Kamisija śviataroŭ Ruskaj pravasłaŭnaj carkvy nie vyjaviła śladoŭ miratačeńnia na biuście Mikałaja II la simfieropalskaj kaplicy, ab jakim zajaviła deputat Dziarždumy Natalla Pakłonskaja, paviedamlaje VVS.
«Na momant naviedvańnia kaplicy śviatych carskich pakutnikaŭ kamisijaj śladoŭ miratačeńnia na bronzavym biuście cara-pakutnika Mikałaja II i abrazach u kaplicy nie vyjaŭlena», — havorycca ŭ paviedamleńni pres-słužby Simfieropalskaj i Krymskaj jeparchii.
Biust praviarała kamisija ź piaci śviataroŭ. Miarkujučy pa paviedamleńni jeparchii, jany šukali na biuście kananizavanaha ruskaha cara ślady miry abo inšych vydzialeńniaŭ, ale nie znajšli. U toj ža čas kamisija parekamiendavała śviataru, jaki słužyć u kaplicy, uvažliva nazirać za biustam.
«Dla pryniaćcia kančatkovaha rašeńnia pa hetym pytańni kamisija ličyć metazhodnym śviataru, jaki apiakaje kaplicu, praciahnuć nazirańnie, i ŭ vypadku źjaŭleńnia śladoŭ miratačeńnia nieadkładna paviedamić kirujučamu archireju i kamisii», — havorycca ŭ zajavie.
U RPC taksama zajavili pra niedarečnaść kpinaŭ z Natalli Pakłonskaj, jakija źjavilisia ŭ sacyjalnych sietkach paśla taho, jak karotki rolik z vytrymkaj ź jaje intervju staŭ papularnym.
«Nie budziem krytykavać maładuju, niedaśviedčanuju jašče ŭ palitycy žančynu-deputata. Nie varta źviartać uvahi na bahaborcaŭ i sietkavych pustabrechaŭ — harbataha mahiła vypravić. Pakiniem u spakoi i vysokaadukavanych pravasłaŭnych intelihientaŭ i bahasłovaŭ, u jakich sam fakt miratačeńnia vyklikaje źjedlivyja naśmieški», — zajaviŭ kiraŭnik sinadalnaj kamisii pa kananizacyi śviatych jepiskap Pankracij.
Raniej Pakłonskaja u intervju telekanału «Caŕhrad TV» zajaviła, što biust Mikałaja II, ustanoŭleny kala kaplicy pry prakuratury, pačaŭ vydzialać duchmianuju vadkaść.
«Siońnia maje supracoŭniki telefanujuć z Kryma, z prakuratury, jakija dahladajuć kaplicu, i kažuć, što siońnia ranicaj biust Mikałaja II, haspadara našaha, jaki my ŭstalavali kala kaplicy, zamiratočyŭ, — skazała Pakłonskaja. — I heta ŭ stohadovuju hadavinu adračeńnia cara Mikałaja ad trona. Jon nam dapamahaje, bo jany zahinuli dla taho, kab my zrabili Rasiju kvitniejučaj i vialikaj. My abaviazanyja heta zrabić».
Kamientary