Ad vieršaŭ pra «Pahoniu» da «nieadryŭnaj častki ruskaha śvietu» — evalucyja pohladaŭ junaka z Bresta Kiryły Azimki

Nie tak daŭno na sajcie rasijskaha vydańnia «Vzhlad» źjaviŭsia artykuł «Pole bitvy — Biełoruśsija». Ciapier u rasijskich miedyja bahata padobnych publikacyj. Tamu na čarhovy ŭkid možna było b nie źviartać uvahu, kab nie asoba aŭtara — heta małady chłopiec z Bresta Kirył Azimka. Mnohija paznali ŭ hetym chłopcu biełaruskamoŭnaha i ŭkrainskamoŭnaha paeta, jaki publikavaŭsia ŭ niekatorych litaraturnych vydańniach. My patelefanavali spadaru Azimku, kab papytacca, čamu jahonyja pohlady mianiajucca. 

Pavialičyć

«Naša Niva»: Vy bačycie ŭ Biełarusi pahrozu dla ruskaj kultury?

Kirył Azimka: Pahroza jość. Jana zaklučajecca ŭ tym, što naša moładź znachodzicca pad upłyvam usialakich artykułaŭ na prazachodnich resursach. Tam kultyvujuć mify, što biełarusy nijakija nie słavianie, a bałty, a ruskija — fina-vuhry. Nasamreč my — uschodnija słavianie, u nas była supolnaja dziaržava — Kijeŭskaja Ruś. Ruskaja spadčyna ŭ nas pavinna padtrymlivacca, kab my nie zabyvali svaje karani, nie hublali suviazi sa svaimi bratami.

«NN»: Vy pišacie, što Rasija pavinna dapamahać Biełarusi ŭ infarmacyjnaj baraćbie z Zachadam. Jak vy heta bačycie?

KA: Najpierš treba źbierahčy Biełaruś ad ukrainskaha scenaru. Va Ukrainie ŚMI nastolki pramyli mazhi moładzi, što jany aźviareli, pačali spalvać niazhodnych. Na žal, ciapier u Biełarusi najbolš čytanyja i papularnyja ŚMI — heta tyja, chto zajmaje prazachodniuju pazicyju. Patrebna, kab moładź nie zacyklivałasia na niečym adnym, patrebna, kab jana dumała.

«NN»: U televizijnych kabielnych sietkach Biełarusi ŭsie telekanały vyklučna ruskamoŭnyja. Vy ličycie, hetaha mała?

KA: Kali paraŭnoŭvać «Biełsat» z rasijskimi telekanałami, što viaščajuć u Biełaruś, to roźnica ŭ tym, što rasijskija ŚMI zroblenyja ŭ pieršuju čarhu dla Rasii. A «Biełsat» — dla Biełarusi. Ruskija haziety nie nastolki prapijarany siarod moładzi. Treba niešta alternatyŭnaje, papularnaje siarod maładych biełarusaŭ.

«NN»: Vy prapanujecie, kab Rasija bolš układvała hrošaj u Biełaruś na hrantaŭskaj asnovie?

KA: Kali Rasijaj choča niejak upłyvać na hramadskuju dumku ŭ našaj krainie, to biez hetaha Rasii nie spravicca nijak. Za našu krainu ciapier idzie baraćba miž Zachadam i Rasijaj. Kali Rasija budzie siadzieć i ničoha nie rabić, to ŭsio skončycca ŭkrainskim scenarom. Treba bić Zachad jaho ž zbrojaj.

«NN»: A čamu supołki kštałtu «Antymajdanu» ŭ Biełarusi takija niepapularnyja?

KA: Mała pijaracca. Pry dobrym pijary vielmi mnohija b dałučylisia. U nas u krainie šmat prarasijska nastrojenaha nasielnictva. Maje znajomyja ničoha nie viedajuć pra prarasijskija arhanizacyi. Zatoje ŭsie viedajuć pra prazachodnija supołki. U ich maleńkaja aŭdytoryja nie tamu, što moładź u nas myślić vyklučna apazicyjna, a prosta tamu, što infarmacyjnuju prastoru zachapili prazachodnija siły. Ja dumaju, što heta adbyłosia tamu, što jany bolš aktyŭnyja, u ich pracuje bolš ludziej, dziakujučy zachodnim hrantam. A voś prarasijskija hrupy pracujuć na entuzijaźmie, im niama času zajmacca pijaram.

«NN»: Biełaruskija ŭłady nie zaminajuć raspaŭsiudu prarasijskaj infarmacyi?

KA: Ja takoha nikoli nie čuŭ. Z prazachodnimi — tak, byli pieraškody. Prarasijskija žurnalisty, ŚMI, jak praviła, vielmi dobra nastrojeny da dziejnaj ułady.

«NN»: U internecie dastatkova prosta znajści vašy vieršy, u tym liku pra Pahoniu. «Naša Vialikaje Kniastva Litoŭskaje, Šlachta zamožnaja, Niepieramožnaja, Naša Pahonia Šlach abaronić. Šlach praz stahodździ tvoj, Kniastva Litoŭskaje». Jak jany suadnosiacca z vašymi siońniašnimi pohladami?

KA: Heta nijak pamiž saboj nie źviazana. Tvorčaść jość tvorčaściu. Palityčnyja pohlady — asobna. Ja ŭ svaich vieršach ničoha palityčnaha nie pisaŭ, nie ŭschvalaŭ niejkuju ideałohiju. Ja liču Pahoniu simvałam VKŁ. Ale ja nie liču, što Biełaruś — heta nie adzinaja spadčyńnica VKŁ. Prosta mnie zachaciełasia pra heta napisać. Moža być, ja pačuŭ niejkuju pieśniu pra Pahoniu. Navat kali ŭ maich vieršach niešta było, što nie suadnosicca z maimi siońniašniami pohladami, to heta śviedčańnie taho, što ludzi raźvivajucca. Sapraŭdy, raniej ja byŭ bolš prazachodnich pohladaŭ, ale paźniej ja staŭ čytać roznyja knihi, to ja pryjšoŭ da vysnovy, što my nieadryŭnaja častka ruskaha śvietu, ruskaj cyvilizacyi. Heta ŭśviedamleńnie mnie pryjšło nie adrazu.

• 0
• 0
• 0
• 0
• 0
• 0
• 0
• 0