Viarchoŭny sud pakinuŭ bieź źmieny prysud 32-hadovamu Alaksieju Michaleniu, jaki zabiŭ piensijanieraŭ u Naroŭli. Raniej Homielski abłasny sud pryznačyŭ abvinavačanamu vyklučnuju mieru pakarańnia — śmiarotnaje pakarańnie.
Alaksiej Michalenia byŭ pryznany vinavatym u naŭmysnym supraćpraŭnym pazbaŭleńni žyćcia (zabojstvie) dvuch asob, jakoje ździejśniŭ z asobaj žorstkaściu. Raniej jon užo byŭ sudzimy za zabojstva. U sakaviku Homielski abłasny sud pryhavaryŭ jaho da vyšejšaj miery pakarańnia. 30 červienia 2017 Viarchoŭny sud pakinuŭ prysud bieź źmienaŭ.
Zabojstva Michalenia ździejśniŭ u sakaviku minułaha hoda praź niekalki dzion paśla vychadu na volu. U dziažurnuju čaść Naraŭlanskaha RAUS ad miascovaha žychara pastupiła paviedamleńnie pra toje, što ŭ adnym z pryvatnych damoŭ znojdziena cieła žančyny biez prykmiet žyćcia. Śledča-apieratyŭnaja hrupa, jakaja prybyła na miesca zdareńnia, znajšła jašče adzin trup — jaje brata. Nieŭzabavie byŭ zatrymany Alaksiej Michalenia.
Biełaruś — adzinaja kraina ŭ Jeŭropie, dzie da hetaha času isnuje śmiarotnaje pakarańnie. Z pačatku 1990 hoda da vyšejšaj miery ŭ Biełarusi było pryhavorana bolš za 400 čałaviek, za ŭvieś hety čas śmiarotnaje pakarańnie było zamieniena turemnym terminam tolki adnamu asudžanamu.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?77
Kamientary