Eks-śpikier Kanaploŭ aštrafavany na 135 młn, były namieśnik hienprakurora Archipaŭ atrymaŭ 6 hadoŭ
U Minsku vynieśli prysudy vysokim čynoŭnikam.
Uładzimir Kanaploŭ pryjšoŭ pieršym. U kaściumie. Jon zrabiŭ telefonny zvanok. «U nas siońnia apošni dzień. Budźcie hatovy da ažyjatažu», — papiaredžvaŭ kahości pra žurnalistaŭ, što čakali ŭ sudzie. Były namieśnik hienprakurora Archipaŭ pryjšoŭ z padrychtavanym pakietam: vyhladaje, što čakaŭ surovaha pakarańnia.
— Jak prajšoŭ sud? — spytalisia žurnalisty ŭ Kanaplova pierad pačatkam pasiadžeńnia.
Uładzimir Kanaploŭ: Usio było biezdakorna.
— Vy siabie pryznali vinavatym?
UK: Kaniečnie.
— Jakoha čakajecie pakarańnia?
UK: Jakoje sud vyniesie, takoje i budzie. Vy ŭjavicie, siadzieć na łavie padsudnych, kali zbornaja vyjhraje. Pryjemna, tak? — skazaŭ Kanaploŭ pra pieramohu mužčynskaj handbolnaj zbornaj Biełarusi na vychadnych.
— Vy možacie skazać, što heta Vaša zasłuha?
UK: Heta supolnaja zasłuha, u tym liku i maja. Vy mnie zadajacie pytańni… Adrazu bačna, što vy ad sportu dalokija. Chto ŭ sporcie raźbirajecca, takija pytańni nie zadaje: i tak viedajuć, chu is chu», — u Kanaplova, darečy, «pieršy razrad pa handbole».
«Biez kamientaroŭ», — Archipaŭ admoviŭsia pra niešta havaryć.
Abodvuch pryznali vinavatymi.
«Archipava ŭ naŭmysnym, nasupierak intaresam słužby, ździajśnieńni słužbovaj asobaj, z karyślivaj albo inšaj asabistaj zacikaŭlenaści dziejańniaŭ z vykarystańniem svaich słužbovych paŭnamoctvaŭ, što paciahnuła naniasieńnie značnaj škody dziaržaŭnym intaresam, ździejśnienaje słužbovaj asobaj, što zajmaje adkaznaje stanovišča». A taksama ŭ atrymańni chabaru.
Archipava pryhavaryli da 6 hadoŭ kałonii ŭzmocnienaha režymu z kanfiskacyjaj majomaści, z pazbaŭleńniem prava zajmać pasady, źviazanyja z vykanańniem arhanizacyjna-rasparadčych abaviazkaŭ, na 5 hadoŭ. Taksama pazbavili zvańnia dziaržaŭnaha savietnika justycyi 3 kłasa. U jaho kanfiskujuć «Škodu» 2010 hoda vypusku, a taksama majomaść, ukazanuju ŭ pratakole vopisu ad 20 studzienia 2014 (padrabiazna nie začytvałasia). Załaty źlitak, jaki pieradali Archipavu ŭ jakaści chabaru, taksama kanfiskujuć. Jon, miž inšym, važyć 20 hram.
«Kanaplova — u niedaniasieńni pra dakładna viadomaje ździejśnienaje asabliva ciažkaje złačynstva i dakładna viadomuju asobu, jakaja ździejśniła złačynstva».
Aštrafavali jaho na 900 bazavych vieličyń — 135 miljonaŭ rubloŭ. Vypłacić takuju sumu jon musić ciaham miesiaca. U vypadku niaspłaty jaho mohuć pryciahnuć da kryminalnaj adkaznaści. «A raściahnuć na niekalki miesiacaŭ nielha?» — zapytaŭsia Kanaploŭ u sudździ. «Heta pytańni ŭ paradku vykanańnia. Nie ciapier».
Archipava adrazu ž uziali pad vartu. Pakul jon budzie ŭtrymlivacca ŭ SIZA №1 Minska.
Kanaploŭ vyjšaŭ z zały ŭ supravadžeńni advakata. Ad kamientaroŭ admoviŭsia. Kanaploŭ utrymlivaŭsia pad padpiskaj ab niavyjeździe i naležnych pavodzinach.
Na sudzie vyśvietliłasia, što Archipaŭ aryštoŭvaŭsia jašče letaś: prabyŭ u izalatary z 12 pa 29 listapada 2013. Kanaploŭ taksama byŭ pad vartaj — z 18 pa 26 listapada. Eks-śpikier parłamienta, miž inšym, ciapier źjaŭlajecca indyvidualnym pradprymalnikam.
Hetaja sprava maksimalna zamoŭčvałasia ad pačatku. Fihuravaŭ ža ŭ joj čałaviek, jaki sam pavinien byŭ sačyć za zakonnaściu — namieśnik hienieralnaha prakurora Alaksandr Archipaŭ. Spačatku pra jaje paviedamiŭ Łukašenka ŭ listapadzie 2013. «Družki tam jaho ŭciahnuli ŭ hetuju afieru, čałavieka zabili, pjany kiroŭca. Niavažna, jakija ŭ ich tam byli adnosiny, ale čałaviek zahinuŭ. Ujavicie, jak reahuje na heta siamja. Z dapamohaj ułady hetuju spravu zamiali. Dzie spraviadlivaść? Tamu prakantralujcie, jakija robiacca zachady».
Archipava zvolnili, pačałosia rasśledavańnie. Spravu zaviali za złoŭžyvańnie ŭładaj albo słužbovymi paŭnamoctvami. Praŭda, Hienprakuratura nie śpiašałasia raskazvać pra akaličnaści. I tolki ŭ krasaviku Łukašenka raskazaŭ niekatoryja padrabiaznaści. Za pasłuhi čynoŭniku pieradali źlitak zołata i butelku kańjaku.
Sud prachodziŭ u zakrytym režymie. Da abvinavačańnia Archipavu dadaŭsia jašče i atrymańnie chabaru. Praŭda, vyśvietliłasia, što pa hetaj spravie prachodzić jašče i były śpikier parłamienta, a ciapier straršynia fiederacyi handboła Uładzimir Kanaploŭ. Jaho sudzili za niedaniasieńnie ab złačynstvie. Abodva nie znachodzilisia pad vartaj.
Žurnalistam dazvolili prysutničać na vyniasieńni prysudu.
Kamientary