Načalnika białynickaha DAI prysudzili da 4 hadoŭ źniavoleńnia

Pastaŭlenaja kropka ŭ rezanansnaj spravie byłoha pravaachoŭnika. Padčas śledstva vyśvietliłasia, što ŭradženiec Mahilova, jaki praciahły čas zajmaŭ vysokuju milicejskuju pasadu ŭ Białyničach, padmanuŭ znajomych i banki amal na paŭmiljarda niedenaminavanych biełaruskich rubloŭ.

Historyju pra toje, jak Viktar (usie imiony źmienienyja) «zdabyvaŭ» sabie hrošy, viedajuć i za miežami rajona. Mužčyna prydumaŭ złačynnuju schiemu, jakaja dazvalała brać u bankach kredyty i potym ich nie viartać. Zastavałasia tolki znajści achviar padmanu…

— Abvinavačany nieadnarazova źviartaŭsia da siabroŭ i znajomych z prośbaj uziać dla jaho kredyt, tłumačačy heta tym, što z-za słužbovaha stanovišča jon nie moža aformić pazyku na svajo imia, — havoryć dziaržabvinavaŭca Natalla Nikałajenka.

— Mužčyna harantavaŭ im svoječasovaje viartańnie sumy ŭ bank, vypłatu ŭsich pracentaŭ. I poŭny pakiet nieabchodnych dakumientaŭ abiacaŭ samastojna sabrać.

Ludzi pahadžalisia, bo ličyli Viktara svaim siabram, dyj jaho vysokaja pasada była dla ich harantam. Admietna, što nichto z «dobraachvotnikaŭ» nie zasumniavaŭsia ŭ zakonnaści spravy navat tady, kali znajomaja machlara Taćciana štampavała dla ich padrobnyja daviedki ab miescy pracy i dachodach.

— Ad złačynnych dziejańniaŭ padsudnaha paciarpieli piać bankaŭ, — adznačaje Natalla Michajłaŭna. — Viadoma, ich pradstaŭniki patrabujuć kampiensacyi škody, jakaja składaje zvyš 2500 bazavych vieličyń.

Adnak siarod paciarpiełych jość nie tolki finansavyja ŭstanovy. Viktar paśpieŭ uziać u doŭh hrošy i ŭ prostych hramadzian — 500 dalaraŭ u Anastasii i 2000 dalaraŭ u Kanstancina.

Sprava machinatara zajmaje 13 tamoŭ i prachodzić adrazu pa niekalkich artykułach Kryminalnaha kodeksa Respubliki Biełaruś: č.č. 5 i 6 art. 16, č. 1 art. 427 (padbuchtorvańnie i dapamoha ŭ zaniasieńni słužbovaj i inšaj upaŭnavažanaj asobaj zaviedama łžyvych źviestak i zapisaŭ u aficyjnyja dakumienty, u składańni i vydačy zaviedama falšyvych dakumientaŭ), č.č. 2 i 4 art. 209 (zavałodańnie majomaściu šlacham złoŭžyvańnia davieram i padmanu (machlarstva), zroblenaje ŭ asabliva bujnym pamiery paŭtorna). Za lipavyja daviedki Taćciana pryciahnuta da kryminalnaj adkaznaści pa č. 1 art. 427 KK RB (padrobka dakumientaŭ).

Uličvajučy ŭsie abstaviny, dziaržabvinavaŭca Michaił Androsienka prapanavaŭ pakarańnie dla Viktara ŭ vyhladzie pazbaŭleńnia voli na 8 hadoŭ z utrymańniem va ŭmovach uzmocnienaha režymu z kanfiskacyjaj, a dla Taćciany — štraf u 1000 b.v. (21 000 denaminavanych biełaruskich rubloŭ).

— Jašče padčas śledstva Viktar pryznavaŭ svaju vinu tolki častkova, — dadaje Natalla Nikałajenka. — Jon kazaŭ, što braŭ u doŭh hrošy ŭ ludziej, a voś z bankami nijakich spraŭ nie mieŭ.

Na apošnim pasiadžeńni ŭ čaćvier sud ahučyŭ svoj vierdykt: machlaru — 4 hady pazbaŭleńnia voli z utrymańniem va ŭmovach uzmocnienaha režymu z kanfiskacyjaj, a jaho siabroŭcy — štraf u 1000 bazavych.

Pry vyniasieńni pakarańnia ŭličvałasia toje, što hramadzianie atrymali svaje 500 i 2000 dalaraŭ. Prysud ustupić u siłu praz 10 dzion, kali nie budzie abskardžany ci apratestavany.

• 0
• 0
• 0
• 0
• 0
• 0
• 0
• 0