Rasijski fond sadziejničańnia zachavańniu i raźvićciu ruskaj i ŭschodniechryścijanskaj kultury ŭ imia Uładzimira Chrabraha płanuje ŭstanavić u Biełarusi Hieorhijeŭski kryž. Pra heta paviedamiŭ TASS kiraŭnik fondu Stafan Hienič 29 lipienia ŭ Obninsku (Kałužskaja vobłaść RF) padčas adkryćcia pieršaha ŭ Rasii Hieorhijeŭskaha kryža ŭ honar pieramoh ruskaj armii ŭ Pieršaj suśvietnaj vajnie.
Cyrymonija była prymierkavanaja da 60-hodździa horada, jakoje adznačajuć u hetyja vychadnyja. Pamiatny znak ujaŭlaje saboj vyrazany ź biełaha kamieniu Hieorhijeŭski kryž vyšynioj bolš za try mietry, pastaŭleny na kubičnuju padstavu. U centry znachodzicca miedaljon z reljefnaj vyjavaj śviatoha Hieorhija Pieramahanosca, jaki zabivaje źmieja.
«Fond nosić imia kniazia Sierpuchoŭska-Boraŭskaha Uładzimira Chrabraha i znachodzicca ŭ Kałužskaj vobłaści, tamu pieršym miescam ustanoŭki pamiatnaha znaka vybrany mienavita hety rehijon», — rastłumačyŭ Hienič. Pavodle jaho słoŭ, u 2016 hodzie takija ž kryžy buduć adkrytyja ŭ Maskvie i Kałuzie, a taksama za miažoj — u Biełarusi, Hrecyi, Sierbii i Francyi, «pry abaronie jakich pralivali kroŭ ruskija voiny». Vyrab znakaŭ ažyćciaŭlajecca za košt srodkaŭ fondu.
Varta adznačyć, što paśla trahičnych padziej va Ukrainie biełarusy šyroka abmiarkoŭvali tradycyjnaje raspaŭsiudžvańnie hieorhijeŭskich stužačak napiaredadni Dnia Pieramohi. Asabliva haračyja dyskusii adznačalisia ŭ mai 2014 hoda. Tady aktyvisty «Maładoha frontu» navat abviaścili hramadskuju kampaniju «Stop, impieryja» z metaj «ačyścić vulicy biełaruskich haradoŭ ad zasilla hieorhijeŭskich stužak i rasijskich ściahoŭ».
Viasnoj 2015 hoda ŭ Biełarusi byŭ raspracavany ŭłasny simvał Dnia Pieramohi — butańjerka z čyrvona-zialonaj stužkaj i kvietkami jabłyni. Alaksandr Łukašenka jaho ŭchvaliŭ. Pry hetym jon padkreśliŭ: hieorhijeŭskaja stužka, jakaja vykarystoŭvajecca ŭ jakaści simvała Dnia Pieramohi ŭ Rasii, u Biełarusi nie zabaronienaja. «Heta našy tradycyi, naša bajavaja supolnaść. My nikomu nie zabaraniajem. Moža, niešta prydumajem novaje, ale tolki nie treba nas paprakać, što my nibyta hetamu vorahi. Ni ŭ jakim razie», — skazaŭ jon.
Ciapier čytajuć
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ60
Kamientary