Udzielničajuć hurty: «Stary Olsa», «Testamentum terrae», «Lićvinski Chmiel», «Mozaik» (Polšča), «Litvintroll», «Essa», «Javaryna», «Neolitic Age» (Ukraina), «Kašłaty Voch», «RR», «Ceilidh Ceol», «Rada», «Vydraga» (Litva), «Kielich koła», Aleś Łoś, Todar Kaškurevič, Dzianis Suchi, Liane Varbo (Estonija), Aleś Surba, Jutaka Ban (Bahłaryja) i inš. Tancavalnaja padtrymka: hurt «Histryjon» i teatr «Javaryna». Daviedki: 7662425 (MTS), 6490888 (Velcom). Kasa: 2886160 i 3286638 (haradzkija telefony).
Kvitki ad 12 000 da 30 000.
***
Heny fest niezdarma adbyvajecca ŭ krasaviku, bo prymierkavany da Vialikadnia pavodle pravasłaŭnaha kalendara, kali, zhodna z unikalnym biełaruskim abradam «vałačobnictva», adbyvaŭsia abychod chataŭ z dudoj dy śpievami.
Staŭšy z 2006 h. štohadovym (adlik viadziecca ŭžo z dalokaha 1992 h.), «Dudarski fest» (www.dudar.info) robicca prykmietnaj kulturnaj padziejaj eŭrapiejskaha ŭzroŭniu. Śviedčańniem tamu — zaplanavany ŭdzieł dudaroŭ dobraha dziasiatku krainaŭ, u tym liku navat takoj daloka‑antypodnaj, jak Novaja Zelandyja. Darečy, baŭharski japoniec Jutaka Ban, jaki «parvaŭ» minułym hodam mienskija padmostki, taksama paabiacaŭ znoŭku naviedać RB. Arhanizatary festu składajuć asablivuju padziaku Polskamu instytutu, dziakujučy jakomu ŭ feście biare ŭdzieł viadomy polski dudarski hurt Mozaik.
Takaja pradstaŭničaść — nia dziva. Hety fest źjaŭlajecca adzinaj imprezaj va Ŭschodniaj Eŭropie (u spakonviečnym razumieńni hetaha słova — to bok «ad Berlinu da Smalensku»), pryśviečanaj dudzie. Niezdarma archiŭnych śviedčańniaŭ isnavańnia dudaŭ na terytoryjach na ŭschod ad etnahrafičnych miežaŭ raśsialeńnia «biełaruskaha plemieni» nie zafiksavana. Majstar Todar Kaškurevič taksama adznačyŭ, što ciapieraka viadziecca praca nad albomam z archiŭnymi zapisami tvoraŭ u vykanańni davajennych biełaruskich muzykaŭ i zapisami sučaśnikaŭ, jakija ŭznaŭlajuć aŭtentyčny nacyjanalny styl dudarskaj ihry. U paćvierdžańnie hetym słovam majstar Dzianis Suchi na kopii staražytnaj biełaruskaj dudy «macianka» (aryhinał znachodzicca ŭ adnym z muzejaŭ Vilni) u tradycyjnaj maniery vykanaŭ narodnuju melodyju.
Na festavych scenach zahučać halisijskija (gaita gallega abo gaita do fol), baŭharskija («hajda»), šatlandzkija (bagpipe), švedzkija (sdkpipa), niamieckija (Dudelsack) dudy, a taksama, samo saboju, vielmi blizkija mižsobku biełaruskija, litoŭskija i łatyskija (pieravažna łathalskija). U feście ŭžo tradycyjna budzie reprezentavanaja muzyka šmatlikich napramkaŭ, dzie skarystoŭvajecca duda, ad tradycyjnaha falkloru da ciažkoha roku.
Pavodle hałoŭnaha pradusara tvorčaje akcyi Źmitra Sasnoŭskaha, navat vialisia pieramovy pra ŭdzieł u feście słynnaha niamieckaha hurtu Fidelius. Praŭda, sioleta słavutaści pieršaje vieličyni nie patrapili vybracca ŭ Biełaruś, adnak sam heny fakt nadaje aptymizmu na pryšłaść… Upieršyniu pryjeduć muzyki nia tolki z Novaj Zelandyi, ale z kudy bolš blizkaj Estonii. Darečy, u hetaj samoj vesternizavanaj krainie na terytoryi byłoha SSSR pradstaŭnicy pieknaha połu ŭ nialohkaj dudarskaj spravie ŭžo ledź nia ŭporavień z mužčynami.
Dziakujučy estonskaj (dudarka znakamitaha hurtu Auli Liane Barbo) i łatyskaj (hurt Arba) prysutnaści, da čatyroch pavialičycca kolkaść maładzic — udzielnic festu. Reč u tym, što dadzienaje mastackaje ramiastvo spradvieku ŭvažałasia vyklučna za mužčynskuju spravu. Niezdarma navat u jakaści zychodnaha materyjału dla miachoŭ dudy paŭsiudna vykarystoŭvajecca skura kozaŭ, a nie kazłoŭ. Praŭda, T.Kaškurevič rastłumačyŭ hety «hienderny» aspekt — skura kazłoŭ čaściakom byvaje druzłaj…
Taksama, sa słovaŭ Z.Sasnoŭskaha, u suviazi ź vialikaj cikavaściu ajčynnych i zamiežnych muzykaŭ, zvyčajnych amataraŭ dudy da tvorčaj akcyi fest budzie padoŭžany z dvuch da čatyroch dzion. U prahramu ŭklučanyja dva kancerty (24 krasavika ŭ małoj zale k/z «Miensk» i 25 krasavika ŭ «Reaktary»), mižnarodnaja kanferencyja «Zachavańnie dudarskaj tradycyi ŭ Biełarusi i Bałtyjskim rehijonie Eŭropy» (26 krasavika ŭ Vałožynskim rajonie na sialibie Alesia Łasia — adnaho z asnoŭnych adradžencaŭ zahasłaj za časami BSSR dudarskaje tradycyi), a hetaksama viečar «Dudarskaha klubu» (27 krasavika ŭ «Katakombach»).
Pa vynikach akcyi planujecca vydańnie zbornika dakładaŭ kanferencyi, aŭdyjozapisaŭ festu i videafilmu «Dudarski fest 1992—2008».
Siarod navinaŭ ajčynnaha «dudarskaha» ruchu Z.Sasnoŭski nazvaŭ vyrab niamieckich dudaŭ majstram Alesiem Surbom, žalejek majstram Źmitrom Šymanskim i kijaŭ dla šatlandzkich dudaŭ majstram Jurasiom Pankievičam, adkryćcio Dudarskaha klubu, abjadnańnie biełaruskich muzykaŭ u Dudarskaje bractva śviatoha Bazyla, a taksama padrychtoŭku da vydańnia pieršaha numaru almanachu Dudar.
Hetkim čynam, viartańnie Biełarusi ŭ Eŭropu idzie poŭnaju chadoj. Prynamsi, pastulatu T.Kaškureviča «dzie duda — tamaka Eŭropa» zapiarečyć ciažka.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary