«Dzieciuki» źniali VIDEA ŭ znak salidarnaści z abaroncami Kurapat

Muzyki čytajuć vierš «Kurapaty» słonimskaha paeta Rudolfa Pastuchova. Pierakład z ruskaj movy zrabiŭ Ivan Siarhiejčyk.

«Ideja źniać hety rolik źjaviłasia ŭ znak salidarnaści z chłopcami, što baranili pamiać Kurapat i nie davali raspačać zabudovu na achoŭnaj terytoryi miemaryjała, — napisali «Dzieciuki». — Ale pakul my ŭsio arhanizavali, budoŭla spyniłasia i chłopcy zharnuli svoj łahier. I zapis nibyta staŭ nie aktualny, ale, na žal, padziei apošnich miesiacaŭ śviedčać, što hetyja radki jašče doŭha buduć aktualnymi i šmat kamu budzie patrebna naša salidarnaść. Da taho momantu, pakul niechta nie adkaža za Kurapaty, nie pryznaje i nie pakajecca ŭ złačynnaści tatalitarnaha savieckaha ładu».

Vierš, jaki čytajuć «Dzieciuki»

Nie Buchienvald tut,
Nie Chatyń,
a Kurapaty.
Zamšeły les —
kudy ni kiń.
Dy skryp łapaty.
I serdca stuk
na kožny huk
śmiarotna ranić,
žałobna bje
pakłon ziamli
ludskaja pamiać.
Hallo traščyć —
užo viaduć
pad kryk zaciaty.
Ptušyny kryk
nie zmoŭknie tut —
tut Kurapaty.
Nichto nie zmoh adsiul ŭciačy.
Tut ciemra sumu.
Usiaho sto krokaŭ unačy.
A kolki dumak?…
Tut mora vylita kryvi.
Tut —
sosny ŭ nieba.
Piasok čyrvony,
ržavy žvir.
Tut — byl i niebyl.
Kudy ni kiniešsia — pravał.
Vadavarot piasčany.
Čas rasstralany napavał,
i klič adčajny,
i histaryčny toj pravał —
čarniej za nočy.
A moža, jon,
jak luty škvał,
fašyzm praročyŭ?!
Tut stalinizm
šalona rvaŭ —
jak viecier vieka
chrabat historyi łamaŭ
i čałavieka…
Plaŭkom śvincovym sa stvała —
va ŭpor achviaram…
Kryž nakryž cieły,
pach kryvi
I žach na tvarach.
Śvidrujuć kuli čarapy
ŭnačy bieź śvistu:
i kamsamolca,
j mužyka,
i kamunista…
I losy novyja šumaciać
ŭ stale Canavy —
a cieły znoŭ i znoŭ laciać
na dno kanavy.
I na hrudziach u Kurapat —
na łatcy łata
A śmierci što da novych strat?
nie vinavata…
Jaje nie klikali siudy,
tut ŭsio inačaj.
Ściraje pamiaci ślady
daždžlivym płačam.
I ni kryžoŭ,
ni zorak tut —
hamoniać sosny,
i pieśni nad taboj piajuć
drazdy hałosna
dy ciemra vyščarana pje
śvitalny zołak…
Voś śviedka intervju daje.
Na tvary — społach…
Fasfarascyrujuć stvały
haroj škiletaŭ.
Jak dzirki ŭ čarapach
ad pistaletaŭ…
Ci nie majoj matuli kryk
słych reža z-pad łapaty?
pavinien niechta adkazać
za Kurapaty!

Aŭtar hetaha vierša Rudolf Pastuchoŭ naradziŭsia ŭ 1936 hodzie i vychoŭvaŭsia ŭ HUŁAHU. Jaho baćkoŭ rasstralali ŭ 1937 hodzie. U 1970-m jon pierabraŭsia ŭ Słonim, dzie i pražyŭ da śmierci ŭ 1997 hodzie. 

* * *

Kurapaty — miesca, dzie saviety rasstralali dziasiatki tysiač hramadzian Biełarusi. Heta była častka palityki, skiravanaj na vyniščeńnie nacyjanalnych elit, zdolnych uznačalić supraciŭ paniavolenych narodaŭ. U Biełarusi byli zahublenyja praktyčna ŭsie bahatyja sialanie, bolšaść piśmieńnikaŭ, ministraŭ, akademikaŭ, a paźniej, u niekalki pryjomaŭ, sami čekisty, jakija ŭdzielničali ŭ aryštach i rasstrełach.

• 0
• 0
• 0
• 0
• 0
• 0
• 0
• 0