Ułady pastarajucca daražej pradać reformy kredytoram

Biełaruskaja delehacyja na hetym tydni adpravicca na viasnovuju siesiju Mižnarodnaha valutnaha fondu, kab abmierkavać z kredytorami pierśpiektyvy supracoŭnictva. Pavodle infarmacyi BiełaPAN, ułady paviazuć u Vašynhton «darožnuju kartu», jakaja praduhledžvaje strukturnaje refarmavańnie biełaruskaj ekanomiki. Praduhledžanyja miery ŭ vypadku realizacyi mohuć istotna źmianić abličča ekanamičnaj madeli Biełarusi.

Šlach da rynkavaj ekanomiki: aficyjnaja viersija

Da viesnavoj siesii fondu biełaruskija ŭłady rychtavalisia hruntoŭna. Raspracoŭkaj pakieta reformaŭ, jakija buduć abmiarkoŭvacca ŭ Vašynhtonie, ekanamičnyja viedamstvy ŭzmocniena zajmalisia ŭ pieršym kvartale 2015 hoda.

U vyniku atrymałasia «darožnaja karta» pa strukturnym refarmavańni ekanomiki. Dakumient maje realna kompleksny charaktar, źmiaščaje dziasiatki punktaŭ i ŭklučaje miery, skiravanyja jak na stvareńnie ekanamičnych umoŭ dla refarmavańnia ekanomiki, tak i na sami reformy.

Pavodle infarmacyi BiełaPAN, zhodna z umovami «darožnaj karty» Biełaruś budzie prymać miery pa zabieśpiačeńniu makraekanamičnaj stabilnaści, u tym liku za košt miechanizmaŭ žorstkaj hrašova-kredytnaj i biudžetna-padatkovaj palityki.

Što tyčycca kankretnych krokaŭ pa refarmavańni ekanomiki, to klučavaja ŭvaha ŭ «darožnaj karcie» zasiarodžana na mierach pa pierahladzie miechanizmu finansavańnia ekanomiki. U pryvatnaści, miarkujecca, što ŭ Prahramu sacyjalna-ekanamičnaha raźvićcia na 2016-2020 hh. budzie ŭklučany metavy pakazčyk, jaki praduhledžvaje paetapnaje skaračeńnie abjomaŭ dyrektyŭnaha kredytavańnia ekanomiki ŭ ramkach finansavańnia dziaržprahram.

Darečy, pa dadzienych Mižnarodnaha valutnaha fondu, prykładna pałova kredytnaha partfiela biełaruskich bankaŭ siońnia prypadaje na kredyty, jakija vydavalisia ŭ ramkach dziaržaŭnych prahram. Adpaviedna, skaračeńnie abjomu finansavańnia dziaržprahram aznačaje, što kredyty buduć pradastaŭlacca tolki na rynkavych umovach. A heta zusim inšyja ŭmovy dla biełaruskich dziaržpradpryjemstvaŭ, jakija zvyklisia za mnohija hady da ilhotnym finansavańnia.

U «darožnaj karcie», jakaja budzie pradstaŭlena Mižnarodnamu valutnamu fondu, taksama praduhledžvajecca, što ŭ Biełarusi budzie ŭzmocnienaja sacyjalnaja padtrymka nasielnictva. Havorka, u pryvatnaści, idzie ab pavieličeńni pamieru dapamohi pa biespracoŭi da ŭzroŭniu minimalnaj zarabotnaj płaty.

Pavyšeńnie ŭzroŭniu sacyjalnaj abarony — całkam łahičnaja miera, uličvajučy płanavanaje paetapnaje skaračeńnie abjomaŭ finansavańnia ŭ ramkach dziaržprahram. Admova ad praktyki masavaj vydačy ilhotnych kredytaŭ pradpryjemstvam užo ŭ 2015 hodzie pryviała da parušeńnia terminaŭ vypłaty zarobkaŭ. Ci toje jašče budzie, kali ŭrad praciahnie ŭciskać abjom resursaŭ, što vydatkoŭvajucca ŭ ramkach dziaržprahram.

Varta adznačyć, što «darožnaja karta» pa strukturnym refarmavańni ekanomiki taksama praduhledžvaje miery pa restrukturyzacyi bujnych dziaržpradpryjemstvaŭ i pryvatyzacyi małych i siarednich arhanizacyj.

U vypadku restrukturyzacyi havorka idzie ab adčužeńni niaprofilnych aktyvaŭ, vyklučeńni małaefiektyŭnych kirunkaŭ dziejnaści, aptymizacyi zaniataści.

Uvohule, kali reziumavać, to «darožnaja karta» pa strukturnym refarmavańni ekanomiki, jakuju ŭłady majuć namier abmiarkoŭvać u Vašynhtonie ź Mižnarodnym valutnym fondam, skiravanaja na pavyšeńnie efiektyŭnaści biełaruskich pradpryjemstvaŭ i šyrokaje ŭkaranieńnie miechanizmaŭ, ułaścivych rynkavaj ekanomicy.

Miač na biełaruskim baku

Miarkujučy pa aficyjnych zajavach, padtrymku biełaruskim uładam u častcy padrychtoŭki «darožnaj karty» akazvali źniešnija kansultanty.

«My vitajem uzvažany i indyvidualny padychod da analizu ekanamičnaj situacyi ŭ našaj krainie i ŭdziačnyja Suśvietnamu banka pa dapamohu ŭ raspracoŭcy «darožnych kart» dla strukturnych reformaŭ», — zajaŭlaŭ premjer-ministr Andrej Kabiakoŭ, sustrakajučysia ŭ pačatku krasavika z pradstaŭnikami banka.

