«Skažycie svaim rabotnikam, kab nie chvareli!»

11 lipienia było ŭviedziena ŭ dziejańnie novaje Pałažeńnie ab paradku zabieśpiačeńnia dapamohami pa časovaj niepracazdolnaści i pa ciažarnaści i rodach, zaćvierdžanaje pastanovaj Savieta Ministraŭ № 569 ad 28 červienia 2013 h.

Tut ža šmatlikija vydańni paśpiašalisia zrabić vysnovu: «ciapier, zmahajučysia z chvarobaj na vychadnych, taksama možna atrymać peŭnuju sumu». Ale ci ŭsio tak dobra, jak padajecca?

Novy raźlik

Z 11 lipienia za pieršyja 12 dzion dapamoha raźličvajecca ŭ pamiery 80% ad siaredniaha zarobku (raniej było — 6 dzion ŭ pamiery 80%, a nastupnyja — 100%). Dapamoha pa dohladzie za chvorym členam siamji, jak i raniej, raźličvajecca ŭ pamiery 100%. Ale sam raźlik siaredniaha zarobku istotna źmianiŭsia.

Raniej siaredni zarobak za dzień raźličvaŭsia za apošnija 2 miesiacy dzialeńniem dachodu za hety pieryjad na faktyčna adpracavanuju kolkaść dzion. Pry hetym užyvalisia pavyšajučyja kaeficyjenty, kali akład (taryf) u dadzieny pieryjad pavyšaŭsia. Ciapier ža siaredni zarobak raźličvajecca zychodziačy z zarobku za šeść (!) miesiacaŭ biez usialakich kaeficyjentaŭ.

Naprykład, kali vy chvareli ŭ lipieni, dla raźliku voźmiecca zarobak sa studzienia pa červień. Jaki ŭ vas zarobak byŭ u studzieni, pamiatajecie? Za hety pieryjad na našym pradpryjemstvie, naprykład, zarobak pavyšali niekalki razoŭ.

U krainie, dzie tolki aficyjnaja inflacyja dasiahaje 21% (za apošni hod), a pa nieaficyjnych źviestkach — bolej za 23% u hetym hodzie, uličvać zarobak za paŭhoda — heta prosta rabavańnie.

Pry hetym premii i inšyja vypłaty ŭklučajucca ŭ zarobak praparcyjanalna adpracavanym dniam u pieryjadzie. Na praktycy heta aznačaje, što, kali rabotnik adpracavaŭ nie poŭny miesiac (pa pryčynie niepracazdolnaści, znachodziŭsia ŭ vodpusku i inš.) jaho premija (užo i tak raźličanaja za niapoŭny miesiac) jašče raz raźličvajecca praparcyjanalna adpracavanamu času.

Tak, naprykład, rabotnik znachodziŭsia ŭ vodpusku 15 dzion, atrymaŭ akramia akłada premiju ŭ 400 tys. rub. Pry raźliku siaredniaha zarobku dla «balničnaha» buchhałtar voźmie akład dy nadbaŭki da jaho ŭ poŭnym pamiery, a premiju — u pamiery 200 tys. rub. (bo adpracavana tolki pałova miesiaca). Byŭ u vodpusku i adpracavaŭ 1/3 normy dzion — u raźlik voźmuć 1/3 premii i h.d.

Ci adpaviadaje heta jakoj­-niebudź łohicy, kali tolki nie žadaješ štučna źmienšyć siaredni zarobak?

Adnak sapraŭdy, dapamoha pa časovaj niepracazdolnaści ciapier raźličvajecca za kožny dzień chvaroby (kalandarnyja dni), a nie za dni pa hrafiku pracy rabotnika, jak raniej.

Tolki voś i siaredni zarobak pa novym raźliku atrymlivajecca značna mienšy, bo raźličvajecca ciapier dzialeńniem na kalandarnyja dni, a nie na adpracavanyja.

Takim čynam, kali, naprykład, žančyna za 14 dzion niepracazdolnaści pa dohladzie dziciaci da 14 hadoŭ raniej atrymała b kala 2 młn rub. dapamohi pry zarobku (razam z premijaj) kala 4 miljonaŭ rubloŭ, to siońnia jana atrymaje mienš za 1,4 młn rub.

Ilhotnikaŭ stała mienš

Novym dakumientam byli admienieny niekatoryja «lhotnyja» katehoryi rabotnikaŭ.

Tak, raniej kruhłyja siraty da 21 hod, baćki, jakija majuć troch i bolej dziaciej, a taksama asoby, u jakich vypadak niepracazdolnaści nastupiŭ padčas vykanańnia słužbovych abaviazkaŭ ci ratavańnia čužoha žyćcia, mieli prava na dapamohu ŭ pamiery 100% siaredniaha zarobku. Z 11 lipienia hetyja normy byli admienieny, i dadzienyja katehoryi hramadzian padpadajuć pad ahulny paradak — 80% za pieršyja 12 dzion.

Čuli pra dvuch mužčynaŭ, jakija vyratavali dziaŭčynku piaci hadoŭ i jaje maci na race Sož? Dyk voś navat im dapamoha bu­dzie vypłočvacca ŭ pamiery 80%. Mo «nie treba było leźci»?

Mahčyma, pryniali b i inšyja katehoryi rabotnikaŭ sa «stoadsotkavaj» dapamohaj («čaeśniki», vieterany bajavych dziejańniaŭ), ale dla hetaha treba było źmianić jašče i zakony («Ab vieteranach», «Ab sacyjalnaj abaronie hramadzian, paciarpiełych ad katastrofy na Čarnobylskaj AES, inšych radyjacyjnych avaryj»). Pałažeńniem — padzakonnym aktam — ich nie admieniš, tamu pakinuli tak.

