Staršynia Kitajskaj Narodnaj Respubliki Si Czińpin naviedaje Biełaruś 10—12 maja ź dziaržaŭnym vizitam — pieršym za apošnija 14 hadoŭ.
U Minsk kitajski kiraŭnik prybudzie z Maskvy, dzie jon prysutničaŭ na ŭračystaściach z nahody 70-hodździa Pieramohi ŭ Vialikaj Ajčynnaj vajnie. U rasijskaj stalicy Si Czińpin užo sustrakaŭsia z Alaksandram Łukašenkam, jaki 7—8 maja naviedaŭ Maskvu dla ŭdziełu ŭ niefarmalnym samicie SND i pasiadžeńni Vyšejšaha Jeŭrazijskaha ekanamičnaha savieta.
Pavodle infarmacyi pres-słužby biełaruskaha prezidenta, sustreča staršyni KNR z Alaksandram Łukašenkam ŭ miežach vizitu ŭ Biełaruś adbudziecca siońnia ŭ Pałacy Niezaležnaści. 11 maja ŭ minskaj haścinicy «Piekin» z udziełam Si Czińpina adkryjecca biełaruska-kitajski ekanamičny forum. U toj ža dzień kiraŭnik KNR naviedaje Muziej historyi Vialikaj Ajčynnaj vajny, a 12 maja adpravicca ŭ Smalavicki rajon Minskaj vobłaści, dzie viadziecca budaŭnictva kitajska-biełaruskaha industryjalnaha parku «Vialiki kamień».
Padčas vizitu płanujecca padpisać dahavor ab družbie i supracoŭnictvie Biełarusi z KNR, dekłaracyju ab dalejšym raźvićci i pahłybleńni dvuchbakovych adnosin stratehičnaha partniorstva, a taksama niekatoryja pahadnieńni ab supracoŭnictvie ŭ handlova-ekanamičnaj, mytnaj, adukacyjnaj i kulturnaj śfierach.
U Minsku padkreślivajuć važnaść vizitu kitajskaha lidara. «My da hetaha vizitu vielmi surjozna rychtujemsia, — zajaviŭ u kancy sakavika Alaksandr Łukašenka. — Heta kraina, jakaja šukaje siońnia partnioraŭ, u jakoj mora hrošaj. Kali my staniem, jak ciapier, ź imi partniorami i budziem raźvivać heta supracoŭnictva va ŭsich kirunkach, my možam atrymać i kredyty, i zamovy. Dla nas hałoŭnaje — zamovy».
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam6
Kamientary