U Minsku stvorać biełaruska-češskaje SP pa vytvorčaści stankoŭ

Češskaja kampanija FERMAT i chołdynh «Biełstankainstrumient» stvorać u Minsku sumiesnuju vytvorčaść pa vypusku stankainstrumientalnaha abstalavańnia.

Detali i ŭmovy stvareńnia SP płanujecca abmierkavać 15–17 krasavika padčas znachodžańnia biełaruskaj delehacyi ŭ Prazie i Brno. Takija damoŭlenaści dasiahnutyja 11 krasavika na sustrečy staršyni Dziaržaŭnaha kamiteta pa navucy i technałohijach Biełarusi Ihara Vojtava i dyrektara kampanii FERMAT Juryja Fierenca.

Jak paviedamlaje pres-słužba DKNT, miarkujecca, što ŭ składzie biełaruskaj delehacyi buduć śpiecyjalisty i ekśpierty chołdynhu, a taksama hienieralny dyrektar AAT «MZOR» — kirujučaja kampanija chołdynhu «Biełstankainstrumient» Viktar Butko, jaki prysutničaŭ na pieramovach. U pryvatnaści, jon adznačyŭ, što ŭžo ciapier «Biełstankainstrumient» hatovy dać najaŭnyja płoščy na zavodzie i razhledzieć pytańni zakupki asobnych elemientaŭ stankoŭ i abstalavańnia. «Nam treba vyrašać nie tolki jurydyčnyja pytańni pa stvareńni sumiesnaj vytvorčaści, ale i praktyčnyja — pa łakalizacyi i sumiesnaj pracy nad peŭnymi prajektami», — padkreśliŭ Butko.

U svaju čarhu Ihar Vojtaŭ paviedamiŭ, što kali hety prajekt budzie realizavany, to heta budzie dobry ŭniosak u ekanomiku jak Biełarusi, tak i Čechii. «U nas jość uzajemnaja cikavaść u hetym pytańni. Čechija, niahledziačy na finansavy kryzis, pavialičyła abjomy vytvorčaści vysakajakasnych i vysokatechnałahičnych stankoŭ, a Biełaruś pravodzić maštabnuju prahramu madernizacyi pramysłovaha kompleksu — praktyčna 2 tys. biełaruskich pradpryjemstvaŭ majuć biźnies-płany pa raźvićci. Tamu, stvaryŭšy sumiesnuju vytvorčaść pa vypusku stankainstrumientalnaha abstalavańnia, my možam razhladać madernizacyju jak kompleksnaje rašeńnie», — skazaŭ jon.

U sustrečy braŭ udzieł taksama kamiercyjny dyrektar Češskaha ekspartnaha banka Marcin Frelich, jaki paviedamiŭ, što Biełaruś dla Čechii znachodzicca ŭ śpisie pryjarytetnych dziaržaŭ dla viadzieńnia biźniesu. «My chacieli b bolš aktyŭna pracavać u vašaj krainie i hatovyja padtrymać usie raspačynańni češskich vytvorcaŭ i eksparcioraŭ. Dla nas niama prablem prafinansavać prajekty na sumu 100–150 miljonaŭ jeŭra», — pryvodzić słovy češskaha bankira pres-słužba DKNT.

Raniej dyrektar kampanii FERMAT Juryj Fierenc zajaŭlaŭ pra namier pabudavać zavod płoščaj prykładna 4 tys. kv. m i kolkaściu rabotnikaŭ — 150–200 čałaviek. Hadavy abarot novaha pradpryjemstva pavinien skłaści prykładna 20–22 młn. jeŭra. Pry hetym prykładna 70% vypuskanaj pradukcyi płanujecca ekspartavać.

Daviedka BiełaPAN. Chołdynh «Biełstankainstrumient» na čale z AAT «MZOR» abjadnoŭvaje pradpryjemstvy stankabudaŭničaj i instrumientalnaj haliny biełaruskaj pramysłovaści (16 profilnych pradpryjemstvaŭ).

Kampanija FERMAT zasnavanaja ŭ 1993 hodzie. Ciapier abjadnoŭvaje ŭ Jeŭropie (Čechija, Słavakija, Hiermanija, Vienhryja, Rumynija) šeść niezaležnych kampanij, u jakich pracuje bolš jak 200 čałaviek. Kampanija zajmaje adno ź viadučych miescaŭ u halinie pastaŭki novych i ŭžyvanych mietałaapracoŭčych i farmovačnych stankoŭ, madernizavanych viertykalnych takarnych stankoŭ, a taksama presaŭ, uklučajučy presavyja linii, i šlifavalnych stankoŭ.

• 0
• 0
• 0
• 0
• 0
• 0
• 0
• 0