Čechi i słavaki aburylisia rasijskim filmam pra 1968 hod

Novy dakumientalny film pra vajskovaje ŭvarvańnie ŭ Čechasłavakiju ŭ žniŭni 1968 hoda, pakazany ŭ efiry telekanała «Rasija 1», vyklikaŭ hnieŭ uradaŭ Čechii i Słavakii, jakija abvinavacili Maskvu ŭ sprobie pierapisać historyju.

Pavialičyć

U žniŭni 1968 hoda ŭ Prahu ŭvajšli tanki krain — udzielnic Varšaŭskaj damovy. U chodzie padaŭleńnia vajskoŭcami vystupaŭ prychilnikaŭ libieralnych reformaŭ zahinuli bolš za sto hramadzian Čechasłavakii.

Aŭtary filma, jaki vyjšaŭ u efir 23 maja, kažuć, što «metaj ŭvodu vojskaŭ u Čechasłavakiju było praduchileńnie vajennaha pieravarotu, jaki padtrymlivaŭsia Zachadam».

Češski ŭrad vyklikaŭ ŭ MZS rasijskaha ambasadara. Jak adznačyła pres-sakratar MZS Čechii Michaeła Łahronava, kiraŭnik češskaha MZS ličyć, što hety film «uvodzić u zman».

Słavakija vykazała aficyjny pratest u suviazi z pakazam dakumientalnaj stužki.

U filmie, jak havorycca ŭ zajavie uładaŭ Słavakii, uvarvańnie savieckich vojskaŭ pradstaŭlena jak družalubny krok z metaj abarony krainy ad patencyjnaj pahrozy.

U MZS Słavakii padkreślili, što nastojvajuć na «pavazie praŭdy», asabliva ŭ kantekście «vialikaj trahiedyi dla Čechasłavakii i jaje hramadzian».

«My ŭpeŭnienyja, što rasijskija ŭłady prymuć nieabchodnyja miery dla praduchileńnia skažeńniaŭ u hetaj trahičnaj hłavie ŭ historyi słavacka-rasijskich dvuchbakovych adnosinaŭ», — havorycca ŭ zajavie na sajcie źniešniepalityčnaha viedamstva krainy.

Niadoŭhaja «Pražskaja viasna»

Pavialičyć

Libieralnyja reformy ŭ Čechasłavakii praciahvalisia sa studzienia pa žnivień 1968 hoda. Na čale pieramienaŭ, jakija zastalisia ŭ historyi jak «Pražskaja viasna», stajaŭ lidar Kamunistyčnaj partyi Alaksandr Dubčak. Pry im była źmiakčana cenzura ŭ ŚMI, mierkavałasia, što ŭ krainie budzie stvorany sacyjalizm z čałaviečym tvaram.

Ale savieckaje kiraŭnictva adreahavała adpraŭkaj u Čechasłavakiju 2 tysiač tankaŭ i za piaćsot tysiač vajskoŭcaŭ, siarod jakich byli pradstaŭniki armij krain Varšaŭskaj damovy (akramia Rumynii). Pačalisia sutyknieńni, achviarami jakich stali bolš za sto čałaviek.

U filmie «Varšaŭski dahavor. Rassakrečanyja staronki» havorycca pra toje, što vajenny błok na čale z Savieckim Sajuzam byŭ čysta abarončaj arhanizacyjaj, što supraćstajaŭ ahresiŭnamu NATA.

Aŭtary dakumientalnaj stužki śćviardžajuć, što pad prykryćciom lehiendy ab mirnym hramadzianskim paŭstańni z ramantyčnaj nazvaj «Pražskaja viasna» byŭ uzbrojeny pieravarot z padtrymkaj ad NATA.

U film uklučanyja kadry z prapahandysckaha filma savieckaha času, źniataha pa śladach uvarvańnia, a taksama śviedčańni člena Dziarždumy ad Kamunistyčnaj partyi RF Juryja Sinielščykava, što byŭ u toj čas vajskoŭcam.

• 0
• 0
• 0
• 0
• 0
• 0
• 0
• 0