12 maja ŭ Viciebsku na vulicy Tałstoha adbyŭsia pažar u domie, u jakim znachodzicca firmovaja krama «Marka», a na druhim paviersie žyvie ŭładalnik chołdynha Mikałaj Martynaŭ.
U budynku adbyłosia zadymleńnie na pieršym i na cokalnym pavierchach. Hareła ŭpakovačnaja kardonnaja tara z abutkam u pamiaškańni składa kramy, paviedamlajecca ŭ supołcy MNS u sacsietkach.
Pra pažar vyratavalnikam a 10:28 paviedamiła rabotnica kramy. U budynku spracavała pažarnaja sihnalizacyja, što dapamahło apieratyŭna vyjavić pažar. Ratavalniki evakuiravali z kramy troch rabotnikaŭ, a z troch kvater na druhim paviersie vyvieli dvuch čałaviek. Naviedvalnikaŭ na momant uzharańnia ŭ kramie nie było.
Budynak, u jakim adbyŭsia pažar, źjaŭlajecca historyka-kulturnaj kaštoŭnaściu 3 katehoryi — hety dom ŭvachodzić u kompleks zabudovy vulicy Tałstoha XIX—XX stahodździaŭ.
Kamientary