Kalehi pra nieadekvata z nažom, jaki ledź nie zabiŭ 4-hadovuju dziaŭčynku i jaje babulu: «Ranicaj aniekdoty raskazvaŭ, a paśla abiedu takoje vyrabiŭ»

Stali viadomyja padrabiaznaści rezanansnaha złačynstva ŭ Savieckim rajonie Homiela, u vyniku jakoha paciarpieli 56-hadovaja babula i jaje 4-hadovaja ŭnučka.

Nahadajem, 15 sakavika siarod biełaha dnia 26-hadovy hamialčanin, całkam raspranuŭšysia, uvajšoŭ u padjezd doma na vulicy Dziaržynskaha, 1a. Jon pačaŭ torhać dźviarnyja ručki, i jak nazło adnyja dźviery akazalisia nie zamknutymi. Prajšoŭšy na kuchniu, mužčyna schapiŭ nož i napaŭ na haspadyniu kvatery i jaje čatyrochhadovuju ŭnučku. Na kryki prybieh susied, jaki abiazzbroiŭ nieznajomca, vyklikaŭ chutkuju i milicyju. Babula z unučkaj byli dastaŭleny ŭ reanimacyju. Stan dziaŭčynki stabilny, u lekaraŭ niama bojazi za jaje žyćcio. Žančyna atrymała množnyja nažavyja ranieńni. Homielskija lekary litaralna vyciahnuli jaje z taho śvietu. Pacyjentku ŭžo pieraviali z reanimacyi ŭ zvyčajnuju pałatu.

Napadnik tym časam utrymlivajecca ŭ psichijatryčnym špitali pad kanvojem. Ahlad nie pakazaŭ najaŭnaści ŭ jaho kryvi ałkaholu, adnak užo viadoma, što padziejam papiaredničaŭ praciahły zapoj. U momant ździajśnieńnia złačynstva padazravany pavinien byŭ znachodzicca nie na vulicy Dziaržynskaha, a na pradpryjemstvie «Rubin», dzie pracuje blacharom 4 razradu. Jon źjaviŭsia tam ranicaj, źjeździŭ z prarabam na abjekt u Kaściukoŭku, viarnuŭsia na bazu i syšoŭ na abied… Dniom raniej jon byŭ u kabiniecie dyrektara — pisaŭ tłumačeńnie, čamu nie vyjšaŭ na pracu 9, 10 i 11 sakavika.

«Apachmielvaŭsia paśla 8 sakavika, pierabrali. Pračnuŭsia ŭ ciahniku na Minsk. Doŭha šukaŭ hrošy na zvarotny šlach. Viarnuŭsia ŭ Homiel pozna. Na pracu praspaŭ, pračnuŭsia tolki da abiedu. Telefon razradziŭsia, tamu patelefanavać nie zmoh», — ścisła vykłaŭ pryčynu blachar.

Za prahuły jaho pakarali, ale nie zvolnili.

— Takija śpiecyjalisty na vulicy nie valajucca. Pjanym jon nikoli nie byŭ zaŭvažany. Uvieś čas pracavaŭ na vyšyni. Chto čałavieka z pachmiella na dach dapuścić? U nas z hetym vielmi stroha, — charaktaryzuje padnačalenaha dyrektar.

Kiraŭnika padtrymlivaje prarab:

— Dy jakija tam padstavy?! Jon samy adkazny na ŭčastku, dy da taho ž dvuchžylny. U siezon ramontu dachaŭ pa vosiem hadzin pad lichtarami pracavaŭ. Treba było, i ŭ subotu vychodziŭ. Paralelna advučyŭsia na stropalščyka.

Toje, što zdaryłasia 15 sakavika na Dziaržynskaha, usich u kalektyvie šakavała. Nichto jaho ŭčynak nie apraŭdvaje. Prosta nie mohuć zrazumieć, što ź ich Žorykam (tak jaho nazyvajuć pa suhuččy z proźviščam) adbyłosia. Ranicaj žartavaŭ, aniekdoty raspaviadaŭ, a paśla abiedu takoje ździejśniŭ.

Haradskim adździełam śledčaha kamiteta zaviedzienaja kryminalnaja sprava pa fakcie zamachu na zabojstva dźviuch asob. Pravodzicca šerah ekśpiertyz, vyśviatlajucca matyvy ździejśnienaha złačynstva.

• 0
• 0
• 0
• 0
• 0
• 0
• 0
• 0