Dziaržaŭtainśpiekcyja Minskaha rajona nie pryciahnuła da adkaznaści deputata Minabłsavieta Aleha Sukonku, jaki staŭ fihurantam skandalnaha videarolika.
Pieršapačatkova DAI ŭbačyła na zapisie kamiery videarehistratara prykmiety pravaparušeńnia pa častcy 6 artykuła 18.14 kodeksa ab Administracyjnych pravaparušeńniach (praduhledžvajecca papiaredžańnie ci štraf da piaci bazavych vieličyń).
Historyja prahučała na ŭsiu krainu paśla taho, jak «Volva» vip-kiroŭcy trapiła pad rehistratar inšaha aŭtaamatara. Na roliku bačna, jak Sukonka parušaje PDR: jedzie pa darozie z adnabakovym rucham u procilehłym kirunku. Padčas pierapałki pamiž kiroŭcami čuvać, što deputat apieluje da svajho paśviedčańnia i navat pahražaje svajmu apanientu.
Zdavałasia b, parušeńnie PDR vidavočnaje. Ale ŭ Dziaržaŭtainśpiekcyi Minskaha rajona na heta inšy punkt hledžańnia. Miascovy načalnik Siarhiej Baran vynies pastanovu ab spynieńni spravy.
«Za niedakazanaściu vinavataści fizičnaj asoby», — paznačana ŭ adkazie z DAI, jaki atrymaŭ na ruki Vital Zańko — toj samy aburany hramadzianin, jaki paviedamiŭ pravaachoŭnikam pra skandalnaje videa.
Biezumoŭna, Aleh Sukonka pavažany i aŭtarytetny čałaviek. Jon nie prosta deputat, ale i dyrektar RNPC ankałohii i miedycynskaj radyjałohii. Ale, jak harantuje Kanstytucyja, vysoki status i zasłuhi nie dajuć takomu čałavieku pieravahi nad prostymi śmiarotnymi.
Da taho ž, sam Aleh Ryhoravič nie staŭ admaŭlać, što parušyŭ PDR i što heta jon kiravaŭ «Volva», jakoje trapiła ŭ abjektyŭ videarehistratara:
«Nu i što, što ja pajechaŭ pad znak — nivodnaha čałavieka tam nie było, 150 mietraŭ pa sustrečnaj pałasie. Paniasu pakarańnie za heta, što ž rabić. Nie dumaju, što pazbaviać pravoŭ — ja nie stvaryŭ nijakaj avaryjnaj situacyi. Daduć štraf».
Vital Zańko, jaki napisaŭ zajavu na Sukonku ŭ DAI, vielmi rasčaravany i ŭžo napisaŭ skarhu ŭ prakuraturu Minskaha rajona.
«Deputat z ksivaj moža jeździć usiudy, a čałavieka biez ksivy mohuć za takoje ž parušeńnie pazbavić prava kiravańnia tolki na padstavie videa, jakoje niečakana źjavicca ŭ internecie. Voś u jakoj krainie my žyviom», — robić ułasnyja vysnovy Zańko.
Jak stała viadoma Jeŭraradyjo, DAI Minskaha rajona, dakazvajučy vinavataść deputata, nie apytała navat Alaksandra — taho samaha kiroŭcu, jaki źniaŭ i vykłaŭ rolik u internet.
Ci źjaŭlajecca videazapis dokazam parušeńnia PDR?
U Biełarusi dziejničaje hetak zvanaja prezumpcyja vinavataści ŭładalnika transpartnaha srodku, jaki z-za parušeńnia chutkaści trapiŭ pad fotafiksatar.
Zapis ža ź videarehistratara nie zaŭsiody na 100% dakazvaje parušeńnie PDR, tłumačyć kiraŭnik papularnaha prajekta «Pierachop», padpałkoŭnik milicyi Alaksandr Łastoŭski.
Luby hramadzianin, jaki zafiksavaŭ na fota ci videa pravaparušeńnie, moža dasłać taki kampramat na «Pierachop». U vypadku publikacyi, pravaachoŭnyja orhany časta reahujuć na heta. Darečy, videa z deputatam na adras prajekta adpraŭlali, ale apublikavanaje jano nie było.
«Jość šmat raznastajnych abstavinaŭ, kali videa nie źjaŭlajecca padstavaj dla pryciahnieńnia kiroŭcy da adkaznaści. Naprykład, momant pravaparušeńnia byŭ bolš za dva miesiacy tamu ci paznavalnaść aŭtamabila niedastatkovaja. Aproč hetaha jość pracesualny paradak dakazvańnia. Zdarajecca, zbor dokazaŭ nie taki chutki i vidavočny, jak heta padajecca. Z punktu hledžańnia zakona, nielha na padstavie videa tyknuć u čałavieka i skazać, što jon parušalnik. Usio treba dakazać va ŭstalavanym paradku i naležnym čynam zafiksavać», — tłumačyć niuansy Alaksandr Łastoŭski.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary