10 technałohij, jakija źmieniać žyćcio kožnaha z nas za 10 nastupnych hadoŭ
Časopis MIT Technology Review, jaki vydajecca Masačusieckim technałahičnym instytutam (MIT), apublikavaŭ śpis revalucyjnych technałohij, jakija źmieniać śviet.
Śpis z samych pierśpiektyŭnych technałohij MIT publikuje štohod z 2001 hoda. Na dumku aŭtaraŭ publikacyi, hetyja technałohii paŭpłyvajuć na palityčnyja pracesy, ekanomiku, kulturu i palepšać jakaść žyćcia čałavieka.
1. Raspaznańnie tvaru jak srodak apłaty i propusk (technałohija ŭžo vykarystoŭvajecca)
Technałohii raspaznańnia tvaru najbolš aktyŭna raźvivajucca ŭ Kitai. Jany vykarystoŭvajucca jak u śfiery biaśpieki, tak i dla spraščeńnia absłuhoŭvańnia kupcoŭ. Adna z kampanij, jakaja zajmajecca hetym kirunkam raźvićcia — Face++. Technałohija vykarystoŭvajecca dla pieravodu hrošaj praz mabilny dadatak Alipay, jakim karystajecca bolš za 120 młn čałaviek u Kitai. Tvar čałavieka źjaŭlajecca adzinym paćviardžeńniem apieracyi pieravodu hrošaj.
Ułady Kitaja vykarystoŭvajuć technałohiju dla pošuku padazravanych pry prahladzie kamier nazirańnia.
2. Bieśpiłotnyja hruzaviki (5—10 hadoŭ)
Kampanija Otto z Kalifornii ŭžo testuje hetuju technałohiju. Pieršy paśpiachovy rejs adbyŭsia letaś u kastryčniku. Bieśpiłotnyja hruzaviki na bazie Volvo majuć čatyry videakamiery, jakija nazirajuć za darohaj, radar, aksieleromietr, łazierny łakatar, a taksama kampjutar, jaki analizuje dadzienyja. Bieśpiłotnyja hruzaviki mohuć jechać jak paasobku, tak i cełaj kałonaj.
3. Kvantavyja kampjutary (4—5 hadoŭ)
Zaraz navukoŭcy pracujuć z kvazičaścicami, adkrytymi tolki ŭ 2012 hodzie, — hałoŭnymi kampanientami budučych kvantavych kampjutaraŭ. Hetyja kampjutary dazvolać ažyćciavić revalucyju ŭ kryptahrafii, farmaceŭtycy, u halinie štučnaha intelektu. Pieršyja kamiercyjna vyhadnyja kampjutary źjaviacca praz 5 hadoŭ.
4. Lačeńnie paralušu (praz 10—15 hadoŭ)
Navukoŭcy raspracavali tak zvany niervovy šunt: da hałaŭnoha i śpinnoha mozhu, a taksama da paškodžanaj kancaviny padłučajecca admysłovy elektrod. Sihnał ad hałaŭnoha mozhu traplaje naŭprost u kancavinu, i pacyjent siłaj dumki moža joj kiravać. Navukoŭcy spadziajucca, što technałohija dazvolić nie tolki pazbavicca ad paralušu, ale jaje možna vykarystoŭvać i dla viartańnia zroku i pamiaci.
5. 360-hradusnyja kamiery (technałohija ŭžo vykarystoŭvajecca)
Užo zaraz možna nabyć śpiecyjalnyja kamiery, jakija robiać zdymki ŭ režymie śfieryčnaj panaramy. Siarod vytvorcaŭ — Ricoh, Samsung, 360fly, JK Imaging, IC Real Tech, Humaneyes Technologies. Kaštuje takaja pryłada 500—800 dalaraŭ ZŠA.
6. Haračyja fotaelemienty (10—15 hadoŭ)
Navukoŭcy MIT na asnovie zvyčajnych soniečnych panelaŭ raspracavali bolš efiektyŭnyja termafotaelemienty. Zvyčajnyja fotaelemienty pieratvarajuć u elektryčnaść maksimum 32% enierhii sonca. A ŭ termafotaelemientaŭ, raspracavanych MIT, efiektyŭnaść udvaja vyšejšaja.
7. Hiennaja terapija 2.0 (technałohija ŭžo vykarystoŭvajecca)
Pryncyp lačeńnia hienietyčnych chvarob prosty: z dapamohaj virusa ŭ kletki dasyłajecca i ŭkaraniajecca novy hienietyčny materyjał. Užo zaraz navukoŭcy pry dapamozie hiennaj terapii mohuć vylečyć takija hienietyčnyja zachvorvańni, jak, naprykład, ciažki kambinavany imunadeficyt, prahresujučuju ślepatu. A ŭžo ŭ chutkim časie daktary zmohuć lačyć i inšyja zachvorvańni: chvaroby Alchiejmiera, dyjabiet, sardečnuju niedastatkovaść i rak.
8. Kletačny atłas (5 hadoŭ)
Stvarajecca mižnarodny kansorcyum, u jaki ŭvojduć pradstaŭniki ZŠA, Vialikabrytanii, Šviecyi, Niderłandaŭ, Izraila i Japonii i jaki budzie zajmacca katałahizacyjaj 37,2 trłn kletak čałaviečaha cieła. Kožnaja kletka ŭ katałohu budzie mieć unikalny indeks i malekularny podpis. Hety atłas upieršyniu pakaža ŭ samych drobnych detalach, z čaho składajecca cieła čałavieka, što zmoža istotna paskoryć pošuk novych lekaŭ.
9. Botnet rečaŭ (technałohija ŭžo vykarystoŭvajecca)
Botnety (sietki, jakija składajucca z kampjutaraŭ z aŭtanomnymi prahramami) vykarystoŭvajucca z pačatku 2000-ch hadoŭ. Chakiery vykarystoŭvajuć hetyja sietki dla ažyćciaŭleńnia DDoS-atak.
Internet rečaŭ (sietka, jakaja składajecca z elektronnych pryład z vychadam u internet) źjaviŭsia nie tak daŭno. I zaraz chakiery vykarystoŭvajuć internet rečaŭ dla stvareńnia botnetaŭ, jakija składajucca ź dziasiatkaŭ tysiač bytavych pryład. Tak, u kastryčniku z dapamohaj botneta była paralizavana praca internet-pravajdara Dyn.
MIT Technologies Review adznačaje, što naŭrad ci prablema botnetaŭ vyrašycca ŭ chutkim časie. I pakul navukoŭcy nie raspracujuć nadziejnuju sistemu abarony, chakiery i dalej buduć vykarystoŭvać botnety rečaŭ.
10. Navučańnie z padmacavańniem (1—2 hady)
Z dapamohaj hetaj technałohii kampjutar pravodzić ekśpierymienty, atrymlivaje vyniki hetych ekśpierymientaŭ i vykarystoŭvaje ich dla pošuku šlachoŭ vykanańnia zadač. Faktyčna kampjutary navučajucca jak ludzi, šlacham sprobaŭ i pamyłak, bieź źniešniaj dapamohi. Hetuju technałohiju ŭžo zaraz vykarystoŭvajuć dla padvyšeńnia biaśpieki bieśpiłotnych aŭtamabilaŭ. Navukoŭcy imknucca raspaŭsiudzić jaje vykarystańnie i na inšyja śfiery.
Ciapier čytajuć
Radzilnyja damy spaborničajuć, u kaho 3 lipienia narodzicca bolš dziaciej12
Kamientary