Vyzvaleny ad vykanańnia pakarańnia ŭ suviazi z amnistyjaj asudžany za raspaŭsiudžvańnie parnahrafii 25-hadovy žychar Śvietłahorska, što źniaŭ na videa paru, jakaja zajmałasia sieksam na nabiarežnaj.
Jak paviedamiŭ žychar Śvietłahorska, pra amnistyju i vyzvaleńnie ad pakarańnia jon daviedaŭsia 7 vieraśnia ŭ kryminalna-vykanaŭčaj inśpiekcyi. U mai ŭ Śvietłahorsku sud pryhavaryŭ jaho da dvuch hadoŭ pazbaŭleńnia voli z hadavoj adterminoŭkaj vykanańnia pakarańnia.
8 žniŭnia 2014 hoda na nabiarežnaj rajcentra małady čałaviek staŭ śviedkam pałavoha akta pamiž nieŭstanoŭlenymi mužčynam i žančynaj. Ubačanaje jon źniaŭ na videa i raźmiaściŭ rolik na svajoj staroncy ŭ sacyjalnaj sietcy. Jak śviedčyŭ abvinavačany, jon byŭ šakavany cynizmam taho, što adbyvałasia, — za savakupleńniem u razbeščanaj formie jaŭna niećviarozych ludziej nazirali zvyš dziesiaci prachožych, u tym liku dzieci. «Ja nie viedaŭ, što takoje videa źjaŭlajecca parnahrafijaj, tam i jakaść była nie vielmi — źmiarkałasia, zdymaŭ zdalok, — tłumačyŭ na sudzie małady čałaviek. — Chacieŭ papiaredzić haradžan, što ich i dziaciej moža padpilnoŭvać na vulicach našaha horada, pakazać, da čaho davodzić ałkaholnaja dehradacyja. Hetyja mužčyna i žančyna bačyli, što vakoł ludzi, ale ich heta nie spyniła».
Aŭtar rolika raniej sudzimy nie byŭ, jamu dadzienyja stanoŭčyja charaktarystyki, maje vyšejšuju adukacyju pa ekanamičnaj śpiecyjalnaści. Vinu pryznaŭ poŭnaściu, videa sa svajoj staronki vydaliŭ i raźmiaściŭ tam ža prabačeńni, adšukaŭ u sietcy kopii i paprasiŭ karystalnikaŭ vydalić videa.
«Pavodle takich artykułaŭ nie varta, napeŭna, uvodzić kryminalnuju adkaznaść ź pieršaha razu, dastatkova było b i štrafu, kab čałaviek štości zrazumieŭ. Ciapier tysiačy ludziej traplajuć pad artykuł ab raspaŭsiudžvańni parnahrafii. Pastaviŭ «łajk» u sacyjalnaj sietcy, heta adlustravałasia na tvajoj staroncy — i hatovaja kryminalnaja sprava. Navošta ludziej padvodzić pad takija artykuły, tracić potym biudžetnyja srodki, pravodzić ekśpiertyzy, pazbaŭlać voli? U mianie ž nie było na mecie zarabić hrošy abo raźvivać parnabiźnies. Ja prosta chacieŭ papiaredzić ludziej ab nastupstvach ałkaholnaj dehradacyi i ab tym, što jany mohuć ubačyć na vulicach horada», — prakamientavaŭ małady čałaviek.
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali14
Kamientary