Pa kancentracyi handlovych centraŭ Minsk moža dahnać Paryž, Štuthart i Raterdam

Pa kancentracyi handlovych centraŭ Minsk moža zdahnać Paryž, Štuthart i Raterdam.

Jak paviedamiła namieśnik kiraŭnika kampanii «Tvaja stalica. Nieruchomaść dla biźniesu» Volha Siančuk, da kanca hetaha hoda ŭ Minsku pavinna być zdadziena ŭ ekspłuatacyju prykładna 130 tysiač kvadratnych mietraŭ płoščaŭ handlovych centraŭ — heta amal u try razy bolš, čym u 2013-m.

Pavodle słoŭ Siančuk, zaraz na tysiaču minčan prypadaje pryblizna 140 kv. m płoščaŭ u handlovych centrach, ale ŭžo da kanca hoda hety pakazčyk dasiahnie 200 kv. m. Takim čynam, pa kancentracyi handlovych centraŭ biełaruskaja stalica praktyčna stanie roŭnaja Paryžu, Štuthartu i Raterdamu. Pry hetym Minsk budzie ŭ čatyry raz adstavać ad Stakholma, Chielsinki, Talina, Vilni, Ryhi i Kapienhahiena — u hetych haradach na tysiaču žycharoŭ prypadaje 800-1.000 kv. m płoščaŭ handlovych centraŭ.

Najbujniejšyja handlovyja centry źjaviacca ŭ chutkim časie ŭ zachodniaj častcy horada — pobač z vulicaj Prytyckaha i praśpiektam Dziaržynskaha. Bujnyja abjekty adkryjucca taksama ŭ mikrarajonach, jakija raźvivajucca, u tym liku ŭ Kamiennaj Horcy.

U lutym hetaha hoda siaredniaja staŭka arendnaj płaty ŭ handlovych centrach Minska skłała 32 jeŭra za 1 kv. m, što na 4% nižej za studzieński ŭzrovień. Na takuju ž vieličyniu handlovyja pamiaškańni stali bolš dastupnymi i dla kupcoŭ: siaredniaja cana prapanovy ŭ lutym apuściłasia da 3 127 dołaraŭ za 1 kv. m.

«Ceny i arendnyja staŭki, jak i raniej, vyznačaje ŭdałaje raźmiaščeńnie ŭ prachadnym miescy, jakoje ŭjaŭlaje cikavaść dla metavaj aŭdytoryi handlovaha apieratara», — prakamientavała Siančuk.

Najbolšuju cikavaść dla kupli ŭjaŭlajuć płoščy ad 150 da 300 kv. m, tady jak dla arendy — pamiaškańni pamieram da 100 kv. m.

«Što da vialikich pamiaškańniaŭ (zvyš 300 kv. m), to tut situacyja dastatkova supiarečlivaja. Nibyta b apierataraŭ niecharčovaj hrupy tavaraŭ, jakija zacikaŭleny ŭ takich płoščach, niašmat, ale popyt zvyčajna zastajecca niezadavolenym. Na žal, čakańni ŭładalnikaŭ pamiaškańniaŭ i handlovych apierataraŭ nie zaŭsiody supadajuć, a handlovyja abjekty, jakija z samaha pačatku dobra pazicyjanavalisia, stanoviacca załožnikami realizavanaj kancepcyi i kiraŭnickich pralikaŭ», — zaŭvažyła namieśnik kiraŭnika kampanii «Tvaja stalica. Nieruchomaść dla biźniesu».

• 0
• 0
• 0
• 0
• 0
• 0
• 0
• 0