«Moj asabisty prykład pavinien pierakanać Alaksandra Łukašenku, što sumlennaja pieramoha i padtrymka ŭsiaho śvietu — heta toje, da čaho varta imknucca», — zajaviŭ Piotr Parašenka 26 maja na pres-kanfierencyi ŭ Kijevie, adkazvajučy na pytańnie BiełaPAN pra pieravahi demakratyčnaha šlachu źmieny ŭłady.
Pavodle słoŭ Parašenki, u jaho z Alaksandram Łukašenkam «dosyć daŭnija i dobryja adnosiny». «Ja liču, toj fakt, što my ŭ svoj čas znajšli kampramis pa pytańni dziaržaŭnaj miažy, što my efiektyŭna vyjšli z handlova-ekanamičnaha supraćstajańnia, jakoje supravadžała ŭkraina-biełaruskija adnosiny doŭhi čas, pakazvaje, što my ŭmiejem znachodzić kampramisy ŭ składanych situacyjach», — skazaŭ palityk, jaki nabraŭ bolšaść hałasoŭ vybarščykaŭ na pazačarhovych prezidenckich vybarach va Ukrainie.
Hałoŭnaj matyvacyjaj dla raźvićcia demakratyi ŭ Biełarusi Parašenka bačyć udzieł krainy ŭ inicyjatyvie Jeŭrasajuza «Uschodniaje partniorstva».
«Mahu skazać, što kali b naša revalucyja nie pieramahła, to prahrama «Uschodniaje partniorstva» była b niaŭdačaj Jeŭrasajuza, — skazaŭ Parašenka. — Pierakanany, što paśla pieramohi, u tym liku i paśla majoj pieramohi na prezidenckich vybarach, adkryvajucca zusim novyja pierśpiektyvy nie tolki pierad Ukrainaj. My siońnia možam havaryć užo pra zusim zrazumiełuju i vyraznuju pazicyju Małdovy, Hruzii, Ukrainy».
Parašenka «absalutna pierakanany» ŭ tym, što Biełaruś pavinna skarystacca ŭsimi pieravahami Uschodniaha partniorstva.
«ES prapanuje Biełarusi šerah prahram, jakija supravadžajuć Uschodniaje partniorstva i nie supiarečać źniešniepalityčnaj pazicyi Alaksandra Ryhoraviča. — adznačyŭ Parašenka. — A toje, što treba siońnia rabić źmieny ŭ bok demakratyi, absalutna vidavočna. My nie hublajem nadzieju supracoŭničać ź Biełaruśsiu pa hetym kirunku».
Kamientary