Novym dyrektaram sanatoryja «Biełaruś» u Sočy staŭ adstaŭnik, jaki raniej pracavaŭ na «Minsk-Arenie»
Zamiena dyrektara supała z pryjezdam Alaksandra Łukašenki na adpačynak.
Zamiena adnaho kiraŭnika na inšaha, zdavałasia b, zvyčajnaja praktyka. Ale voś kudy padzieŭsia raniejšy dyrektar sanatoryja «Biełaruś» u Sočy Hieorhij Sarakašyš?
«Narodnaja vola» napisała pra mahčymy aryšt eks-dyrektara razam z byłymi namieśnikami ŭ Minsku. Nibyta ich vyklikali ŭ Biełaruś pa pracoŭnych pytańniach i aryštavali.
U KDB i Śledčym kamitecie asprečyli takuju infarmacyju.
Uładzimir Ryžankoŭ
Novy dyrektar sanatoryja — Uładzimir Alaksandravič Ryžankoŭ. Jon adstaŭny vajskoviec-miedyk.Pracavaŭ načalnikam hałoŭnaha kliničnaha špitala Ministerstva abarony. Uznačalvaŭ Respublikanski centr pa azdaraŭleńni i sanatorna-kurotnym lačeńni nasielnictva. Kuryravaŭ pracaj sanatoryjaŭ, u tym liku i ŭ Sočy. A ciapier u Rasiju pierajechaŭ z pasady načalnika upraŭleńnia pa miedycynskim zabieśpiačeńni ŠKSK «Minsk-Arena».
U «Minsk-Arenie» Ryžankoŭ nie pracuje ź minułaha tydnia. A 11 lutaha, akurat na minułym tydni, sam Łukašenka vylacieŭ u Sočy. I vialikaja hrupa supravadžeńnia razam ź im.
Pahavaryć z samim Uładzimiram Alaksandravičam nie atrymałasia — pa słovach sakratarki, jon uvieś čas, kali my telefanavali, pravodziŭ narady albo vyjazdžaŭ na sustrečy.
Braty-biznesoŭcy
Pra byłoha dyrektara Hieorhija Sarakašyša viadoma, što jon hrek i byŭ źviazany ź miascovym biznesam.Vydatnik achovy zdaroŭja Rasijskaj Fiederacyi. U sanatoryi «Biełaruś» u Sočy pracavaŭ hałoŭnym doktaram, zatym namieśnikam dyrektara. A paśla zaniaŭ i kirujučaje kresła.
Cikava, što na terytoryi sanatoryja, zhodna z Rejestram dziejučych licenzij Krasnadarskaha kraja, pracuje «zakusačnaja», jakaja naležyć kampanii «BiełRosstroj». Uznačalvaje ž jaje Sarakašyš Chrystafor Kanstancinavič. Adnafamilec ci brat eks-dyrektara?
Chrystafor Kanstancinavič uznačalvaje i jašče šerah firm, jakija zajmajucca transpartnaj dziejnaściu. Razam z tym jon i staršynia Sočynskaha haradskoha hramadskaha abjadnańnia rasijskich hrekaŭ «Enosi».
A na samoha Hieorhija Kanstancinaviča ŭ krasaviku 2011 va Ufie była zarehistravana kampanija «Pałada» (roźničny handal).Heta toje, što znajšłosia ŭ adkrytym dostupie.
My pasprabavali źviazacca z Chrystaforam Sarakašyšam, kab spytać pra brata ci adnafamilca (znajści niejkija kantakty Hieorhija nie atrymałasia). Na telefanavańni adkazali tolki ŭ «BiełRosstroje», ale skazali, što Sarakašyša tam nie byvaje. Ale paabiacali jaho znajści i pieradać naš numar telefona. Čakajem.
U sanatoryi z žurnalistami razmaŭlać admaŭlajucca. Nie kažuć i pra eks-kiraŭnika. Ale stała viadoma, što ŭ novaha dyrektara — novaja sakratarka.
Pryvieści ŭ paradak
18 studzienia ad zajmanaj pasady kiraŭnika spravami prezidenta (hetaj struktury i naležyć sanatoryj u Sočy) vyzvalili Mikałaja Korbuta. A praz try dni hetaje kresła zaniaŭ Viktar Šejman. Užo 7 lutaha na naradzie ŭ Alaksandra Łukašenki Šejman vystupiŭ z zajavami pra karupcyju ŭ Kiraŭnictvie spravaŭ prezidenta. Novy kiraŭnik tady adznačyŭ, što ŭsie zaŭvahi tyčacca i budaŭničaj haliny, na jakuju mohuć być źviernuty pravierki. Jon havaryŭ pra nizki ŭzrovień budaŭnictva, zavyšeńnie koštu abjektaŭ, finansavyja parušeńni. Padkreśliŭ, što asabliva charakterna heta dla budaŭnictva abjektaŭ za miežami Biełarusi. Mieŭ na ŭvazie Sočy?
Łukašenka ŭ Sočy zajaviŭ pra toje, što «nam treba skončyć spravu, skončyć usie hetyja budoŭli. Treba zrabić usio, kab sanatoryj u Sočy pryvieści ŭ paradak».
U miescy rehularnaha adpačynku Alaksandra Łukašenki, jahonaj faktyčnaj čarnamorskaj rezidencyi, ad 2009 viałosia maštabnaje budaŭnictva.U im i mohuć chavacca pryčyny dla zamieny dyrektara. Jak i mnohija prajekty Kiraŭnictva spravaŭ, hety ažyćciaŭlaŭsia ź minimumam publičnaści. A dzie niama prazrystaści, tam zaŭždy kvitnieje karupcyja. U jaje zaciahvaje ludziej, chto b tyja pasady ni zajmaŭ.
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam14
Kamientary