Łukašenka padziakavaŭ Słavienii za pazicyju ŭ dačynieńni da Biełarusi pry abmierkavańni prablem ź ES

Alaksandr Łukašenka padziakavaŭ Słavienii za pazicyju ŭ dačynieńni da Biełarusi pry abmierkavańni prablem ź Jeŭrasajuzam. Ab hetym jon siońnia zajaviŭ na sustrečy z namieśnikam premjer-ministra — ministram zamiežnych spraŭ Słavienii Karłam Erjaŭcam.

«Pierš za ŭsio chaču padziakavać za tuju pazicyju, jakuju ŭ apošnija hady zajmała Słavienija ŭ dačynieńni da Biełarusi, u pryvatnaści, pry abmierkavańni prablem ź ES, — padkreśliŭ kiraŭnik dziaržavy. — My ludzi ŭdziačnyja i bačym usio — pačynajučy ad hetych palityčnych pytańniaŭ i zakančvajučy zvyčajnymi adnosinami pamiž ludźmi. Ja maju na ŭvazie vaša dobraje staŭleńnie da biełaruskich dziaciej z paciarpiełych čarnobylskich rajonaŭ, jakich vy ŭvieś čas zaprašajecie na adpačynak, azdaraŭleńnie».

«Nie dumaju, što ŭ nas byli ci buduć niejkija prablemy na palityčnym, dypłamatyčnym uzroŭni ci ŭ adnosinach pamiž ludźmi. Tut absalutna niama prablem i nie budzie, — upeŭnieny kiraŭnik dziaržavy. — Była niejkaja paŭza ŭ siłu viadomych i nam, i vam pryčyn. My ličym, što Słavienija da hetaha nijakaha dačynieńnia nie maje».

Pry hetym jon adznačyŭ, što padmurkam dvuchbakovych adnosin źjaŭlajecca ekanomika. «Ja kažu pra ekanomiku nie tamu, što tut jość niejkija prablemy. My supracoŭničajem z pradstaŭnikami słavienskaha biźniesu, z usimi tymi, chto chacieŭ by z nami supracoŭničać», — zaŭvažyŭ kiraŭnik krainy.

Razam z hetym kiraŭnik dziaržavy nahadaŭ, što z respublikami byłoj Juhasłavii zaŭsiody byli dobryja adnosiny. I šmat čamu, u tym liku rynkavych adnosinaŭ, možna tady było vučycca ŭ Juhasłavii. Jak adznačyŭ Alaksandr Łukašenka, u Biełarusi zachavalisia samyja ciopłyja, dobryja pačućci ŭ dačynieńni da respublik byłoj Juhasłavii, u tym liku Słavienii. «U biełaruskaha naroda i mianie asabista skłałasia vielmi dobraje mierkavańnie ab hetym kvitniejučym kavałačku ziamli, ab słaviencach, i heta, viadoma ž, nakładvaje surjozny adbitak na dvuchbakovyja adnosiny ŭ dobrym sensie słova», - padkreśliŭ jon.

«Kab nadać stabilnaść ekanamičnym adnosinam, treba było b mieć niekalki bujnych sumiesnych prajektaŭ, moža być 3-4, jany ŭ pryncypie vymaloŭvajucca, kab najciaśniejšym čynam źviazać dźvie krainy, kab potym užo navat Jeŭrapiejski sajuz nie zmoh na heta paŭpłyvać, tamu što asnovaj usiaho źjaŭlajecca ekanomika», — dadaŭ Łukašenka.

Alaksandr Łukašenka zapeŭniŭ, što Biełaruś hatovaja i dalej supracoŭničać sa Słavienijaj na ŭzajemavyhadnych umovach.

• 0
• 0
• 0
• 0
• 0
• 0
• 0
• 0