U Minsku pačali pradavać katedžy ŭ novym zakrytym pasiołku. Dzie jon znachodzicca?
Za samyja tannyja damy ŭ novym zakrytym pasiołku «Utulny» prosiać bolš za $930 tysiač. Heta za dvuchpaviarchovyja katedžy płoščaj da 271 kvadratnaha mietra z čatyrma spalniami, vialikaj kuchniaj-haścioŭniaj, terasami i ŭłasnaj łaźniaj abo saŭnaj.
Lasny masiŭ pamiž Parnikovaj, Padlesnaj i Anajeva jašče ŭ savieckija časy byŭ svojeasablivym zakrytym śvietam. Tut znachodziŭsia kompleks dač Savieta ministraŭ BSSR, a paśla raspadu SSSR pracavali restaran i pryvatny dziciačy sadok. Siońnia terytoryja pastupova pieratvarajecca ŭ adzin z samych darahich kvartałaŭ katedžnaj zabudovy Minska. Niahledziačy na blizkaść da praśpiekta Niezaležnaści, Nacyjanalnaj biblijateki i stancyi mietro «Uschod», kvartał, adviedzieny pad žyły kompleks «Utulny», faktyčna schavany ŭ lesie kala Ściapianki.
Uletku 2024 hoda pry budaŭnictvie kvartała byli znojdzieny kaścianyja čałaviečyja pareštki 75 mužčyn i žančyn, a taksama hilzy i asabistyja rečy zabitych. Jany byli pierapachavany na Čyžoŭskich mohiłkach jak «achviary hienacydu biełaruskaha naroda ŭ Vialikaj Ajčynnaj vajnie». Pry hetym nijakich śviedčańniaŭ pra rasstreły mirnych žycharoŭ u hetym miescy prakuratura tak i nie vyjaviła. U toj ža čas mienavita hetaje miesca miascovyja žychary nazyvali adnym ź miescaŭ rasstrełaŭ u časy savieckich represij 1930‑ch hadoŭ.
Reč u tym, što mienavita ŭ hetym rajonie znachodziłasia dača Łaŭrencija Canavy — kiraŭnika NKVD i orhanaŭ dziaržaŭnaj biaśpieki BSSR u 1938—1941 i 1943—1951 hadach, adnaho z klučavych arhanizataraŭ stalinskaha teroru ŭ Biełarusi.
Tak što miesca złaviesnaje.
Jak paviedamlaje Realt.by, prajekt «Minskbuda» praduhledžvaje budaŭnictva na terytoryi kompleksa kala sotni asobnych katedžaŭ. Ciapier u prodaž pastupili 33 katedžy dvuch typaŭ. Dvaccać damoŭ typu P250 majuć płošču kala 259 kvadratnych mietraŭ, jašče trynaccać damoŭ typu P270 — kala 271 kvadratnaha mietra.
Budaŭnictva ŭžo nabližajecca da zaviaršeńnia. Pavodle infarmacyi zabudoŭščyka, hatoŭnaść niekatorych abjektaŭ dasiahaje 80%. Adnačasova praciahvajecca ŭparadkavańnie terytoryi: prakładvajucca piešachodnyja darožki, uładkoŭvajucca prajezdy i razvarotnyja placoŭki.
Usie katedžy dvuchpaviarchovyja. Jany pabudavanyja pa manalitna-karkasnaj schiemie z žalezabietonnymi kałonami i ścienami z kieramzitabietonnych błokaŭ. Fasady ŭcieplenyja i atynkavanyja, dach — skatny.
Pieršy pavierch adviedzieny pad ahulnuju zonu. Tut raźmiaščajucca piaredni pakoj, mini-kacielnia, haspadarčaje pamiaškańnie, haściavy sanvuzieł, a taksama adkrytaja prastora, jakaja abjadnoŭvaje kuchniu, stałovuju i haścinuju. Da doma prymykajuć terasy i navies dla aŭtamabila.
Asnoŭnaje adroźnieńnie pamiž dvuma typami katedžaŭ — zona adpačynku na pieršym paviersie. U damach typu P250 praduhledžana łaźnia z paryłkaj, dušam, zonaj dla adpačynku i vychadam na terasu. U bolšych damach typu P270 zamiest łaźni raźmieściać saŭnu z asobnym sanvuzłom i zonaj adpačynku.
Na druhim paviersie znachodziacca čatyry žyłyja pakoi. Adna spalnia maje ŭłasny sanvuzieł, jašče adzin ahulny sanvuzieł pryznačany dla astatnich žycharoŭ doma. Taksama praduhledžanyja harderobnaja i terasa.
Katedžy buduć zdavacca biez čystavoha abrableńnia. Unutry zabudoŭščyk vykanaje tynkoŭku ścien, padrychtoŭku pavierchniaŭ i ściažku padłohi. Ustalujuć draŭlanyja vokny z dvuchkamiernymi škłopakietami, padviaduć usie inžyniernyja kamunikacyi i padklučać hazavaje aciapleńnie.
Košt zaležyć ad sposabu apłaty. Pry stopracentnaj adnarazovaj apłacie kvadratny mietr kaštuje 10 tysiač rubloŭ. Kali vykarystoŭvajecca rasterminoŭka abo bankaŭski kredyt, cana ŭzrastaje da 10 416 rubloŭ za kvadratny mietr.
U vyniku samy dastupny katedž typu P250 abydziecca ŭ 2,59 miljona rubloŭ, abo prykładna ŭ $933 tysiačy. Za dom typu P270 daviadziecca zapłacić kala 2,76 miljona rubloŭ — amal $995 tysiač. Zajavy na zaklučeńnie damovaŭ prymajucca z 19 červienia.
Darečy, heta ŭžo nie pieršy etap prodažaŭ u «Utulnym». Jašče ŭ sakaviku hetaha hoda zabudoŭščyk vystaviŭ na rynak taŭnchausy. Tady za dvuchpaviarchovyja siekcyi płoščaj kala 206 kvadratnych mietraŭ prasili ŭ ekvivalencie kala 420 tysiač dalaraŭ. Pabudavać pieršyja abiacali da śniežnia hetaha hoda.
Praŭda, całkam katedžnym hety kvartał nie budzie. Prajekt praduhledžvaje budaŭnictva nie tolki asobnych damoŭ i taŭnchausaŭ, ale dvuch šmatkvaternych damoŭ pieramiennaj paviarchovaści na 354 kvatery. Užo ŭ lipieni adbudziecca aŭkcyjon pa prodažu hatovych kvater u domie numar 2. U płanach — dziciačy sadok na 60 miescaŭ i handlovy centr. Tamu z časam terytoryja byłych uradavych dač pieratvorycca ŭ paŭnavartasny žyły mikrarajončyk.
Ciapier čytajuć
Achviary intehracyi. Rasija biaspłatnymi pucioŭkami i praz Rassupracoŭnictva zavablivaje biełaruskich dziaciej2
Kamientary