Purhurydes prapisaŭ palityčnaje vehietaryjanstva

Pryniataja ŭviečary 15 krasavika rezalucyja Parlamenckaj asamblei Rady Eŭropy zaklikaje Miensk nieadkładna ŭvieści maratoryj na śmiarotnaje pakarańnie i skasavać artykuł 193-1 Kryminalnaha kodeksu. Toj samy, pavodle jakoha siadzieli, u pryvatnaści, siabry "Partnerstva" i Źmicier Daškievič (dziejnaść ad imia niezarehistravanaj arhanizacyi). Darečy, heta adzin z tak zvanych "antyrevalucyjnych artykułaŭ", prezentavanych niekali Pałacie hienerałam Sucharenkam ("…ale sprava jaho žyvie").

Prahučały ŭ Strasbury čarhovy dakład Purhurydesa vybivaje hlebu z-pad śćvierdžańniaŭ biełaruskaha kiraŭnictva, što ŭ nas, maŭlaŭ, niama palitźniavolenych, a tolki kryminalniki. Ale samo proźvišča niaŭrymślivaha deputata-kipryjota dla tutejšaha vysokaha načalstva — by čyrvonaja anuča. Jašče ŭ 2004 hodzie Alaksandar Łukašenka aburaŭsia: maŭlaŭ, my da jaho pa-ludzku, puścili ŭ krainu i ŭsio takoje, a jon potym u dušu naplavaŭ (majecca na ŭvazie dakład pra "hučnyja źniknieńni"). Zaraz Purhurydes musić vyvučać biełaruskaje pytańnie zavočna. Zrešty, i novy specdakładčyk PARE pa Biełarusi Andrea Ryhoni, jaki sprabuje amplua "dobraha śledčaha" i pierad jakim jašče nie apuskajuć šlahbaŭm na našaj miažy, pahody ŭ hetym pytańni nie zrabiŭ i naŭrad ci zrobić.

Uvohule rekamendacyi PARE (zrešty, jak i inšych eŭrapiejskich instytucyjaŭ), datyčnyja źmiakčeńnia našaha palityčnaha klimatu, nahadvajuć prapisvańnie vehietaryjanskaj dyjety hałoŭnamu antyhieroju kazki pra troch parsiučkoŭ. Pryroda režymu takaja, što jon pavodle vyznačeńnia budzie palavać na lubuju ŭnutrypalityčnuju alternatyvu. Havorka chiba što pra stupień brutalnaści.

I tut varta prykinuć, ci nadta zacikaŭlenyja biełaruskija kiroŭnyja viarchi ščyravać dziela Rady Eŭropy. Heta ž nie Eŭraźviaz, stasunki ź jakim važnyja ŭžo tamu, što my mocna źnitavanyja ekanamičnymi intaresami, a niejkaja amorfnaja instytucyja, zaniataja pieravažna "efemernymi" pytańniami pravoŭ čałavieka. Tak što pytańnie dla Miensku chiba što imidžavaje, ale kali havorka idzie pra metady ŭtrymańnia ŭłady, to "imidž — ništo…".

Zvyš taho, kali naša kraina trapić u Radu Eŭropy, to hramadzianie atrymajuć mahčymaść skardzicca na dziaržaŭnaje svavolstva ŭ strasburski sud, tak što tutejšaje načalstva zamučycca pył hłytać :) Jamu heta treba?

Jeść i taki pikantny niuans: kali status biełaruskaha parlamentu ŭ PARE adnoviać, to ajčynnyja deputaty pačnuć rehularna hojsać pa tych Strasburach, a prezydent ža zastaniecca nieŭjaznym! Dzie spraviadlivaść, ha?

Zrešty, maratoryj na śmiarotnaje pakarańnie moža być akurat najmienšaj sastupkaj z hledzišča aficyjnaha Miensku. Ci vypadkova pasłańnie Ryhoni na hetuju temu źjaviłasia dniami ŭ "Narodnaj haziecie"?

Pry hetym maratoryj prapahanda moža padać jak vialikuju achviaru, hihancki krok nasustrač Eŭropie. Nahadaju: bolej za 80% nasielnictva na referendumie 1996 hodu vykazalisia suprać skasavańnia "vyški". Dumaju, što akurat u hetym pytańni aficyjnyja ličby adekvatnyja. I na siońnia raskład mierkavańniaŭ naŭrad ci karennym čynam źmianiŭsia. Dyk voś, u vypadku ŭviadzieńnia maratoryju Miensk vyciśnie maksymum pijaru. Maŭlaŭ, dziela vas, humanistaŭ čortavych, my pajšli navat suprać płyni hramadzkaje dumki! Tak što prymajcie chutčej u svajo buržuinstva :)

• 0
• 0
• 0
• 0
• 0
• 0
• 0
• 0