Z ulikam taho, što biełaruskija ŭłady rychtavali prahramu reformaŭ sumiesna z zamiežnymi kansultantami, płan dziejańniaŭ pa strukturnamu refarmavańni ekanomiki atrymaŭsia kompleksny.

Na dumku biełaruskich ekanamistaŭ, miery, paznačanyja vyšej, mohuć być padtrymany Mižnarodnym valutnym fondam i stać asnovaj dla pieramovaŭ ab novaj kredytnaj prahramie.

«Miač na baku biełaruskich uładaŭ. Kali jany dakažuć kredytoram, što hatovyja pravodzić reformy, vialikich prablem z zaklučeńniem novaj kredytnaj prahramy nie budzie», — ličyć ekanamist Biełaruskaha ekanamičnaha daśledča-adukacyjnaha centra (BEROC) Źmicier Kruk.

Na dumku ekśpierta, uličvajučy, što ŭ ramkach minułaj kredytnaj prahramy z MVF (u 2009—2010 hh.) značnaha prahresu ŭ častcy strukturnaj pierabudovy ekanomiki dasiahnuta nie było, fond moža zadać vyraznyja paramietry pradastaŭleńnia finansavych resursaŭ i ŭ zaležnaści ad vykanańnia pakazčykaŭ prymać rašeńnie ab vydzialeńni hrošaj.

«Standartnaja pracedura fondu maje na ŭvazie paetapnaje vyłučeńnie finansavych resursaŭ — tranšami. Hetuju praktyku MVF vykarystoŭvaje rehularna, i ŭ dačynieńni da Biełarusi jana, biezumoŭna, budzie ŭžytaja», — kanstatuje Źmicier Kruk.

Analityki finansavaha rynku adznačajuć, što Biełaruś siońnia maje mocnuju patrebu ŭ kredytnych resursach MVF.

«U biahučym hodzie ŭ Biełarusi dastatkova vysokaja patreba ŭ kredytnych resursach. Nieabchodna vykonvać zamiežnyja dziaržaŭnyja abaviazalnictvy. Kab u štatnym režymie pahašać daŭhi, novyja pazyki nieabchodnyja», — kanstatuje finansavy analityk daśledčaj hrupy BusinessForecast.by Alaksandr Mucha.

Vysokaja patreba ŭ pazykach, dadaje jon, abumoŭlena ŭ tym liku tym, što niedaŭhavyja krynicy pahašeńnia dziarždoŭhu abmiežavanyja.

Sprava ŭ tym, što pastupleńni ad vyvaznych pošlin na naftapradukty ŭ biahučym hodzie, pavodle acenak Minfina, składuć prykładna na 1 młrd dalaraŭ mienš zapłanavanaha ŭzroŭniu. Ź inšaha boku, ekspartnaja vyručka Biełarusi ŭ pieršyja miesiacy 2015 źniziłasia na čverć, što pamienšyła prapanovu zamiežnaj valuty na ŭnutranym rynku i źniziła mahčymaści dla pavieličeńnia zołatavalutnych reziervaŭ.

Na hetym fonie novy kredyt MVF Biełarusi vielmi b spatrebiŭsia.

«Fond pradastaŭlaje finansavyja resursy na vyhadnych umovach — pad nizki pracent. Ź inšaha boku, kredytnaja prahrama z fondam — stanoŭčy sihnał dla inviestaraŭ, bo ŭsie ŭśviedamlajuć, što, pryciahvajučy resursy fondu, kraina biare na siabie šerah abaviazacielstvaŭ pa zabieśpiačeńni makraekanamičnaj stabilnaści», — kanstatuje ekanamist Kaciaryna Barnukova.

Na dumku ekśpierta, situacyja apošnich hadoŭ u biełaruskaj ekanomicy prymušaje ŭłady ruchacca ŭ bok refarmavańnia ekanomiki.

«U 2009 hodzie, kali pačynałasia papiaredniaja prahrama z MVF, ułady ŭsprymali kryzis jak časovuju źjavu, źviazanuju ź niespryjalnymi pracesami ŭ hłabalnaj ekanomicy. Siońnia va ŭładaŭ isnuje razumieńnie, što stahnacyja apošnich troch hadoŭ nievypadkovaja, i z hetym niešta treba rabić», — ličyć Barnukova.

Inšaja sprava, dadaje ekanamist, pohlady MVF i biełaruskich uładaŭ na maštaby reformaŭ mohuć razychodzicca. Tamu, kab pierakanacca ŭ tym, što reformy buduć pravodzicca ŭ naležnym abjomie, fond zachoča atrymać adpaviednyja harantyi biełaruskaha kiraŭnictva, reziumavała Kaciaryna Barnukova.

U niadaŭnim intervju Bloomberg Alaksandr Łukašenka zajaviŭ, što «my całkam hatovyja da reformaŭ» i dadaŭ: «Toje, što ad nas patrabuje MVF, heta nie navina, heta absalutna pravilna».

Kab słovy nie razychodzilisia sa spravami, fond napeŭna budzie patrabavać pastavić pad dakumientami ab refarmavańni ekanomiki podpisy vyšejšych słužbovych asobaŭ Biełarusi i hierbavuju piačatku. I tolki potym, kali adkaznaść za reformy voźmie ŭsia viertykal ułady, fond pačnie vydavać Biełarusi hrošy. Tranšami…

• 0
• 0
• 0
• 0
• 0
• 0
• 0
• 0