U pasiołku Enierhietykaŭ u Dziaržynskim rajonie Minskaj vobłaści supracoŭniki narkakantrolu i apieratyŭna-pošukavaha adździeła UUS Minabłvykankama padčas vyšukovych mierapryjemstvaŭ zatrymali 48-hadovaha miascovaha žychara. Mužčynu padazrajuć u niezakonnym vyrabie narkotykaŭ i zachoŭvańni bojeprypasaŭ, havorycca ŭ aficyjnaj infarmacyi.
Pry sabie zatrymany mieŭ bolš za 300 hramaŭ makavaj sałomki, kala adnaho litra rečyva, u jakim padazrajuć ekstrakcyjny opij, i nasieńnie maku. Apieratyŭniki miarkujuć, što mužčyna pierad hetym varyŭ opij z makavaj sałomki.
Pa źviestkach pravaachoŭnikaŭ, zatrymany byŭ čatyry razy sudzimy za niezakonny abarot narkotykaŭ. Volny čas jon baviŭ u pošuku narkaźmiaščalnych raślin — parievažna maku na susiedskich harodach. Opij, jak zajaviŭ mužčyna, jon varyŭ dla ŭłasnaha ŭžyvańnia.
Paćvierdziłasia i apieratyŭnaja infarmacyja, što mužčyna zachoŭvaje bojeprypasy. Jon sam pakazaŭ chovanku paśla prafiłaktyčnaj hutarki z pravaachoŭnikami.
Znojdzienyja hranaty — RHD-5 i F-1 — nakiravali na ekśpiertyzu. Nie vyklučana, što narkamana mohuć sudzić za niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ.
Kamientary