Usievaład Ścieburaka. Biełaruski Fejsbuk u typažach

Padletak

Typaž u FB vielmi raspaŭsiudžany. Prykmiety: skrajniemaksymalistyčnyja vykazvańni na vuzkazadadzienuju temu, admaŭleńnie inšych mierkavańniaŭ i vopytu čałaviectva jak takoha. Usie teksty pieranasyčanyja «Ja», jakoje źjaŭlajecca alfaju i amiehaj ŭsich pasyłaŭ. Zvyčajna absalutna ŭpeŭnieny ŭ svaich viedach pa luboj temie, chacia akramia šerańkaha VNU ź niaŭciamnaj specyjalnaściu nijakaj adukacyi niama. Zatoje prasočvajecca vielmi šmat adsyłak da kolišnich stračanych mahčymaściaŭ – «kali b ja ŭ svoj čas zachacieŭ, to staŭ by kasmanaŭtam, muzykam» i h.d.

Paziorstva, praźmiernaja kolkaść kompleksaŭ, jakija nia tolki nie źnikajuć, ale i, naadvarot, stanoviacca z časam usie bolš vidavočnymi dla ŭsich, akramia samoha ich uładalnika. U movie praźmierna prysutničaje trasianka, słenh i inšyja moŭnyja vyčvareńni, jakija vykarystoŭvajucca znarok, kab za štučnaj niepasrednaściu schavać chvaravityja i ekzaltavanyja pačućci. 

Kruh cikavaściaŭ nie vyznačajecca, bo vidavočnych, akramia kamputara (siadzieńnia ŭ inecie) znajści niemahčyma. Rod zaniatkaŭ taki, jak koła cikavaściaŭ – chz. To bok, moža mianiacca čaściej, čym avatarka. Poł – prykładna 50/50. Palityčnyja pohlady – radykalnyja, ci to «zialony» ci to «nacboł». Łajkaje na ŭsialaki vypadak usio! Časta złujecca, rasfrendžvaje na raz.

Sirata-niazdara

Nieadjemny ŭ biełsehmencie FB piersanaž. Najčaściej mužčynskaha połu. Prykmiety: — nośbit ciažkoj naślednaj rysy nacyjanalnaha mientalitetu – «siroctva». (hł. Symon-muzyka» i inšyja niahiehłyja žałaślivyja syny i dočki našaj matuchny Biełarusi). Kłasičnyja adnosiny da takoha – «abniać i płakać». 

U tekstach, jak markiery, sustrakajucca: – «ech, biedny ja, niaščasny», «vo ludzi žyvuć», «zažralisia», «a ja na mora ni pajedu», «danošvaju apošnija džynsy», «panabudavali sabie pałacaŭ», «adkul u jaho taki samachod», «dapamažycie źniać kvateru i tak kab biaspłatna». Moža być čułym i dušeŭnym, ale najpierš u adnosinach da siabie. Pravakuje na spačuvańnie i spahadu. Fota lepš nie hladzieć, bo navat vočy kata ź filma «Šrek» padaducca ŭ paraŭnańni ź jahonymi złymi i suvorymi.

Schilny dehradavać, bo praz praźmiernuju škadobu da siabie nia moža nidzie i ničoha rabić (i zarabić). Klikać na piva/kino/biljard/futboł/šopinh i h.d. biezsensoŭna (chiba za svaje hrošy). Inakš sustreča pieratvorycaa ŭ razmovu pra jahonuju biednaść. Pohlady – libieralna-amorfnyja. Łajkaje ŭsio žałasnaje i lubić smajliki sa ślozkaj.

Kałhaśnik

Sustrakajecca nadzvyčaj rehularna, niahledziačy na vysoki ŭzrovień urbanizacyi ŭ krainie. Prykmiety: — padśviadomaja nieluboŭ da ŭsiaho jakasnaha i parodystaha. Nieprychavanaje žadańnie vykryć chiby va ŭsich i va ŭsim. Nosić virtualny brud pad paznohciami i lubić upiknuć tych, chto robić manikiur. Nieachajny. Ličyć heta za honar, bo «vajavaŭ i maje prava». Palityčnyja pohlady šyrokija – ad kamunistyčnych da manarchičnych. Biełaruskaje lubić da śloz – ale admaŭlaje ŭ pravie na takuju luboŭ inšym, tym chto «haradski», «zaduža razumny» i h.d. Lubić paŭpirać na blizkaść da ziamli i pracy, chacia sam daŭno jeździć «na viesku» tolki za torbaj ježy. Krytukujučy ŭładu, abaviazkova adździalaje «charošaje»: tak, palitviaźni! – ale, jaki chakiej dali Jeŭropie!» Jasna — nosić škarpetki sa šlopkami i pościć svaje kancaviny ŭ FB ź luboha miesca, dzie byvaje. Poł – 50/50. Kryŭdlivy i pomślivy, lubić panibractva i plotki pra virtualnych i nia vielmi siabroŭ.

Virtualny Če

Nieadjemny typaž sacsietak. Fota ci adsutničaje (zamiest jaho vaŭki, pahoni, miačy i zbroja) ci na im zaciahnuty ŭ dubovy dvubortny pidžak dziadźka. Praca ci schavanaja, ci skaročanaja ŭ takuju niezrazumiełuju nikomu sumniŭnuju NDAšnuju abryvijaturu, što jaje nia moža patłumačyć nichto, aproč samoha Če. 

