Zabiaśpiečyć doŭhaterminovuju stabilnaść cen i valutnaha kursu možna pry dapamozie dvuch varyjantaŭ realizacyi hrašova-kredytnaj palityki.
Takoje mierkavańnie vykazaŭ pamočnik prezidenta pa ekanamičnych pytańniach Kirył Rudy padčas tradycyjnaj mižnarodnaj navukovaj kanfierencyi ŭ Minsku. Jaho vystupleńnie apublikavanaje ŭ śniežańskim numary «Ekonomičieskoho biulletienia» NDEI Minekanomiki.
Na dumku pamočnika prezidenta, zabiaśpiečyć doŭhaterminovuju stabilnaść cen i valutnaha kursu možna pry dapamozie ŭpłyvu na ceny praz kurs i na ceny i kurs praz hrašovuju masu.
«Varyjant pieršy — fiksacyja valutnaha kursu.
Vopyt u halinie žorstkaj fiksacyi kursu majuć Bałharyja, Hankonh, Litva i Estonija. Sutnaść jaje ŭ tym, što praz zakanadaŭstva hrašovaja masa pryviazvajecca da valutnych reziervaŭ i fiksujecca kurs», — kanstatavaŭ Rudy.
Emisija pry takim varyjancie, rastłumačyŭ jon, ažyćciaŭlajecca tolki šlacham kupli Nacbankam valuty, heta značyć nacyjanalnaja valuta prychodzić u ekanomiku ŭ miežach pastupleńniaŭ zamiežnaj valuty ad ekspartu i źniešnich inviestycyj.
«Pieravahi fiksacyi valutnaha kursu ŭ nastupnym: jana abumoŭlivaje inflacyju mienšuju za 10%, źnižeńnie devalvacyjnych i inflacyjnych čakańniaŭ, rost davieru da nacyjanalnaj valuty, pavieličeńnie bankaŭskich źbieražeńniaŭ i padzieńnie pracentnych stavak, rost valutnych reziervaŭ», — adznačyŭ Rudy.
Niedachopy takoha varyjanta hrašova-kredytnaj palityki, ličyć pamočnik prezidenta, zaklučajucca ŭ tym, što «Nacbank nie moža kredytavać banki; tarmozicca realizacyja dziaržprahram; nie zabiaśpiečvajecca rynkavaje pieraraźmierkavańnie resursaŭ; źjaŭlajucca nieefiektyŭnyja arhanizacyi».
Druhi varyjant zabieśpiačeńnia stabilnaści cen i valutnaha kursu, adznačaje Rudy, — fiksacyja rostu hrašovaj masy.
Pry takim scenaryi, rastłumačyŭ pamočnik prezidenta, Nacbank ustanaŭlivaje miažu pavieličeńnia hrašovaj masy, davodzić paramietry da bankaŭ pa kredytavańni ekanomiki i kantraluje ich vykanańnie.
Pieravahi hetaha varyjanta zaklučajucca ŭ tym, što jon dazvalaje zaviaršyć šerah starych dziaržprahram i padtrymać umierany rost ekanomiki, miarkuje Rudy.
«Niedachopy nastupnyja: inflacyja 10—15%, časovyja devalvacyjnyja i inflacyjnyja čakańni. Viadoma, abodva varyjanty majuć svaje niedachopy, ale horšaje dla doŭhaterminovaha rehulavańnia — nie rabić ničoha», — pierakanany Kirył Rudy.
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club4
Kamientary