Minjust pierabłytaŭ partyi

Ministerstva justycyi vyniesła aficyjnyja papiaredžańni šaści palityčnym partyjam Biełarusi, ale pry hetym pierabłytaŭ dźvie Hramady.

Siarod ich jość, jak apazycyjnyja (Partyja BNF, BSDP (H), Biełaruskaja partyja «Zialonych»), tak i lajalnyja da siońniašnich uładaŭ (Cacyjalna‑spartyŭnaja partyja, Sacyjał‑demakratyčnaja partyja narodnaj zhody, Respublikanskaja partyja).

Usim partyjam papiaredžańni byli vyniesienyja za adnu i tuju ž pravinu: parušeńnie artykułu 10 Zakonu «Ab palityčnych partyjach». Zhodna z novaj redakcyjaj hetaha zakonu kožnaja partyja musić mieć arhanizacyjnyja struktury ŭ bolšaści abłaściej krainy (nia mienš, čym u čatyroch), a taksama Mienskuju haradzkuju strukturu. Partyi byli papiaredžanyja, što ŭ vypadku dalejšaha ihnaravańnia ich dziejnaść moža być prypynienaja ci jany mohuć być likvidavanyja.

Juryst Partyi BNF Uładzimier Łabkovič kaža, što nasamreč jahonaja partyja maje struktury tolki ŭ Homielskaj, Bieraściejskaj i Mienskaj abłaściach. «My nia raz rabili sproby zarehistravać struktury i ŭ inšych rehijonach krainy, ale my sutykajemsia z prablemaj jurydyčnych adrasoŭ. Navat kali my znachodzim adpaviednaje pamiaškańnie, to praź niekatory čas prychodziać ludzi, jakija kažuć, što prablemy z techpašartam ci z čym‑niebudź jašče i ŭsio pačynajecca nanoŭ. U śniežni 2005 hodu nam užo vynosili papiaredžańni za hetaje samaje parušeńnie. Liču, što heta źviazanaje z chutkimi parlamenckimi vybarami. Pierad parlamenckimi vybarami 2004 hodu pa ŭsioj krainie zakryli sotni niedziaržaŭnych arhanizacyjaŭ, pierad letašniaj prezydenckaj kampanijaj pryniali papraŭki ŭ Kryminalny kodeks, ciapier pryjšła čarha za palityčnymi partyjami», – miarkuje Ŭładzimier Łabkovič.

Kiraŭnik spravaŭ BSDP (H) Anatol Sidarevič ličyć, što jahonaj partyi papiaredžańnie było vyniesienaje pamyłkova. «My atrymali aficyjny list ad Ministerstva justycyi, dzie havorycca, što na padstavie papiaredžańnia ad 29 listapadu 2005 hodu, nam vynosiać jašče adno paŭtornaje papiaredžańnie. Ale, prabačcie, za tuju datu my nie atrymlivali nijakich papiaredžańniaŭ ad Minjustu. Liču, što papiaredžańnie nakiravanaje nam nie pa adrasie. Tym bolš, što letaś my zarehistravali Haradzienskuju abłasnuju strukturu BSDP (H), jakaja stała čaćviertaj u krainie, jość taksama i mienskaja haradzkaja struktura, tamu nie razumieju, jakija pretenzii mohuć być da nas. Budziem źviartacca ŭ Minjust, kab nam rastłumačyli dadzienuju sytuacyju. Zdajecca, što nas prosta pierabłytali z BSDH Stanisłava Šuškieviča», – kaža Anatol Sidarevič. Nahadajem, što BSDP (H) sioleta ŭžo atrymlivała adno papiaredžańnie – ad 1 lutaha za praviadzieńnie arhkamitetu «Sajuzu levych partyj» za miežami Biełarusi.

Treba zaŭvažyć, što cisk na palityčnyja partyi za apošnija miesiacy staŭ ledź nia normaj. Viarchoŭny sud Biełarusi prypyniŭ na šeść miesiacaŭ dziejnaść PKB, bližejšymi dniami pačniecca razhlad analahičnych spravaŭ Biełaruskaj ekalahičnaj partyi BEZ i Biełaruskaj žanočaj partyi «Nadzieja». Taksama syn staršyni FPB Leanida Kozika Andrej sudzicca z Abjadnanaj hramadzianskaj partyjaj.

Nahadajem, kab likvidavać dziejnaść partyi ci jaje prypynić dastatkova ŭsiaho adnaho papiaredžańnia.

• 0
• 0
• 0
• 0
• 0
• 0
• 0
• 0