Pasty hłybokija, surjoznyja, hnieŭnyja i nastolki adnolkavyja, što nia maje sensu zasiarodžvacca na ich źmieście – zaŭtra budzie novy. Mova padkrieślena pravilnaja. Na zdymkach niama dziaciej, kacianiataŭ, pjanak z šašłykami. Če viadzie zdarovy ład žyćcia, maje takich samych siabroŭ i ideju za jakiu abaviazkova składzie hałavu, jak tolki vierniecca z Varšavy (Čykaha, Łondanu i h.d.) Zaśmiečvaje stužku pierapostami z surjoznych resursaŭ, kudy sam i piša pad inšym pseŭdanimam. Łajkaŭ stavić mała, u asnoŭnym pad kamientarami da svajho pasta. Časta nieprychavany erataman, bo pobač z vytrymkami z dakładu pradstaŭnika PASIE vykładaje madelku z cyckami apošniaha pamieru. Padkreśleny mačo, chacia sočyć za saboj mała i na pasolskich pryjemach jeść usio rukami.

Nasiedka (maci-hierainia)

Šyraka raspaŭsiudžanaja jak u ruskamoŭnym, tak biełaruskamoŭnm sehmentach Inetaŭ. Prykmiety: usie paviedamleńni — jak vytrymki z knihi «O vkusnoj i zdorovoj piŝie» — źmiest vuzkaprykładny, nazidalny i ślinavydzialalny. Pasył – «Hlańcie, jakaja ja haspadynia! I dranički dziaru, i piečyva piaku, i katletki smažu! A na jakich patelniach, a jakija talerački! A abrus!!!? – sama vyšyła!» Tut ža dadajucca padrabiaznaści viadzieńnia chatniaj haspadarki, adnosinaŭ sa svajakami muža, a taksama adkaznaść u vykanańni supružnich abaviazkaŭ. Samo pa sabie heta było b davoli biasškodna, kali b usio nie padmacoŭvałasia repartažami z žyćcia dziaciej (niemaŭlataŭ) – pryčym z maksymalnymi fizyjałahičnymi padrabiaznaściami: — «Oj, hlańcie, što my adryhnuli pa abiedzie!» «A jaki ŭ nas zubik vypaŭ!», «A ŭ vašaha hadavanca taksama voś takoha koleru kakuli paśla bulbianoha piure?» Pry svajej vonkavaj dobrazyčlivaści nasiedka histeryčna i złosna moža svarycca z usimi, chto nie acenić vyšej padadzienyja cudy. Siabruje pa-sapraŭdnamu tolki z takimi ž persanažami jak i sama, paśmiejvajecca z tych, chto biehaje z ranicy i kačaje pres (a pa praŭdzie — zajzdrości). Z zadavalnieńniem pałajkaje fotki simpatyčnych mužčynaŭ, miž inšym adznačyŭšy, što kaniešnie lepš za jaje muža nikoha niama ŭ śviecie. Abaviazkova paviesić na vašuju ścianu samuju kandovuju paštoŭku z bukietam ružaŭ na Dzień naradžeńnia, pryčym pieršaj – a 7-aj ranicy, bo jak sapraŭdnaja haspadynia padymajecca z soniejkam.

Vieteran

Nieadjemny i ŭsiudyisny zaŭsiodnik FB. Prykmiety: usio viedaje, usich bačyć naskroź, byŭ kaardynataram (siabram, čalcom) usich partyj, ruchaŭ, supołak, kampanij. Jaho nielha ździvić, spałochać, naśmiašyć, paradavać. Možna tolki paciešyć jaho samalubstva spasyłkami na jaho słovy (mierkavańnie, aŭtarytet i vopyt). Piša časta, zdarajecca što cikava i źmiastoŭna, ale najčaściej usio z tym ža pasyłam nievynosnaj lohkaści byćcia. Lubić paćvialić virtualnych zmaharoŭ. Čytaje naŭskoś, a pa-sapraŭdnamu — tolki takich samych byvałych veteranaŭ. Nie sočyć za čužymi dniami naradžeńnia, žyćciovymi zdareńniami, nie kamientuje fotki, zatoje pamiataje pra daty ŭ historyi, uhodki śmierci dy inšyja padobnyja padziei. Na 90% — mužyki, ale byvajuć i pani.

Śvieckaja ilvica

Žanočy typaž. Prykmiety: — pijar i samapijar va ŭsich jaho prajavach. Pra što b nie byŭ post, hałoŭnym jaho źmiestam źjaŭlajecca asoba aŭtara (biezumoŭna, u novym stroi). U paviedamleńniach: spravazdačy pra pajezdki ŭ zamiežža, udzieł u tusoŭkach, kancertach, vystavach, znajomstva z zorkami, prysutnaść na adkryćciach novych kramaŭ, restaracyjaŭ i h.d. Asablivym šykam ličycca prysutnaść na zakrytych dla prostych śmiertnych imprezach – tut patas ilvicy moža raskrycca napoŭnicu. Pry adsutnaści padziejaŭ ilvica źnikaje sa stužki i nudzicca ŭ čakańni novych zvyšvažnych padziejaŭ. Sama pa sabie ilvica nie ŭjaŭlaje niebiaśpieki, ale kali jana spałučaje ŭ sabie rysy Če, to karcina stanovicca značna bolš surjeznaj…

• 0
• 0
• 0
• 0
• 0
• 0
• 0
• 0