Spravu DAIšnikaŭ, jakija 2 sakavika vystavili «žyvy ščyt» na šlachu pjanaha kiroŭcy, u paniadziełak 19 traŭnia pieradaduć z prakuratury ŭ sud.
Sudzić buduć tolki prostych inśpiektaraŭ. Dzie znachodzicca Raman Mianciuk, suprać jakoha toj «ščyt» i vystaŭlali, pa‑raniejšamu dakładna nie viadoma, ale ŭ mižnarodny vyšuk jaho čamuści nie abjaŭlajuć.
Nahadajem, što 2 sakavika na 8‑m kiłamietry trasy Minsk‑Mikaševičy inśpiektary DAI praviali zatrymańnie kiroŭcy, jaki ŭciakaŭ ad ich ad samoha Słucka. Kab narešcie spynić uciekača, DAIšniki vystavili na darozie pieraškodu z pryvatnych mašyn.
Jak paviedamiła Jeŭraradyjo advakat paciarpiełych Viera Stramkoŭskaja, spravu inśpiektaraŭ DAI, jakija, pa viersii śledčych prakuratury Minskaj vobłaści, vystaŭlali «žyvy ščyt» 19 traŭnia pieradaduć u rajonny sud horada Zasłaŭja. Inśpiektary svajoj viny nie pryznajuć i śćviardžajuć, što kiroŭcy spynilisia sami.
«Učora my aznajomilisia z materyjałami spravy, i ŭžo ŭ paniadziełak sprava ŭ sud pojdzie — Minskaha rajona horada Zasłaŭje. Prykłali ŭsie chadajnictvy, abvinavačvajucca dva zvyčajnyja DAIšniki, jakija pa‑raniejšamu svaju vinu nie pryznajuć, admaŭlajuć usio całkam i śćviardžajuć, što kiroŭcy spynilisia sami».
Pa słovach advakata, nichto z kiraŭnictva DAI na łavu nie patrapić. Sudzić buduć dvuch zvyčajnych inśpiektaraŭ. Ich abvinavačvajuć u złoŭžyvańni słužbovym stanoviščam. Ale jaki prysud vyniesie sudździa, advakat skazać nie biarecca.
«424 artykuł častka 1 Kryminalnaha kodeksu — złoŭžyvańnie ŭładaj albo słužbovymi paŭnamoctvami. Karajecca pazbaŭleńniem prava zajmać peŭnyja pasady, zajmacca peŭnaj dziejnaściu sa štrafam. Albo pazbaŭleńniem voli na termin da 3 hadoŭ z pazbaŭleńniem prava zajmać peŭnyja pasady, zajmacca peŭnaj dziejnaściu. Ale pakolki ich navat nie aryštavali, a tolki ŭziali padpisku ab niavyjeździe, to možna ŭjavić, jakoje da ich staŭleńnie. Prysud abvinavačvalny budzie, ale nakolki jon budzie žorstkim albo miakkim, heta pytańnie».
Kali budzie pieršaje sudovaje pasiadžeńnie pakul nieviadoma. Spačatku, kaža advakat, sa spravaj pavinien aznajomicca sudździa.
Jak paviedamiŭ Jeŭraradyjo adzin z paciarpiełych 2 sakavika Juryj Paškievič, 14 traŭnia jaho razam z astatnimi paciarpiełymi vyklikali ŭ prakuraturu, kab aznajomić z materyjałami spravy. Pa jaho słovach, paciarpiełyja zastalisia nie zadavolenyja pracaj śledčych prakuratury.
«Nie zakranajecca pytańnie, ci sapraŭdy hetyja supracoŭniki DAI spyniali nas i vystaŭlali ŭ kartež pa svajoj inicyjatyvie? Heta ŭ pieršuju čarhu cikavić nas usich — ci nie byŭ dadzieny na heta kimści zahad? Tym bolš, što pierastała być sakretam toje, što heta nie pieršy raz takoje zdarajecca, i ŭžo spyniali inśpiektary takim čynam złačyncaŭ».
Pa jaho słovach, kali paciarpiełyja zastanucca niezadavolenymi rašeńniem suda, jany abaviazkova buduć jaho abskardžvać u sudzie vyšejšaj instancyi.
Miž tym, pa‑raniejšamu nieviadoma miescaznachodžańnie Ramana Mienciuka, suprać jakoha DAIšniki i vystaŭlali «žyvy ščyt» na trasie Minsk‑Mikaševičy. Vinoŭnik zdareńnia źnik 19 sakavika, adrazu paśla ŭdziełu ŭ prahramie Pieršaha kanała «Pusť hovoriat». Jak paviedamiŭ Jeŭraradyjo pres‑aficer UUS Minabłvykankama Alaksandr Šunkievič, śledčyja miarkujuć, što jon chavajecca na terytoryi Rasii.
Alaksandr Šunkievič: «Jon u vyšuku, i nijakaj dadatkovaj infarmacyi ŭ nas niama. Ale całkam mahčyma, što jon znachodzicca ŭ Rasijskaj Fiederacyi».
A na pytańnie Jeŭraradyjo, čamu jaho nie abviaścili ŭ mižnarodny vyšuk praź Interpoł, adkazaŭ, što Mianciuk — złačynca nie taho ŭzroŭniu, kab dziela jaho turbavać mižnarodnuju palicyju.
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam6
Kamientary