Maładym śpiecyjalistam — ničoha

Što datyčyć rabotnikaŭ, jaki nie majuć pracoŭnaha stažu ci staž jakich mienšy za 6 miesiacaŭ (naprykład, maładyja śpiecyjalisty), to ich dapamoha raźličvajecca nie z zarobku, a z 50% najbolšaj vieličyni biudžetu pražytačnaha minimumu ŭ siarednim na dušu nasielnictva (u tak zvanym «minimalnym pamiery»), padzielenuju na kolkaść dzion u miesiacy dy pamnožanuju na kolkaść dzion niepracazdolnaści.

Tak, za 3 dni takija katehoryi rabotnikaŭ (niezaležna ad zarobku) u vieraśni atrymali pa 51 315 rubloŭ. Heta hrošy, jakich chopić chiba što na binty...

Čaściakom i rabotnikam, jakija majuć bolšy za 6 miesiacaŭ staž, ale apošnija paŭhoda mianiali miesca pracy, pryj­dziecca papabiehać, kab atrymać daviedku z Fonda sacyjalnyj abarony nasielnictva ab paćviardžeńni ŭpłaty za ich strachavych uznosaŭ. Pracedura heta, viadoma ž, marudnaja.

Što datyčyć ciažarnych žančyn, to novy paradak raźliku dapamohi pa ciažarnaści i rodach prymianiajecca ŭžo sa studzienia hetaha hoda ŭ suviazi z ustupleńniem u dziejańnie zakona «Ab dziaržaŭnych dapamohach siemjam, jakija vychoŭvajuć dziaciej».

I kali ŭličvać toje, što ich dapamoha naznačajecca nie na adzin tydzień i nie na dva, a na 126 dzion (ci na 140 — u «zonie»), to ich dapamohu ŭrezali adčuvalna: tak, pry akładzie 4,5 młn rub. našaja rabotnica atrymała letam dapamohu na 9 miljonaŭ mienšuju, čym kali b joj raźličvali pa­raniejšamu. Padtrymkaj maciarynstva dy dziacinstva takuju palityku nie nazavieš.

«Kasiaki»

Jak by doŭha dadzienaje Pałažeńnie ni raspracoŭvałasia (havorka pra jaho pryniaćcie išła jašče ŭ kancy minułaha hoda), a ŭsio ž atrymałasia syroje. Raspracoŭščyki nie pryniali ŭ raźlik šmatlikija sprečnyja momanty, sustrakajucca naturalnyja «kasiaki».

Kali rabotnik pracuje vachtavym mietadam, naprykład, za paŭmiesiaca (14 dzion) vypracoŭvaje miesiačnuju normu vyrabatki, za što i atrymlivaje poŭny zarobak, astatnija dni ŭ jaho vychadnyja. Raniej, kali jon zachvareje ŭ dni adpačynku, jany jamu nie apłočvalisia (bo niama pracoŭnych dzion pa hrafiku).

Adnak ciapier atrymlivajecca, što taki rabotnik za balničny atrymaje amal ŭ dva razy bolšy zarobak, čym zvyčajna. Oto ž pačnuć chvareć vachtaviki!

Darečy, praktyka pakazvaje, što chvareć na vychadnych bolš vyhadna, čym pa budniach, bo vychadnyja ciapier apłočvajucca, a raniej — nie. I ŭžo zusim niavyhadna — z paniadziełka pa piatnicu (pry piacidzionnym pracoŭnym tydni). A kali zachvareć u piatnicu, a ŭžo ŭ paniadziełak zakryć «balničny», to možna amal ničoha nie zhubić, u paraŭnańni z raniejšym raźlikam.

Našto heta było zroblena

Uvohule, atrymałasia tak, što pamier dapamohi ŭ siarednim źniziŭsia na 30­-40%, a to i bolš. Nie dziakujučy jakoj reformie ci aptymizacyi raschodaŭ, a prosta ŭviadzieńniem padzakonnaha narmatyŭnaha akta dziaržava zmahła skaracić svaje vydatki pa sacyjalnym strachavańni.

Zroblena heta było chitra! Nie kožny rabotnik, dyj nie kožny ekanamist raźbiarecca, jak raźličvać dapamohu pa niepracazdolnaści, i nichto nie pojdzie ŭ buchhałteryju zapytvacca, a jak ža heta paličana dy ci pravilna.

I ŭ kaho pytać, čamu ŭ sacyjalna aryjentavanaj dziaržavie sacyjalnaja dapamoha raptam nastolki źniziłasia? Usio zroblena biez šumu i pyłu, navat nivodnaha zakona nie mianiali. Raspracoŭščyki Pałažeńnia kivajuć na Rasiju, u jakoj pry raźliku dapamohi biarecca zarobak nie za 6 miesiacaŭ, a za 24.

Ale ž, pahadziciesia, pry hadavoj inflacyi 6-­7% heta možna sabie dazvolić. Dyj zarobki tam bolšyja.

Kaniečnie, jak pryznajucca pradstaŭniki Fonda sacyjalnaj abarony nasielnictva, dziaržavie hrošaj nie chapaje navat kab płacić piensii, bo heta ŭsio idzie z adnaho «katła». U suviazi z hetym čynoŭniki rajać tolki adno: «Skažycie svaim rabotnikam, kab nie chvareli!»

• 0
• 0
• 0
• 0
• 0
• 0
• 0
• 0