Niekatoryja eksperty prahnazujuć, čto chutkim časam Ściapan Sucharenka moža, jak jaho papiarednik Leanid Jeryn, apynucca ŭ Maskvie i zaniacca biznesam. Inšyja nie vyklučajuć, što jon jašče vierniecca va ŭładu na novaj pasadzie.
Ściapan Sucharenka pracavaŭ šefam KDB ad 2005 hodu. I za hety čas paśpieŭ zrabić niamała. Usie pamiatajuć skandały z łatvijskim dypłamatam‑homaseksualistam i z vysyłkaju pratestanckich śviataroŭ, sudy nad maładziovymi aktyvistami ź niezarehistravanych arhanizacyj «Partnierstva» i «Małady front», pryniaćcie zakonu «Ab supraćdziejańni ekstrymizmu» i papraŭki ŭ Kryminalny kodeks, jakija praduhledžvajuć adkaznaść za dyskredytacyju dziaržavy za miažoju — heta tolki nievialičkaja častka z taho, što paśpieŭ zrabić Sucharenka za dva hady.
Pra mahčymuju adstaŭku staršyni KDB kazali ŭžo niekalki miesiacaŭ. Pieršym, chto pisaŭ pra hetyja čutki, byŭ internet‑resurs «Biełaruski partyzan». Mienavita na hetym sajcie źjaviłasia infarmacyja pra aryšty troch paŭkoŭnikaŭ KDB, jakija, akramia słužby, zajmalisia jašče i pryvatnym biznesam pad dacham dadzienaj śpiecsłužby.
‑ Kali my pisali pra hłupstva, nieprafiesijanalizm i idyjatyzm supracoŭnikaŭ KDB pad kiraŭnictvam Sucharenki, nas apanoŭvali nieadnaznačnyja pačućci. Z adnaho boku, niemahčyma było cicha hladzieć na heta i maŭčać, usim było zrazumieła, što adstaŭka Sucharenki niepaźbiežnaja. Ź inšaha boku, nam nie vielmi chaciełasia źviartać uvahu na idyjatyzm u dziejańniach biełaruskaha KDB, tamu što taki staršynia — heta byŭ padarunak dla biełaruskaj apazicyi, — skazaŭ Racyi kaardynatar prajekta «Biełaruski partyzan», viadomy žurnalist Pavieł Šaramiet.
Tamu, na jaho dumku, moža być, upieršyniu za apošnija hady Łukašenka pryniaŭ całkam słušnaje kadravaje rašeńnie:
‑ Ja liču, što kiravać takimi składanymi i niebiaśpiečnymi ministerstvami, jak KDB pavinny, jak minimum, adekvatnyja ludzi. Jany musiać być nie tolki padrychtavanymi prafiesijanalna, ale być psichična zdarovymi i psichałahična ŭstojlivymi. Jany taksama nie pavinny być niesumlennymi i podłymi.
Niezaležny žurnalist Raman Jakaŭleŭski, jaki časta źviartajecca ŭ svaich publikacyjach da dziejnaści śpiecsłužb, naadvarot, kaža, što Ściapana Sucharenku nijakim čynam nielha padazravać u nieprafiesijanaliźmie:
‑ Ja chacieŭ b nahadać, što Sucharenka byŭ samy małady hienierał KDB. Kali ja nie pamylajusia, to svaje hienieralskija pahony jon atrymaŭ u 42 hady. I jaho prafiesijnyja jakaści spatrebilisia. Tamu ja b tak nie kazaŭ: prafiesijanał ci nieprafiesijanał. Tut havorka idzie zusim pra inšaje.
Na dumku Ramana Jakaŭleŭskaha, chutčej za ŭsio Ściapan Sucharenka staŭ achviaraj miežviedamasnych razborak:
‑ Toje, što my nazirajem apošnim časam, a mienavita — roznyja skandały, kali spačatku MUS aryštoŭvaje jakichści supracoŭnikaŭ KDB, a potym KDB sadzić supracoŭnikaŭ MUS — usio heta śviedčyć pra surjoznuju vajnu pamiž śpiecsłužbami. I heta pahražaje nacyjanalnaj biaśpiecy krainy.
Lider Abjadnanaj hramadzianskaj partyi Anatol Labiedźka ličyć, što były kiraŭnik KDB razam ź inšymi vysokapastaŭlenymi supracoŭnikami śpiecsłužb zajmaŭsia biznesam i nie zaŭsiody dzialiŭsia z «centram». Tamu tak chutka skončyłasia epocha jaho kiravańnia Kamitetam dziaržaŭnaj biaśpieki:
‑ Pa našaj infarmacyi, nie biez udziełu śpiecsłužb u Rasii byli stvoranyja padstaŭnyja firmy, praź jakija biełaruskim čynoŭnikam prapanavali vieści biznes. A paśla ich sadžali za kraty. Ale, akramia funkcyi prynady, hetyja ž samyja kamiercyjnyja struktury zajmalisia sapraŭdnym biznesam, i, mahčyma, hrošy ad jaho nie zaŭsiody traplali nazad ŭ Biełaruś.
Što tyčycca novaha staršyni KDB — byłoha kiraŭnika słužby biaśpieki prezidenta Juryja Žadobina, to ŭsie ekśpierty kažuć, što naŭrad ci jon budzie zakručvać šrubki bolš za papiarednika. Pryncypova dziejnaść hetaj siłavoj struktury nie źmienicca.
‑ KDB zastaniecca takoj ža zakrytaj strukturaj, biez usialakaha hramadskaha kantrolu. I adnym z pryjarytetaŭ KDB zastaniecca palityčnaja adsočka i kantrol za dziejnaściu apanientaŭ režyma, — upeŭnieny Anatol Labiedźka.
Niekatoryja ekśpierty prahnazujuć, čto chutkim časam Ściapan Sucharenka moža, jak jaho papiarednik Leanid Jeryn, apynucca ŭ Maskvie i zaniacca biznesam. Inšyja nie vyklučajuć, što jon jašče vierniecca va ŭładu na novaj pasadzie. Ale ŭ toje, što były staršynia KDB moža apynucca na łavie padsudnych, nie vieryć amal usie.
Kamientary