahiloviec.

Pa słovach aficyjnaha pradstaŭnika «Greenfield Project Management Limited» u Biełarusi Andreja Alejnikava, prajekt praduhledžvaje vykarystańnie ŭ jakaści syraviny ziernia pšanicy, žyta i trycikale. «Na pačatku realizacyi prajektu budzie vykarystoŭvacca zvyčajnaje zbožža, zatym, jak praduhledžvałasia ad pačatku, pačniem vykarystoŭvać zbažynu, zaviezienuju z zabrudžanych u vyniku avaryi na ČAES terytoryjaŭ» – patłumačyŭ sp. Alejnikaŭ. Takim čynam budzie realizoŭvacca biełaruska‑irlandzkaja prahrama ačyščeńnia zabrudžanych teryioryjaŭ.

Štohod zavody ŭ Mazyry i Babrujsku buduć pierapracoŭvać da 1,5 młn t ziernia, ź ich kala 30% budzie składać ajčynnaje ziernie. Astatnija 70% planujecca zakuplać u Rasiei, Ukrainie dy Kazachstanie. Darečy, Biełaruś usiaho atrymlivaje kala 6 młn tonaŭ zbožža za hod.

Kažučy pra ekalahičny aspekt dziejnaści zavodaŭ, pradstaŭnik kampanii ŭ Biełarusi padkreśliŭ, što vytvorčaść paliŭnaha etanołu ź ziernia biasškodnaja dla navakolla. Bolš za toje, vytvorčy praces praduhledžvaje paŭtornaje vykarystańnie technalahičnaj vady. Akramia taho, na abodvuch pradpryjemstvach zbudujuć mini‑TEC, što buduć pracavać na metanie – pabočnym pradukcie vytvorčaści.

Paliŭny etanoł šyroka vykarystoŭvajecca ŭ jakaści dadatku da benzinu. Jon zajmaje 15% u ahulnym abiomie paliva, što vykarystoŭvajecca ŭ śviecie. Vytvorčaściu paliŭnaha śpirtu zajmajucca Švecyja, Niamieččyna, Brazylija.

Siamion Piečanko

• 0
• 0
• 0
• 0
• 0
• 0
• 0
• 0