A potym pryjšoŭ laśnik dy ŭsich razahnaŭ
Ideja apazycyi pajści na nastupnyja vybary adnym šychtom znoŭ razvalvajecca na starcie, jak stary drandulet. Piša ŭ svaim błohu Alaksandar Kłaskoŭski.
Anekdot pra leśnika, jaki ŭsich razahnaŭ, zhadvajecca z nahody sprečak miž apazycyjanerami ŭ pytańni parlamenckich vybaraŭ.
Ličanyja dni prajšli paśla ŭzornaj demanstracyi jadnańnia vakoł idei "Eŭrapiejskaha maršu" (budzie "akcyja sa znakam jakaści" i ŭsio takoje…) — i voś vam znoŭ: chto ŭ les, a chto pa drovy. Ideja pajści na nastupnyja vybary adnym šychtom — adziny lozunh, supolny mesydž, adzin demakratyčny kandydat na akruhu — razvalvajecca na starcie, jak stary drandulet.
Matyvacyja tych, chto choča hulać, jak Kiplinhava kotka, palahaje ŭ nastupnym: nia źviazvajcie našu inicyjatyvu! Chacia asobnyja z hetych strukturaŭ (taja ž "Eŭrapejskaja kaalicyja") navat nia ŭpeŭnienyja, što ŭvohule buduć vyłučać svaich ludziej. To bok šychtavacca nia chočuć pryncypova. I kali pahladzieć na raskoł pavodle persanalijaŭ, to heta vidavočnaje recha apošniaha kanhresu.
Z "Eŭrapiejskim maršam" zrazumieła — zładzić adnu akcyju napakaz praściej, čym adbarabanić supolna cełuju kampaniju, što na ŭsie 100% składajecca ź niaŭdziačnaj čarnavoj pracy. Biaz šancu nia toje što na mandaty, ale i na efektnuju "karcinku".
Sapraŭdy, naiŭna spadziavacca, što ŭłada, zachoŭvajučy zvykłuju moc, raptam voźmie dy padzielicca miescami ŭ Pałacie. Ale ž kali tak, kali nia źmienicca elektaralnaje zakanadaŭstva dy nia nadta pachiśniecca "sacyjałka" (što pakul jašče całkam imavierna), to, pa vialikim rachunku, parlamenckija vybary stanucca takoj samaj rytualnaj dziejaj, jak i marš. Tamu parlamenckaja kampanija, jak i vuličnaje šeście, vyhladaje dla tytulnaj apazycyi chiba šancam pakazać hramadztvu, što jana jašče dychaje i moža dziejničać asensavana dy metanakiravana. I voś hety šaniec marnujecca ad pačatku.
Kali składać adziny śpis, to "atrymajecca sytuacyja, što ŭ adnoj vybarčaj akruzie kandydat ad apazycyi budzie vystupać za intehracyju ŭ Eŭrapiejski źviaz, a ŭ susiedniaj — za intehracyju z Rasiejaj. Heta nahadvaje šyzafreniju", — tłumačyć separatnyja nastroi Mikoła Statkievič.
Svaja lohika tut jość. Ale krucicca na jazyku niepalitkarektnaje pytańnie: ci nia budzie ŭražańnie šyzafrenii jašče macniejšym, kali apazycyjanery stanuć ciahnuć koŭdru ŭ roznyja baki nie ŭ susiednich, a ŭvohule ŭ adnoj akruzie? :)
A hałoŭnaje — potym prydzie laśnik dy ŭsich razhonić.
Ciapier čytajuć
Staršynia Rady biaśpieki zaklikaŭ biełarusaŭ ustrymacca ad pajezdak u Rasiju3
Kamientary