Premjera filma «HaraŠ», źniataha letaś kamandaj niezaležnych biełaruskich kiniematahrafistaŭ, 3 červienia adbudziecca na partale tut.by, paviedamiŭ režysior i scenaryst filma Andrej Kurejčyk 31 maja na pres-kanfierencyi ŭ Minsku. Partnioram internet-prakatu «HaraŠa» staŭ apieratar «MTS».
Kurejčyk adznačyŭ, što «HaraŠ» ź lutaha 2016 hoda, kali byŭ dadzieny start aficyjnamu prakatu filma ŭ biełaruskich kinateatrach, sabraŭ krychu bolš za 300 młn rubloŭ, što składaje siem biudžetaŭ karciny.
«My jak stvaralniki atrymali krychu mienš za pałovu hetych hrošaj i razdali ich ŭsioj zdymačnaj kamandzie, tamu što mnohija nad filmam pracavali na hołym entuzijaźmie», — skazaŭ režysior. Jon nahadaŭ, što film byŭ z pośpiecham pakazany na kinafiestyvali «Listapad» u 2015 hodzie — achvotnych jaho pahladzieć było tak šmat, što arhanizataram daviałosia pravieści dadatkovyja sieansy.
Trahikamiedyju pahladzieli prykładna 10 tysiač čałaviek pa ŭsioj krainie. Kurejčyk źviarnuŭ uvahu na toje, što hučna rekłamavanuju dziaržaŭnuju karcinu «My, braty», prezientavanuju ŭ Rasii, pahladzieli tolki 6 tysiač.
Pavodle słoŭ Kurejčyka, sistema kinaprakatu ŭ Biełarusi — heta «poŭny chaos». Jak adznačyŭ pradziusar i kampazitar filma Dźmitryj Fryha, hadziny pieramoŭ i padpisańnie dziasiatkaŭ dahavoraŭ pryviali da taho, što aŭtary «HaraŠa» atrymali tolki paŭkrainy. Im nie ŭdałosia pakazać karcinu ŭ mahiloŭskim i homielskim kinaprakatach. U Minsku pakazy prajšli ŭ kinateatrach «Maskva», «Pieramoha», «Silvierskryn» i ŭ «Art-kinateatry». Pryčym, adznačyŭ Kurejčyk, kali na pieršych pakazach hledačoŭ było mała, to paśla taho, jak pajšli pieršyja vodhuki pa «sarafannym radyjo», zały stabilna byli zapoŭnienyja na 70-80%.
«Niahledziačy na toje što ŭ nas nie było hrošaj na dobry pramoŭšn i ŭ hety ž čas u prakat vyjšaŭ amierykanski błakbastar sa 150-miljonnym biudžetam» Dedpuł «, my abahnali ŭ prakacie rasijskija filmy «Staŭka na kachańnie» z Alaksandram Revam i «U aktyŭnym pošuku», amierykanski «Błakitny bierah» z Andžalinaj Džali i Bredam Pitam», — padkreśliŭ Fryha.
Adkazvajučy na pytańnie ab vychadzie filma na zamiežnyja rynki, Kurejčyk paviedamiŭ: «My budziem prapanoŭvać film» HaraŠ «jak franšyzu na sieryjał, piłot, pavodle prykładu «Realnych pacanoŭ» rasijskaha telekanała TNT. U kinateatralny prakat jaho biez hrošaj zasunuć niemahčyma, dy jon i pa farmacie nie padychodzić — vuzki, łakalny humar nie razumiejuć ludzi, jakija nie viedajuć, što takoje Šabany».
Kamientary