MUS nie budzie pa svajoj inicyjatyvie pryciahvać da adkaznaści karystalnikaŭ pirackaj pradukcyi

Ministerstva ŭnutranych spraŭ nie maje namieru pa ŭłasnaj inicyjatyvie pryciahvać da adkaznaści zvyčajnych karystalnikaŭ pirackich prahram, infarmacyjnaj pradukcyi, jakaja nielehalna zapampavana, raźmieščana i vykarystoŭvajecca ŭ sietcy. Takaja vysnova vynikaje z vystupleńnia na pres-kanfierencyi ŭ Minsku namieśnika načalnika pieršaha adździeła pieršaha ŭpraŭleńnia Hałoŭnaha ŭpraŭleńnia pa baraćbie z ekanamičnymi złačynstvami MUS Alaksandra Pahoskaha.

4 krasavika nabyli moc niekatoryja papraŭki ŭ Kodeks ab administracyjnych pravaparušeńniach (KaAP), u tym liku tyja, jakija datyčacca parušeńnia aŭtarskich pravoŭ i pravoŭ na intelektualnuju ŭłasnaść.

«Kali niejki student zapampavaŭ sabie na kampjutar miełodyju i zatym raspaŭsiudziŭ jaje siarod svaich adnahrupnikaŭ, to ŭ nas niama navat pravavoj padstavy pačynać administracyjny praces, — padkreśliŭ Pahoski. — Tamu što, kab ustanavić hety fakt, nam treba niejkaja zajava [ ad pravaŭładalnika] ci chacia b apieratyŭnaja infarmacyja [ab pravaparušeńni]. Apieratyŭnuju infarmacyju ŭ dačynieńni da studenta pa hetych faktach naŭrad ci možna atrymać lehalnym šlacham — nie takoje surjoznaje pravaparušeńnie jon učyniaje. Što da padačy zajavy pravaŭładalnikam abo aŭtaram, to ŭ majoj praktycy jašče nie było faktaŭ, kab pravaŭładalnik abo aŭtar padavaŭ zajavu ŭ adnosinach da fizičnaj asoby, jakaja svaim siabram ci znajomym pa leśvičnaj placoŭcy pieradała niejki tvor pa telefonie».

U toj ža čas pradstaŭnik MUS adznačyŭ, što asoba, jakaja tak pastupaje, usio ž učyniaje pravaparušeńnie i tearetyčna moža być pryciahnuta da adkaznaści. «Faktyčna ž ja daloki ad dumki, što takija vypadki ŭ nas buduć u praktycy ŭ najbližejšyja piać ci dziesiać hadoŭ», — adznačyŭ jon.

Pierapublikacyja spasyłak na kantrafaktnaj pradukcyi ŭ sacyjalnych sietkach taksama źjaŭlajecca pravaparušeńniem, adnak na praktycy MUS nie stanie «apuskacca da takoha ŭzroŭniu, kab składać pratakoły ŭ dačynieńni da padobnych faktaŭ». «U nas dastatkova surjoznych faktaŭ, na jakich treba zasiarodzić svaje namahańni», — dadaŭ Pahoski.

Takim čynam, papraŭki ŭ KoAP nakiravanyja na spynieńnie masavaha raspaŭsiudžvańnia kantrafaktnaj pradukcyi. U realnaści heta tyčycca asob, jakija zajmajucca prodažam pirackich dyskaŭ, a ŭ virtualnym śviecie — torent-sajtaŭ, na jakich ahrehatujecca vielizarny masiŭ pirackaj infarmacyi. Pry hetym čynoŭnik MUS źviarnuŭ uvahu na toje, što biełaruskija pravaachoŭniki mohuć zmahacca tolki z tymi raspaŭsiudžvalnikami pirackaj pradukcyi, čyje sierviery znachodziacca na terytoryi Biełarusi.

• 0
• 0
• 0
• 0
• 0
• 0
• 0
• 0