U Polščy biełarus asudžany za špijanaž na 7 hadoŭ turmy
Na praciahu vaśmi hadoŭ jon pieradavaŭ polskim śpiecsłužbam falšyvuju infarmacyju i atrymlivaŭ za heta hrošy.
U Polščy za špijanaž na 7 hadoŭ turmy asudžany biełarus Alaksandr Laniuk. Na praciahu vaśmi hadoŭ (z 1999-ha da 2007 hoda) jon supracoŭničaŭ z adnoj z polskich śpiecsłužbaŭ, atrymaŭ hanarar u pamiery 319 tysiač dołaraŭ i 18 tysiač jeŭra. Adnak infarmacyja, jakuju jon pastaŭlaŭ pra «biełaruskich ahientaŭ» u orhanach ułady Polščy i «biełaruskuju špijonskuju sietku», akazałasia falšyvaj.
Jak infarmuje Polskaje radyjo, sud pryjšoŭ da vysnovy, što dziejnaść biełarusa pryviała da «nieefiektyŭnych dziejańniaŭ» supracoŭnikaŭ polskaj śpiecsłužby. Vyśvietliłasia, što Laniuk padrablaŭ dakumienty. Naprykład, sabie jon zrabiŭ paśviedčańnie ab zakančeńni «kursaŭ śpiecsłužbaŭ». Palakam jon pieradaŭ i falšyvy śpis «aficeraŭ biełaruskich śpiecsłužbaŭ». A tyja praciahły čas vieryli svajmu ahientu.
Biełarus byŭ aryštavany ŭ 2011 hodzie. U kancy maja apielacyjny sud Varšavy pakinuŭ u sile prysud akruhovaha suda pa spravie špijona.
Praces nad Alaksandram Laniukom — nie apošni. Nieŭzabavie pačniecca razhlad spravy hramadzianina Biełarusi Juryja K., jakoha padazrajuć va ŭdziele ŭ dziejnaści zamiežnaj vyviedki. Jamu pahražaje da 10 hadoŭ turmy. A šeść hadoŭ tamu ŭ Polščy byŭ asudžany na 5,5 hady turmy biełaruski hramadzianin Siarhiej Monič. Jaho aryštavali ŭ vyniku supolnaj apieracyi polskich i litoŭskich śpiecsłužbaŭ. Jon za hrošy źbiraŭ tajemnuju infarmacyju pra vysokapastaŭlenych polskich čynoŭnikaŭ.
Kamientary