Sud viarnuŭ materyjały pa spravie vydaŭca kryčaŭskaj niezaležnaj haziety «Volny horad» na dapracoŭku

Materyjały administracyjnaj spravy ab paklopie na milicyjaniera, u jakim abvinavačvajecca vydaviec niezaležnaj kryčaŭskaj haziety «Volny horad», 15 maja viernuty ŭ miascovy RAUS na dapracoŭku.

Nahadajem, u krasaviku opierupaŭnavažany Kryčaŭskaha RAUS Alaksandr Dziamieška abvinavaciŭ vydaŭca kryčaŭskaj niezaležnaj haziety «Volny horad» Uładzimira Kudraŭcava ŭ raspaŭsiudžvańni niepraŭdzivych źviestak: nibyta milicyjanier pahražaŭ jamu raspačynańniem kryminalnaj spravy za paklop pry razbory pa jaho zajavie ŭ dačynieńni da načalnika rajonnaha adździeła ideałohii, kultury i pa spravach moładzi Maryny Maksimavaj. Kudraŭcaŭ vinu nie pryznaje.

«Zhodna z pastanovaj kryčaŭskaha suda materyjały spravy, jakija pradstavili supracoŭniki Kryčaŭskaha RAUS, viernuty nazad u milicyju z-za taho, što jany nie adpaviadajuć patrabavańniam Kodeksa ab administracyjnych pravaparušeńniach i faktyčna nie pavinny byli być pryniatyja da sudovaj vytvorčaści», — raskazaŭ BiełaPAN žurnalist «Volnaha horada» Mikałaj Hierdzij, jaki prysutničaŭ na sudovym pasiadžeńni. 

Pavodle jaho słoŭ, ni sam Alaksandr Dziamieška, ni chtości z kryčaŭskaj milicyi na sud nie pryjšli. Sudździa zadavoliła ŭsie chadajnictvy, zajaŭlenyja Kudraŭcavym. «Było try chadajnictvy. Jon prasiŭ dałučyć da spravy zajavu ŭ prakuraturu i adkaz na zajavu z Kryčaŭskaha RAUS. Zaprasić u jakaści śviedki Siarhieja Niaroŭnaha — redaktara haziety «Volny horad». I treciaje chadajnictva — zapytać z Kryčaŭskaha RAUS aŭdyjazapis jaho razmovy ź Dziamieškam, kab ustanavić ci byli fakty pahrozy z boku Dziamieški ab raspačynańni kryminalnaj spravy za paklop», — raskazaŭ Hierdzij.

Na jaho dumku, «sprava šytaja biełymi nitkami» i ŭ joj jaŭna prasočvajecca sproba zatknuć rot niezaležnym žurnalistam.

U listapadzie 2014 hoda Kudraŭcaŭ padaŭ u prakuraturu Kryčaŭskaha rajona zajavu ź infarmacyjaj ab tym, što mierapryjemstvy ŭ vioskach i spravazdačy ab ich praviadzieńni adździełam ideałohii, kultury i pa spravach moładzi pišucca farmalna, realnyja konkursy i kancerty pravodziacca vielmi redka. Vydaviec sa spasyłkaj na čytača vydańnia śćviardžaŭ, što płatnyja pasłuhi nasielnictvu faktyčna «robiać» rabotniki kłubaŭ i biblijatek, zdajučy dla hetaha hrošy sa svaich zarobkaŭ. Rabić heta ich prymušajuć dyrektary ŭstanoŭ, pry hetym Maksimava nibyta takija fakty nie spyniaje, a zapluščvaje na ich vočy. Taksama ŭ zajavie Kudraŭcaŭ pryvodziŭ fakty złoŭžyvańniaŭ słužbovym stanoviščam, jakija nibyta ŭčyniała Maksimava. 

U pačatku krasavika hetaha hoda paśla milicejskaj pravierki Kudraŭcavu paviedamili, što fakty ŭčynieńnia kradziažoŭ i złoŭžyvańnia słužbovymi paŭnamoctvami z boku Maksimavaj svajho paćviardžeńnia nie znajšli, tamu pryniata rašeńnie ab admovie ŭ raspačynańni kryminalnaj spravy.

8 śniežnia 2014 hoda sud Kryčaŭskaha rajona, pastanaviŭ, što artykuł «Nie ŭ svaim kreśle?», apublikavany ŭ «Volnym horadzie», nanios uron honaru, hodnaści i dziełavoj reputacyi Maksimavaj. Sud pastanaviŭ spahnać z žurnalistaŭ Uładzimira Kudraŭcava, Siarhieja Niaroŭnaha i Mikałaja Hierdzija na karyść Maksimavaj 7 młn. rubloŭ u jakaści kampiensacyi maralnaha ŭronu, a taksama 450 tys. rubloŭ dziaržpošliny i 3 młn. 600 tys. rubloŭ za pasłuhi advakata, naniataha iścicaj. Mahiloŭski abłsud zhadziŭsia ź vierdyktam Kryčaŭskaha rajsuda.

• 0
• 0
• 0
• 0
• 0
• 0
• 0
• 0