Užyvańnie žyviolnych białkoŭ źviazana sa skaračeńniem praciahłaści žyćcia, a raślinnych — z pavieličeńniem. Navukovuju pracu pra heta apublikavali ŭ časopisie JAMA Internal Medicine, karotki pierakaz źjaviŭsia na sajcie Science Daily.
Mižnarodnaja hrupa navukoŭcaŭ praviała maštabnaje daśledavańnie taho, jak krynica charčovych białkoŭ ŭpłyvaje na praciahłaść žyćcia čałavieka. Dla hetaha jany vyvučyli dadzienyja pra zdaroŭje i charčavańnie bolš čym 170 tysiač čałaviek.
Dobraachvotniki kožnyja čatyry hady zapaŭniali padrabiaznyja apytalniki pra toje, jakija mienavita pradukty jany spažyvajuć i jak časta heta robiać. Kožnyja dva hady jany prachodzili detalovy miedahlad. Zbor dadzienych doŭžyŭsia bolš za 25 hadoŭ, za čas daśledavańnia pamierła bolš za 36 tysiač udzielnikaŭ, pryčyny śmierci taksama dakumientavalisia.
Vyśvietliłasia, što vysoki ŭzrovień spažyvańnia žyviolnych białkoŭ — miasa, jajek abo małočnych praduktaŭ — słaba źviazany z pavieličeńniem uzroŭniu śmiarotnaści. U toj ža čas vysokaje spažyvańnie raślinnych białkoŭ — chleba, krup, makaronnych vyrabaŭ, babovych, arechaŭ — pakazała bolš nizki ŭzrovień śmiarotnaści.
Bolš pilny analiz pakazaŭ, što suviaź spažyvańnia žyviolnaha białku z pavyšanaj ryzykaj śmiarotnaści prykmietnaja tolki ŭ tych, chto maje choć by adnu prykmietu niezdarovaha ładu žyćcia: pakutuje ad atłuścieńnia abo niedachopu vahi, kuryć, złoŭžyvaje ałkaholem abo viadzie małaruchomy ład žyćcia. Dla tych, chto viadzie zdarovy ład žyćcia, takoj suviazi niama.
«Vyniki našaj pracy pakazvajuć, što ludziam varta zadumacca pra toje, kab užyvać bolš raślinnych białkoŭ, — raspavioŭ kiraŭnik daśledavańnia Minian Sun. — U vypadku vybaru krynicy žyviolnych białkoŭ, kuryca i ryba mohuć stać najlepšym rašeńniem».
Raniej navukoŭcy paviedamlali ab tym, što niekatoryja vidy miasa źjaŭlajucca kancerahienam dla čałavieka. Čyrvonaje miasa — jałavičyna, śvinina, baranina i kanina — ekśpierty acanili jak «imavierna kancerahiennyja dla čałavieka». Pierapracavanaje miasa — kaŭbasu, viandlinu, sasiski i biekon — śpiecyjalisty kłasifikavali jak pradukty, kancerahiennyja dla čałavieka. Ekśpierty padličyli, što 50 hramaŭ pierapracavanaha miasa ŭ dzień (mienš dvuch łustačak biekonu) pavialičvajuć ryzyku kołarektaralnaha raka na 18%.
Palitołah Alina Charysava pahadziłasia supracoŭničać z SBU. Akazałasia, heta było KDB36
Kamientary